Biblia sési mókuntasti ambe engani kurhamarhikuarhienga

NA ENGANI IREKAPKA IÓNTKI

Andajpenuspka Székesfehérvár, Hungría anapu ireta máesti enga jukari mili uéxurhini jakaia ka enga k’éri istoria ma jatsika. Útasï miáxaka na enga xáni no sési jásï ambe úkuarhipka jini Segunda Guerra Mundiali jimbo.

Juchiiti tatitecha jingoni kʼuiripeska. Sési miáxaka uékperakua jingoni, sánderia juchiiti nanitani, Elisabeti. Imarini jarhuataspti parani niárani jakajkuni Tata Diosïni. Jiáni engani tres uéxurhini jatiripka pʼinderasptireni imani jingoni chúrikuechani kómarhini Padrenuestru. Peruni jiáni niáraspka kurhanguni ambe enga arhikuekajka inde kómarhikua engani 30 uéxurhini jatiripkia.

Juchiiti tatitechajtsïni kuidaristi desde engani sapichu japka, jimbokaksï juchiiti papecha chúskutasïrenga ánchikuarhini paraksï úni sentabu patsani ka únksï ambakiti kʼumanchikua ma piáni. Peru kada kinse dia, sábaduechani iámu familia tánguarhintasïreendi para májku kʼéri tʼireni. Miásïnga indeni ambe kánikua uékperakua jingoni.

Uéxurhini 1958 jimbo, juchiiti taatichaksï úspti ambe engaksï xáni uékeenga: úsptiksï piáni kʼumanchikua ma. ¡Iásï kʼóru úpiringia imeecha jingoni irekani! Kánikua tsípixapka, peru inde ambe no ióni durarispti, seisi mesesi tátsekua, juchiiti taati kánseri jimbo uarhispti.

Niáraspka kánikua no sési pʼikuarherani. Miásïnga eskani arhisïreenga Tata Diosïni: “Jikini kurhachispka eskari salbaripiringa juchiiti taatini. ¡Kánikua jirinhantasïnga! ¿Andirenisï no kurhajcha?”. Kánikua uékaxapka míteni nani jarhaspi juchiiti taati. kurhamarhikuarhisïrenga: “¿Auandarhu jarhaski o nóteru jarhaski?”. Ikiasïrenga exeni máteru sapiichani jimbokaksï útasï jatsispka imeecheri taatini.

Uánikua uéxurhini jimbo niraspka pauani pauani kamposanturhu. Tinguixurhisïrenga juchiiti taatiri tumbarhu ka kómarhisïreenga: “Jimboetakua Tata Diosï, uékasïnga míteni nani jarhaski papa”. Ístuni kurhakusïrenga eskarini jarhuatapiringa kurhanguni andijtsïnisï kueraa.

Engani 13 uéxurhini jatiripka uénaspka jorhenguarhini alemani jimbokani eratsespka eskani exeantapiringa mókuntskuechani engani jirinhantani japka imani libruecheri engaksï alemani jimbo jaka. Ka uéxurhini 1967 jimbo niraspka jorhenguarhini ireta Jena, jini enga jindeepka Alemania orientali. Iámu arhiantaspka ima libruechani engaksï alemani anapu filosofuecha karaka, sánderia imeecha engaksï uandajka andisï jaki kʼuiripu. Peru nájkirukani ambakiti ambe exentapka, nóreni ma mókuchintaspti ambe engani kurhamarhikuarhienga. Jimbosïni seguiripka kurhakuni Tata Diosïni eskarini jarhuatapiringa exeantani.

NA ENGARENI BIBLIA MÓJTAKUCHEKA IREKUA

Uéxurhini 1970 jimbo, kʼuanhatsentaspka Hungría ka jima mítespka imani enga juchiiti uarhiitipiringa, Rose. Imani tiempu jimbo, Hungría komunistechaksï juramuxapti, ísï jimbo sánisï tátsekua engachi temungurhiripkia niraspkachi Austria. Ka ménderu jima uératini Sydney, Australia, nipiringachi jima enga irekapka ma juchiiti tiu.

No ióni jimbo uénaspka ánchikuarhini jini Austria. Ma jurhiatikua, ánchikuarhitarhu anapu kompanierurini arhispti eskarini Biblia úpiringa mókuchiantani iámindu kurhamarhikuechani ka íntsasptireni tsimani libruecha engaksï Biblieri ambe uandaenga. Sóntkuni arhiantaspka, peruni uékasïreenga sánderu míteni, ísï jimbosïni karakuapka imeecha engaksï uápka libruechani, Jeobaeri testiguechani ka kurhakuaspka sánderu publikasionichani.

