Ambe engachi jorhenguarhijka ima ambeeri enga Jakobu uandapka (parti 2)

1. ¿Ambechi exea ini artikulu jimbo?

IÁMINDU Jakobueri uájpeechaksï jingontku kurhaani jarhasïndi ambe enga ima uandontskuarhekuani jarhajka. Ka eskachi na exekia máteru artikulu jimbo, jamberiksï máteruecha no erokuarhini japti eska Jakobu ísï arhipiringa Rubénini, Simeónini, Lebíni ka Judáni, ísï jimbo, jamberiksï eratsepti “¿ka jíndeni ambe arhiaia?”. Ju je exeni ambe engachi jorhenguarhijka ima ambeeri enga Jakobu arhipka Sabulónini, Isakarini, Danini, Gadini, Aserini, Neftalíni, Joséni ka Benjamínini.a

SABULÓNI

2. ¿Ambe uandaspi Jakobu Sabulóniri ambe ka néna niáraspi ísï úkuarhini? (Génesis 49:13; ístu exe je rekuadruni).

² (Arhinta je Génesis 49:13). Jakobu uandaspti eska Sabulóniri familia marirhu uanamukutenisï irekapiringa, jo, norterhisï imani Echerirhu engaksï Aiaminhapka. Ka i ambe ísï úkuarhispti jukari 200 uéxurhini tátsekua, jimboka Sabulóniri tribu imani echerini pʼíkuspka enga Galilea anapu marirhu ka mari Mediterráneo terujkanikuarhu japka. Ka ístu Moisési ísï uandaspti Sabulóniri ambe: “Tsípi t’u Sabulóni engari niuaka nani” (Deut. 33:18). Enga Moisési ísï uandapka, jamberi arhikuekani japti eska Sabulóniiri tribu úpiringa piákuani ambe ma máteru ireteechani ka ístu atarakuantani jimboka indeni tsimani maricharhu terujkani pakaraspka.

3. ¿Ambejtsïni jarhuataa parachi méntkisï tsípikua jingoni jámani?

³ ¿Ambechi jorhenguarhisïni? Eskachi méntkisï jatsiska para tsípikua jingoni jámani nani uéjkichi irekani jarhani o ambe uéjkichi nitamakuarhini jarhani. Jatsiskachi para sési p’ikuarherani imani ambe jingoni engachi jatsikuarheka ka ísïchi méntkisï tsípikua jingoni irekaaka (Sal. 16:6; 24:5). Jamberichi ménisï no konformi jauaka imani ambe jingoni engachi jatsika jimbokachi méntku eratseni jauaka ambe engachi uékapiringa jatsini. Ísï jimbo, ju je jánguarhintani sánderu jukaparharani imani ambe engachi jatsikuarheka (Gal. 6:4).

ISAKARI

4. ¿Ambe uandaspi Jakobu Isakariiri ambe ka néna niáraspi ísï úkuarhini? (Génesis 49:14, 15; ístu exe je rekuadruni).

⁴ (Arhinta je Génesis 49:14, 15). Jakobu felisitariispti Isakarini jimboka uinhamu ánchikuarhisïreenga ka terukutantaspti burru ma jingoni enga kʼuetsapiti ambe pájka ka uíuinhasïni. Ístu uandaspti eska Isakari ambakiti echeri ma jimbo irekapiringa, ka inde ambe ísï úkuarhispti jimboka Isakariiri familia jimeesïsï intsïnhaspka echerini enga iurhekua Jordáni japka ka enga uánikua ambe ueenga jukani (Jos. 19:22). Imeechaksï kánikua jánguarhintapti paraksï ánchitaani echerichani ka ístu paraksï jarhuataani máteruechani (1 Rey. 4:7, 17). Pori ejemplu, jiáni enga Baraki ka Débora arhiapka israeliteechani eskaksï jarhuataapiringa uarhipeni Sísara jingoni, Isakariiri familia jindeespti ma tribu enga nípka jarhuataani (Juec. 5:15).

5. ¿Nénachi uaa májkueni úni eska Isakariiri tribu ka andi?

