Ambe enga kurhanguarhijka ima enga arhintajka

Enga Satanasi arhipka Ebani eska no uarhipiringa enga apiringa anhatapueri frutani enga jindepka sési amberi ka no sési amberi, ¿jiáni uénaspi uandani eska alma no uarhisïnga, ambe ma enga iásï uánikua kʼuiripu jakajkujka?

Péringa nómbe. Noambakiti no arhispti Ebani eska enga apiringa frutani enga Tata Diosï arhiapka eskaksï no apiringa, eska solu imeri kuerpu uarhipiringa ka eska seguirini japiringa irekani imeri parti ma enga no xarharajka (ambe ma engaksï iásï arhijka: ánima). Akuitseni ma úraparini, Satanasi arhispti Ebani eska no uarhipiringa. Eska seguirini japiringa irekani ka eska sánderu ambakiti irekua ma jatsipiringa ixú Echerirhu ka eska no uétarhinchasïrenga Tata Diosïni (Gén. 2:17; 3:3-5).

Jiájkani enga no Jardini de Edenirhu uéraka i jorhentperakua enga no jurhimbitika eska alma no uarhisïnga ka engaksï iásï uánikuecha jakajkujka, ¿káni uéraski? Nóchi uáka uandani meru káni. Míteskachi eska relijioni no jurhimbiti jiáni kʼamakurhispka enga Kʼéri Janikua úkuarhipka Noeri jurhiatikuechani jimbo. Ka jimbokaksï jiáni solu Noe ka imeri familia tsípiti pakarapka, engaksï Tata Diosïni marhuakuenga, iámindu jorhentperakuecha engaksï no jurhimbitipka kʼamakurhisptiksï.

Jiájkani, iásï anapu jorhentperakua eska alma no uarhisïnga ísï tátsekua niárapti uérani enga Kʼéri janikua úkuarhipkia. Jiáni enga Tata Diosï úpka eskaksï kʼuiripuecha táchani jásï idioma uandapiringa jini Babeli, ka engaksï kʼuiripuecha interu parhakpinirhu etsakuarhipka, seguru eskaksï imani eratsikua jingoni nípka eskaksï kʼuiripuecha ánima ma jataska (Gén. 11:8, 9). Jimajkani, nóchi míteska káni meru uéraski i jorhentperakua enga no jurhimbitika. Ambe engachi kʼóru sési míteka jindesti eska Satanasi, “táti jemba chkuandiraricheri” kulpa jatsiska ka eska tsípiska enga i chkuandirakua iápurisï etsakuarhika (Juanu 8:44).