Jiáni engachi ma uéxurhini andangutapkia temungurhirini pʼorhembisptijtsïni tumbi ma enga Testiguepka. Juáchiasptireni publikasionicha engani kurhajkuarhiapka ka arhisptirini sini uékasïreenga jorhenguarhini Biblieri ambe. Sóntkuni arhispka eska jo. Uékaxapka jorhenguarhini Biblieri ambe, jimbosïni mándani semana tsimani uelta jorhenguarhienga, ¡ka mándani uelta kuatru orachisï durarisïrenga!

Kánikuani tsípini pʼikuarherasïrenga imani ambe jimbo engajtsïni Testiguecha jorhendani japka Biblieri ambe. Engajtsïni exerapka Tata Diosïri nombrini juchiiti Bibliarhu enga úngaro jimboeka, no úsïreenga jakajkuni. Misarhu niraspkia 27 uéxurhini ma ka no méni kurhaaxapka indeni nombri: Jeoba. Ískuni pakaraspka engani exepka na enga Biblia sési mókuantapka imani kurhamarhikuechani engani jatsiapka. Ma ambe engani jorhenguarhipka jindeesti eskaksï uarhiricha no ma ambe míteska, eska ísïiska enajkiksï uinhamu kʼuíni japiringa (Eclesiastés 9:5, 10; Juanu 11:11-15). Ístuni jorhenguarhispka eska jauaka jimbanhi parhakpini ma jima enga ʻnóteru jauakia uarhikuaʼ (Jaŋaskuecha [Apocalipsis] 21:3, 4). Iásïni mintsikasïnga eska jauaka tsíntskua, jimbanhi parhakpinirhu ka eskani uaaka ménderu exeni juchiiti taatini (Ukuecha [Hechos] 24:15).

Roserini méntkisï apoiarispti ka ístu uénaspti jorhenguarhini jíndeni jingoni Biblieri ambe. Sóntkuchi mójtakuspka máru ambe ka tsimani mesi jimbochi kʼamaraspka jorhenguarhini publikasionini. Iámu tánguarhikuecharhuchi nirasïrenga engaksï Jeobaeri testiguecha jatsienga; ískujtsïni pakatasïrendi na engaksï xáni xénchperaenga, sési kámberenga ka májku kʼéri jarhenga (Juanu 13:34, 35).

Uéxurhini 1976 jimbo, sésikuachi intsïnhaspka para mótsini Australia. Engachi na niárapkia, jirinhantaspkachi Testiguechani ka ísïjtsïni pʼikuastasti enajkichi familia jingoni japi. Ka 1978 jimbo Jeobaeri testiguchi úkuarhispka.

NÁKI KÓNTPERATECHANI INTSÏNHAASKIA

Úspkia exeantani mókuntskuechani ima kurhamarhikuecheri engajtsïni xáni ióni uandanhiatapkia. Ka ístuni exentaspka xáni ambakiti Taatini ma enga jaka: Jeoba (Santiagu 4:8). Ka iásïni jatsiskia erokuarhikua para ménderu exeni juchiiti taatini, paraisurhu engajtsïni Tata Diosï aiachini jaka (Juanu 5:28, 29).

Uéxurhini 1989 jimbo, kʼuanhatsentaspkachi ménderu Hungría para aianguani imeeri ambe engachi jakajkujka, juchaari parientichani, amiguechani ka máteru kʼuiripuechani. Úskachia jorhendaani uánikua kʼuiripuechani ka jukariksï setenta niárastia Jeobaeri testigueni, ka ma jindeesti ima engani xáni xénchajka, juchiiti nándi.

Kómarhispkia Tata Diosïni 17 uéxurhini ma ka ístu kurhakusïrenga eskarini mókuchiantapiringa kurhamarhikuechani engani jatsiapka, ka 39 uéxurhini ma nitamastia desde engareni mókuchiantakia iámindu. Asta iásï jamberini seguirisïnga kómarhini Tata Diosïni, peru iásï ambe engani arhijka jindeesti: “Diosmaiamu juchiiti Taati auandarhu anapuni, jimbokarini mókuchiantaska kómarhikuechani engakeni desde tumbitku úchienga”.