⁵ ¿Ambechi jorhenguarhisïni? Tata Diosï Jeoba kánikua jukaparharasïreendi ambe enga Isakariiri tribu xáni ueenga. Ísï jimbo, ima kánikua jukaparharasïndi engachi xáni jánguarhintajka marhuakuni (Ecl. 2:24). Pori ejemplu, ju je eratseani orhejtsïkutiichani engaksï jánguarhintajka kuájchakuani kúnguarhikuarhu anapuechani (1 Tim. 3:1). Nájkirukaksï imeecha no uarhipejka para kuájchakuani Tata Diosïiri marhuariichani, kʼóruksï jánguarhintasïndi jarhuataani paraksï seguiriini sési pájperani Tata Diosï Jeoba jingoni (1 Kor. 5:1, 5; Jud. 17-23). Ka ístuksï kánikua jánguarhintasïndi preparariuani ka nitamataraani diskursuechani engaksï sési pʼikuastaantajka ka uinhaperaantani kúnguarhikuarhu anapuechani (1 Tim. 5:17).

DANI

6. ¿Ambe úpirini Daniiri tribu? (Génesis 49:17, 18; ístu exe je rekuadruni).

⁶ (Arhinta je Génesis 49:17, 18). Jakobu uandaspti eska Dani ísïipiringa komueska akuitsi ma ka úpirindi andani kabaiuni ka imani enga jatarini japiringa. Jo, i tribu no sáni chéparini uarhipepirindi Israeliiri ikiatspitiicha jingoni. ¿Néna niáraspi ísï úkuarhini? Jiáni enga Israeli inchaakuni japkia imani Echeri jimbo enga Aiaminhapka, Daniiri tribu “tátsepaxapti” para kuájchakuni iámu iretani (Núm. 10:25). Ka kánikua jukaparhakuespti ambe enga Daniiri tribu úni japka nájkirukaksï máteruecha no exeni japka.

7. Méntkisï engachi uaaka ambe ma para Tata Diosï Jeoba, ¿ambechi jatsiski para miáni?

⁷ ¿Ambechi jorhenguarhisïni? Eska Tata Diosïiri iretarhu uánikua ambe jarhaska para úni nájkiruka no xarharajka. Pori ejemplu, aseu úni ka arreglariini Kʼumanchikua Reinuerini o jarhuajpeni jima engaksï kʼérati tánguarhikuecha úkuarhijka o máteru naniisï. Enga chá jarhuajpejka ini ambe úni, uékasïngaksïni felisitariini jimbokajtsï sési úxaka. Ka asï mirikurhi je eska Tata Diosï Jeoba exexaka ka eska kánikua jukaparharasïnga ambe engajtsï chá újka imani jimbo. Ima kánikua jukaparharasïndi indeni ambe jimboka míteska eska chá xénchasïnga ka jimbojtsïsï ísï újka ka no parajtsï k’éri ambe exenhani (Mat. 6:1-4).

GADI

8. ¿Andisï xáni fásiliipi eskaksï Gadi anapuechani no sési ambe úkuapiringa? (Génesis 49:19; ístu exe je rekuadruni).

⁸ (Arhinta je Génesis 49:19). Jakobu uandaspti eskaksï Gadini euakuarhipiringa ambe. Jukari 200 uéxurhini tátsekua, i tribu jimeesïsï pʼíkuspti echerini enga riu Jordáni japka, este ladu jimbo nani engaksï Israeliiri enemiguecha irekapka. Ka i ambe úpirindi eskaksï fásilku euakuarhiapiringa ambe. Joperuksï Gadi anapuecha tsitispti jima irekani jimboka kánikua uitsakua jukasïreenga para imeecheeri animaliicha (Núm. 32:1, 5). Gadi anapuechaksï no sáni chésïreendi, jimbokaksï mintsikasïreenga eska Tata Diosï Jeoba jarhuataapiringa paraka no nema euakuarhiapiringa imani echerini enga Tata Diosï íntsaapka. Uánikua uéxurhini jimbo, axasptiksï imeecheeri sondaduechani máteru ladu Jordánirhu paraksï jarhuataani máteru tribuechani andapiti uérani ka ísïksï jatsini iámu Echerini engaksï Aiaminhapka (Núm. 32:16-19). Imeechaksï seguru jarhaspti eska Tata Diosï Jeoba kuidariuani japiringa imeecheeri témbeechani ka sapiichani. Ka Tata Diosï Jeoba kánikua kóndeantaspti jimbokaksï no chéspka jarhuajpeni nájkiruka no fásiliipka (Jos. 22:1-4).

