Ambakiti konsejuecha paraka familia ma tsípikua jingoni irekaaka

Acheeti uéka je chaari uarhiitini

“Uétarhisïndi eskaksï acheeticha uéauaka imeecheri uarhiitichani eska imeechajkumindu na uékakuarhijka. Ima enga uékajka imeeri uarhiitini jandiajkumindusï uékakuarhijti. Ka no nema jarhasti enga no exenchajka imeeri mismu kuerpuni, sino mejori sési tʼirerasïndi ka kuidarini” (EFESU 5:28, 29).

Acheeti jindeesti enga orhejtsïkujka familiani (Efesu 5:23). Joperu ambakiti uámba, no no sési kámasïndi témbani ka nijtu jukari erokuarhijki imeeri ambe, sino jukaparharasïndi, kéndasïndi ka xarhatakusïndi eska xénchasïnga. Ístu, no méntkisï imani ambe úsïndi ambe enga ima uékajka, sino jánguarhintasïndi paraka témba tsípikua jingoni irekaaka (Filipusʌ 2:4). Enga uandontskuarhejka témba jingoni arhisïndi na enga pʼikuarherajka ka ambe enga eratsejka, joperu ístu, kurhajchasïndi témbani. No ikiasïndi imani jingoni, nijtu no sési kámajki o no sési arhini (Kolosasi 3:19).

Uarhiiti janhanharhi je chaari acheetini

“Uarhiiticha janhanharhiaueksï imeecheri acheetichani” (EFESU 5:33).

Enga uarhiiti janhanharhijka imeeri uámbani ka enga apoiarijka ambe enga ima eratsejka úni, úsïndi eska pínandikua jauaka imeeri familiarhu. Ka enga uámba no sési uaaka ambe ma, no kʼuratsetasïndi, sánderu sési, seguirisïndi janhanharhini ka no sóntku ikiasïndi (1 Pedru 3:4). Ka enga uétarhijka uandontskuarheni uandanhiateri ma, jirinhakuntasïndi káni uaa ísï úni ka janhanharhikua jingoni ísï úsïndi (Eclesiastés 3:7).

Asï jáma je enganiarperani

“Acheeti [...] kúnguarhi[ati] imeeri uarhiiti jingoni, ka imaksï tsimarhani májku kuerpueuati” (GÉNESIS 2:24).

Enga tataka ma ka nanaka ma tembuperajka, niárasïndiksï familia ma jindeeni. Ísï jimbo, tsimarhanksï jatsisti para jánguarhintani paraksï no méni jámani jurajperani. ¿Néna? Engaksï tsimarhani kánikua uékperakua jingoni kámberaska. Nóksï méni jámapirindi apondini nema jingoni enga no témbepiringa o uámbeeni. Enga nema i ambe újka, kánikua no sési pʼikuastasïndi máteruni, úsïndi eska nóteru mintsinharhikueuakia ka kʼamajkusïndi familiani (Ebreu 13:4).

Taaticha jorhendaa je chaari sapiichani

“Jorhenda sapini náki jindeeski ambakiti xanharu, nájkiruka jatiriuakia no jurajkuati indeni xanharuni” (PROVERBIOS 22:6).

Tata Diosï arhiasïndi imeechani engaksï taatika eskaksï jatsiska para jorhendaa uájpeechani, i ambe arhikuekasïndi eskaksï jatsiska para ambakiti ambe jorhendaani úni ka ambakiti ejemplu ma íntskuani (Deuteronomio 6:6, 7). Enga sapi ma niáraaka no sési ambe úni, ambakiti taatichaksï no jirejiresï no sési exesïndi oksï no sési arhini, sánderu sési, ‘sóntkuksï kurhandisïndi, peruksï ióndasïndi mókukuarhini’ ka ‘ístu ióndanksï ikiani’ (Santiagu 1:19). Engaksï taaticha exejka eska uétarhisïnga kastigu ma íntskuni, ísïksï uaati jimbokaksï xénchasïnga ka no jimbokaksï ikiani jauaka.

Sapiicha, kurhajcha je chaari taatichani

“Sapiicha, janhanharhia je chaari taatichani [...]. ‘Janhanharhi chiiti taatini ka chiiti nándini’” (EFESU 6:1, 2).

Sapiichaksï jatsisti para kurhajchaani ka kánikua janhanharhiani imeecheri taati jémbeechani. Engaksï ísï újka, jarhuajpesïndiksï paraka imeecheri familia pínandikua ka tsípikua jingoni irekaaka. Engaksï sapiicha kʼéjkia, xarhatasïndiksï eskaksï janhanharhiasïnga taati jémbeechani, engaksï újka ambe enga uétarhiaka parakaksï imeecheri taaticha sési jauaka. Pori ejemplu, úsïndiksï ambe enga uétarhiaka kʼumanchikuarhu parakaksï taati jémbeecha uaaka agustu irekani, oksï jarhuataasïndi sentabu jingoni para ima ambe engaksï uétarhinchajka (1 Timoteo 5:3, 4).