¡MÉNTKISÏ JINGONTKU JA JE!
Relijioni apoiarixati guerrani enga Ucrania úkuarhini jaka | ¿Ambe uandasïni Biblia?
Exe je ambe enga xáni karanhaka imeeri ambe engaksï relijioniri orhejtsïkuticha uandaka guerreri ambe enga Ucrania úkuarhini jaka.
“Patriarca Kirill, enga Rusia anapu Iglesia ortodoxani orhejtsïkujka, no uandasti eska no sési jarhaska enga Rusia uarhipeni jaka Ucrania jingoni [...]. Na enga imeeri Iglesia méntku no sési ambe uandani jarhajka Ucranieri ambe, úsïndi eska Putin uandaaka eska no no sési jarhaska enga guerra úkuarhini jaka” (EUobserver, 7 de marsu de 2022).
“El patriarca Kirill [...] uandasti eska i guerra Ucrania jingoni jindeeska para kʼamajkuni pekaduni. I uandakuecha jingoni sánderu xarhatasti eska ima ísï exesïnga eska no no sési jarhaska enga Rusia inchaakuka Ucrania” (AP News, 8 de marsu de 2022).
“Metropolitano Epifanio I de Kiev, enga Ucrania anapu Iglesia ortodoxani orhejtsïkujka, i lunesï újchakurasti iretani ka arhiasti paraksï uarhipeni Rusia anapuecha jingoni engaksï inchaakuka. Ístu uandasti eska no pekadueska Rusia anapu sondaduechani uándikuani” (The Jerusalem Post, 16 de marsu de 2022).
“Apoiarisïngachi Ucrania anapu Ejersituni ka iámindu imeechani engajtsïni kuájpini jaka. Újchakurasïngachi na engaksï xáni jánguarhintani jaka kuájpini Ucraniani ka ístuchi kómarhijpikuasïnga” (Declaración del Consejo de Iglesias y Organizaciones Religiosas de Ucrania,a 24 de febreru de 2022).
¿Nájtsï exesïni? ¿Sési jarhaski eskaksï Iglesiecha engaksï uandajka eska Kristuni chúxapasïnga arhiauaka kʼuiripuechani paraksï nirani guerrarhu? ¿Ambe uandasïni Biblia iiri ambe?
Na enga desde iónisï relijioni apoiariuajka guerrechani
Desde iónisïa, uánikua Iglesiecha engaksï uandajka eskaksï jánguarhintaxaka úni ambe ma paraka pínandikua jauaka, apoiariuasïndiksï guerrechani ka uandanksï eska sési jarhaska o astaksï jarhuajpeni paraka úkuarhiaka guerrecha. Jeobaeri testiguechaksï iónisï uandantastia na engaksï relijionicha no ísï újka na engaksï uandajka. Exe je ambe engaksï uandajka máru juchaari publikasionicha:
Artikulu “Las cruzadas: ‘trágica ilusión’” uandasïndi eska Iglesia katolika Roma anapu, úspka eskaksï uánikuechani uándikuapiringa, uandaparini eskaksï ísï úxapka Tata Diosïni jimbo ka Kristuni jimbo.
Artikulu “La Iglesia Católica y África” xarhatasïndi eska relijioni no ma ambe úspka parakaksï tribuecha no uarhiperapiringa ka parakaksï no uándikuapiringa xáni uánikua kʼuiripuechani imeecheri rasa jimbo.
Artikuluecha “¿Tiene la culpa la religión?”, “El papel de la religión en las guerras” ka “La religión toma partido”, uandasïndiksï eskaksï jarhaska relijionicha engaksï guerrarhu apoiariuajka imani tsimani grupuechani engaksï jupiperajka ka máru i relijionichaksï jindeesti katolika, ortodoxo ka protestante.
¿Jatsipirinksï para apoiariuani guerrechani ima relijionicha engaksï uandajka eskaksï Kristuni chúxapasïnga?
Ambe enga Jesúsi jorhentpipka: “Uékaakari máteruni eskari tʼujkumindu na uékakuarhijka” (Mateu 22:39) “Uéa je chaari ikiatspitichani” (Mateu 5:44-47).
Eratsi je arini ambe: Enga relijioni ma uandajka eska kurhajchasïnga Jesúsiri juramukuani enga jindeeka uékaani máteruechani, ¿sési japirini para arhiani kʼuiripuechani eskaksï niuaka guerrarhu? Parajtsï míteni, arhianta je arhini artikuluechani “Los cristianos verdaderos y la guerra” ka “¿Es posible amar a un enemigo?”.
Ambe enga Jesúsi jorhentpipka: “Juchiiti juramukua no ini parhakpini [anapuesti]. Enga juchiiti juramukua ini parhakpini [anapuepiringa], juchiiti jántspiricha jupirindi ka uarhipepirindiksï para eskani ji no entregarpinhapiringa” (Juanu 18:36). “Jimboka iáminduecha engaksï espada jimbo atajpiaka, espada jimbo uarhiakaksï” (Mateu 26:47-52).
Eratsi je arini ambe: Engaksï Jesúsiri chúxapaticha no jatsipka para úrani arma ma ni paraksï imani kuájpini, ¿sési japirini úraani para máteru ambe? Parajtsï míteni na engaksï primeru kristianuecha meru ísï úpka eska Jesúsi ka na enga ima jorhentpipka, arhinta je artikuluni “El cristianismo y la guerra: ¿son compatibles?”.
¿Ambeksï úkuarhinchaa relijionicha engaksï apoiariuajka guerrechani?
Biblia uandasïndi eska Tata Diosï no jaiapanheantasïnga imani relijionichani engaksï uandajka eskaksï ísï úsïnga eska Jesúsi na jorhentpipka, joperuksï máteru ambe úni (Mateu 7:21-23; Titu 1:16).
Libru Jaŋaskuecha uandasïndi eska Tata Diosï exesïnga eskaksï relijionicha kulpa jatsiska iámindu imeecheri “engaksï parhakpinirhu uándikunhajka” (Jaŋaskuecha 18:21, 24). Engajtsï uéjka sánderu ambe míteni, exe je artikuluni “¿Qué es Babilonia la Grande?”.
Jesúsi uandasti eska Tata Diosï kʼamajkuauaka iámindu relijionichani enga ima no jaiapanheantajka jimboksï no sési jásï ambe úska, ísï eska anhatapu tererini ma enga fruta tereri jukajka na ‘chʼapanhajka ka chpirirhu kʼuanijpanhani’ (Mateu 7:15-20). Engajtsï uéjka míteni na enga úkuarhiaka i ambe, arhinta je artikuluni “¡Se acerca el fin de la religión falsa!”.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a I grupu 15 Iglesiecha jimbo úkata jarhasti, máruksï jindeesti Iglesia ortodoxa, Roma anapu Iglesia katolika, Grecia anapu Iglesia katolika, iglesia protestanticha ka ebanjelikuecha, ka máru grupu judiuecheri ka musulmanicheri.