9. Engachi mintsikajka Tata Diosï Jeobani, ¿ambechi uaa?

⁹ ¿Ambechi jorhenguarhisïni? Eskachi jatsiska para méntkisï mintsikani Tata Diosï Jeobani asta jiáni jamberi enga no fásiliuaka (Sal. 37:3). Iásï uánikua erachiichaksï nirasïndi jarhuajpeni konstruksionirhu, mótsisïndiksï jima engaksï sánderu aianhpiricha uétarhini jarhajka oksï máteru ánchikuarhita ma úni Jeobaeri kúnguarhikuarhu. ¿Andiksïsï ísï újki? Jimbokaksï mintsikasïnga eska Tata Diosï Jeoba méntkisï kuidariuauaka (Sal. 23:1).

ASERI

10. ¿Ambe no sési úspi Aseriiri tribu? (Génesis 49:20; ístu exe je rekuadruni).

¹⁰ (Arhinta je Génesis 49:20). Jakobu uandaspti eska Aseriiri familia jatsikuarheriipiringa ka ísï úkuarhispti. Imeri familia imani echerini pʼíkuspti nani enga mámaru ambe ueenga tsikini (Deut. 33:24). Ima echeri enga Aseri pʼíkupka mari Mediterráneoisï eraaxapti ka ístuksï pʼíkuspti Fenisiani enga Sidóni japka; jimaksï kʼérati barkuecha niárasïreendi. Joperu Aseriiri tribu no sési úspti jimboka jurajkuspka eska Kanaáni anapuechaksï útasï jimeesïsï irekani japiringa ka Aseriiri tribu ueenaspti ísï jámani eska imeecha (Juec. 1:31, 32). Ka ístu jimbokaksï sési nikuaxapka sentabu jimbo, nóteruksï xáni tsípikua jingoni marhuakuxaptia Tata Diosï Jeobani. Ka jiáni enga Baraki arhiapka israeliteechani eskaksï nipiringa jarhuatani paraksï uarhipeni Kanaáni anapuecha jingoni, Aseriiri tribu no niraspti. Ísï jimbo, nóksï exespti na enga Tata Diosï Jeoba jarhuataapka israeliteechani paraksï andapiti uérani “jimeesïsï enga Meguidó anapu itsï jaka” (Juec. 5:19-21). Ka kʼuratsekua jingonksï pakaraspti jimboka Tata Diosï Jeoba úspka eska Baraki ka Débora pirekua ma úntapiringa enga arhienga: “Aseri ísku jarhaspti uaxakatini marirhu uanamukutenisï ka no ma ambe úspti” (Juec. 5:17).

11. ¿Andichisï no jatsi para sánderu jukaparharani sentabuni?

¹¹ ¿Ambechi jorhenguarhisïni? Eskachi jatsiska para sánderu jánguarhintani sési marhuakuni Tata Diosïni. Ka no ísï eratseni eska parhakpini anapuecha engaksï sánderu jukaparharajka sentabuni ka agustu uékani irekani (Prov. 18:11). Ka nájkirukachi uétarhinchajka sentabu, nóchi jatsiska para sánderu jukaparharani indeni ambe (Ecl. 7:12; Ebr. 13:5). Jatsiskachi para sánderu jánguarhintani Tata Diosï Jeobani marhuakuni ka no ísku jatini tsïtani tiempu ka uinhapikua para jatsikuarhekua ambe jatsini. Sánderu sési, jatsiskachi para mintsita jingoni jánguarhintani Tata Diosï Jeobani marhuakuni, mintsikaparini eska sánderu orhepatini ima uaaka eskachi sési irekaaka ka eskachi kánikua ambakiti ambe jatsiaka (Sal. 4:8).

NEFTALÍ

12. Ambe enga Jakobu arhipka Neftalíni, ¿jamberi néna niárapi ísï úkuarhini? (Génesis 49:21; ístu exe je rekuadruni).

¹² (Arhinta je Génesis 49:21). Jakobu uandaspti eska Neftalí “sési jásï ambe uandapiringa” ka peeka i ambe jiáni niárapka úkuarhini enga Jesúsi aianhpini jámani japka jimboka ima kánikua sési uandasïreenga ka sési jorhentpini (Juanu 7:46). Ka jimboka Jesúsi ióni jámaspka aianhpini Kapernaúmisï, imani ireta jimbo enga Neftalíiri echeri jimbo japka, Biblia uandasïndi eska Kapernaúmi Jesúsiiri ireteespka (Mat. 4:13; 9:1). Ístu Isaíasi uandaspti eska Jesúsi jindeepiringa “k’éri t’íntskua ma” para Sabulóni ka Neftalí anapuecha (Is. 9:1, 2). Jesúsi niáraspti jindeeni “ima tʼíntskua enga sési jimboeka, ka enga iámindu jásï kʼuiripuechani erajkutaraajka” jimboka kánikua sési jorhentpisïreenga (Juanu 1:9).

13. Engachi uéjka sési pʼikuastani Tata Diosï Jeobani, ¿ambechi jatsiski para úni?

¹³ ¿Ambechi jorhenguarhisïni? Eska Tata Diosï Jeoba kurhaasïnga ambe engachi uandajka ka na engachi uandajka. Ísï jimbo, jatsiskachi para “sési uandani” engachi uéjka sési pʼikuastani Tata Diosïni. ¿Nénachi uaa ísï úni? Jatsiskachi para méntkisï jurhimbitku uandantani iámu ambe (Sal. 15:1, 2). Ístu, jatsiskachi para uinhaperaantani máteruechani ka méntkisï jánguarhintani felisitariuani jimbokaksï sési ambe úsïnga ka no uandatsiani jámani o uandauandamini jarhani (Éfes. 4:29). Ístuchi jatsiska para jirinhakuntani nénachi uaa sánderu sési uandontskuarhekuani kʼuiripuechani Biblieri ambe.

JOSÉ

14. ¿Néna kumplirikuarhispi ambe enga Jakobu uandapka Joséeri ambe? (Génesis 49:22, 26; ístu exe je rekuadruni).

¹⁴ (Arhinta je Génesis 49:22, 26). Jakobu kánikua tsípini japti Joséni jimbo, jimboka Tata Diosï Jeoba imani erakuspka ka no ermanu jémbeechani. Jakobu uandaspti eska José “anhatapueri tsikintskua máespka enga kánikua fruta jukajka”. Jakobu jindeespti inde anhatapu ka José ísïispti komueska ima tsikintskua enga anhatapurhu uéxkurhipka. Jakobu, Joséni ueenaspti kánguarhini Rakeli jingoni, ka Jakobu kánikua xénchasïreendi Rakelini. Nájkiruka Jakobu Rubénini ueenapka kánguarhini Lea jingoni, uandaspti eska José p’ípiringa imani erensiani enga Rubéni tsïtakuarhipka. (Gén. 48:5, 6; 1 Crón. 5:1, 2). I profesia niáraspti ísï úkuarhini jiáni enga Efraíni ka Manasési, José uájpeecha, niárapka pʼíkuni erensiani komueska mándani Israeli anapu tribu (Gén. 49:25; Jos. 14:4).

15. ¿Ambe úsïreeni José enga no sési nitamakuarhini jarheenga?

¹⁵ Jakobu ístu uandaspti eskaksï máru kʼuiripuecha engaksï arku jingoni uarhipejka “kʼuaniraspka [Joséni] jimbokaksï ikiakusïreenga” (Gén. 49:23). Ka ermanu jémbeechanisï arhikuekaani japti, jimbokaksï antesi enbidiarikusïreenga Joséni ka no sésiksï kámani. Joperu José no ikiakuaspti ni ermanu jémbeechani nijtu Tata Diosï Jeobani. Sánderu sési, ísï úspti eska Jakobu na uandapka: “Ima sési jupikatixapti arkuni, jimbosï méntku no sáni manajkurapti ka uíuinhajkuraspti ka méntku jini ka jini manataasïreendi jájkiichani para kʼuanirani” (Gén. 49:24). Enga Joséni no sési nikuni jarheenga, ima méntkisï mintsikasïreendi Tata Diosï Jeobani ka no solu puákuantaspti ermanu jémbeechani, sino ístu sési kaaspti (Gén. 47:11, 12). José jurajkuspti eskaksï tsʼéjkukuecha jarhuatapiringa sánderu ambakiti kʼuiripu máeni (Sal. 105:17-19). Ísï jimbo, Tata Diosï Jeoba uánikua ambe úraspti.

16. ¿Nénachi uaa májkueni úni eska José engachi no sési nitamakuarhini jauaka?

¹⁶ ¿Ambechi jorhenguarhisïni? Eskachi no jatsiska para jurajkuni Tata Diosï Jeobani nijtu erachiichani na uéjkichi no sési nitamakuarhini jarhani. Ju je miáni eska Tata Diosï Jeoba jurajkusïnga eskachi no sési nitamakuarhiaka jimbokajtsïni uékasïnga jarhuatani o arhistachini ambe ma parachi ambakiti kʼuiripu máeni (Ebr. 12:7, nota). Tata Diosï Jeobajtsïni jarhuatasïndi parachi ambakiti kualidadiichani jatsiani o sánderu sési xarhataani komu sánderu pʼamojpeni ka puátspentani (Ebr. 12:11). Ka ísï eska Joséni na kóndentapka, juchajtuchi seguru jarhaska eskajtsïni Tata Diosï Jeoba kóndentaaka jimbokachi tekaantasïnga.

BENJAMÍNI

17. ¿Néna úkuarhispi ambe enga Jakubu uandapka Benjamíniri ambe? (Génesis 49:27; ístu exe je rekuadruni).

¹⁷ (Arhinta je Génesis 49:27). Jakobu orheta uandaspti eskaksï Benjamíniri triburhu anapuecha no sáni chéparini uarhipepiringa, eskaksï ísïipiringa komueska lobu ma (Juec. 20:15, 16; 1 Crón. 12:2). Tátsekua úraspti arini uandakuechani “tsípa” ka “inchatiru”. Enga uandapka “tsípa” imanisï arhikuekani japti engaksï ueenapka jarhani reiicha Israeli, ka Saúli enga niárapka orheta reini, Benjamíniri triburhu anapuespti ka no sáni chéspti uarhipeni filisteuecha jingoni (1 Sam. 9:15-17, 21). Ka enga uandapka “inchatiru”, arhikuekaxapti ambe enga úkuarhipka ísï ióni tátsekua enga nóteru ma rei japkia Israeli, jiáni enga Esteri ka primu jémba Mardokeu no jurajkupka eskaksï Persia anapuecha kʼamajkuapiringa israeliteechani. Esteri ka Mardokeu ístuksï Benjamíniri triburhu anapuespti ka nóksï chéspti jarhuatani Tata Diosïiri iretani (Est. 2:5-7; 8:3; 10:3).

18. ¿Nénachi uaa májkueni úni eska Benjamíniri tribu?

¹⁸ ¿Ambechi jorhenguarhisïni? Jiáni enga Tata Diosï Saúlini erakupka para reiini, Benjamíniiri anapuechaksï kánikua tsípini japka jimboka ísï úkuarhispkia eska Jakobu na uandapka. Joperu tátsekua, Tata Diosï Jeoba Dabidini erakuspti para reiini enga no Benjamíniri triburhu anapuepka, joperu Benjamíniri tribu sési exespti enga Tata Diosï Jeoba mójtakupka indeni ambe (2 Sam. 3:17-19). Ka ísï tátsekua, engaksï diesi tribuecha nóteru uékapkia kurhajchani Judá anapu reini, Benjamíniiri tribueri anapuechaksï seguirixapti kurhajchani imani reiini enga Tata Diosï Jeoba erakupka (1 Rey. 11:31, 32; 12:19, 21). Iásïjtu Tata Diosï Jeoba achamasïichani erakuasïndi paraksï orhejtsïkuni imeeri iretani, ísï jimbo, ju je jarhuataani ka kurhajchaani ísï eska Benjamíniri tribu na úpka (1 Tes. 5:12).

19. ¿Ambechi xáni jorhenguarhiski ima ambeeri enga Jakobu uandapka ante de uarhini?

¹⁹ Uánikua ambechi jorhenguarhiska ima ambeeri enga Jakobu uandapka ante de uarhini. Exeni na enga inde ambe ísï úkuarhipka, jarhuatasïndijtsïni parachi sánderu mintsikani eskaksï Tata Diosïiri profesiecha ísï úkuarhiaka. Ka ístu engachi exejka na engaksï újchakuranhapka Jakobueri uájpeecha, jarhuatasïndijtsïni exeni ambe engachi jatsika para úni parachi sési pʼikuastani Tata Diosï Jeobani.