EKSPERIENSIA
Juchaari K’éri Jorhentpirijtsïni méntku jorhendaxapti
MÁMARU ambechi nitamakuarhiska juchiiti uarhiti jingoni engachi prekursoriipka ka misionerueni. Sondaduechaksï jarhasïreendi karreterecharhu, xanharuecha míkuarhetini jarhani ka kurhini jarhanksï, urakaniicha ka guerrecha; ka ma xanharichi jatsispka para sïpakuarhini ka uánikua máteru ambechi nitamakuarhiska. Joperuchi no jurajkupiringa marhuani komu prekursori o misioneru. Iámindu ini uéxurhiniichani jimbo Tata Diosï Jeobajtsïni jarhuatasti ka újchakurani. Ka ístujtsïni ambakiti ambe jorhendasti jimbokani ima jindeeska juchaari Jorhentpiri (Job 36:22; Is. 30:20).
JUCHIITI TAATIICHEERI EJEMPLU
Uéxurhini 1950 jimboisï, juchiiti taatiichaksï Canadá mótsispti Italia uératini, ireta sapichu ma jimbo enga Kindersley arhinhajka ka enga Saskatchewan jaka. No ióni jimbo, ueenasptiksï jorhenguarhini Biblieri ambe ka niárasptiksï kánikua jukaparharani. Miásïnga eska engani sapiipka, uánikua orachi aianhpisïreenga iámu familia jingoni. Jimbosïni ísku jatini uandajka eskani ochu jatiri ji tʼuini prekursori auksiliariispkia.
Juchiiti familia jingoni 1966 jimboisï.
Nájkirukaksï taatiicha sántku sentabu jatsipka, jánguarhintasïreendiksï úni ambe enga uétarhipiringa para Jeobani marhuakuni. Pori ejemplu, 1963 jimbo k’éri tánguarhikua internasionali ma úkuarhispti jini Pasadena (California, Estados Unidos). Ka jimbokaksï taatiicha uékasïreenga nirani, uánikua ambeksï atarantaspti. Parachi jorhendaani imani kʼuiripuechani engaksï italianu uandeenga, 1972 jimbochi mótsispka ireta sapichu ma jimbo enga ma 1,000 kilometrisï (620 millas) iauaniipka; arhinhasïndi Trail, Columbia Británica (Canadá). Juchiiti taati kʼéri tiendarhu ma ánchikuarhisïreendi para ambantskantani. Ka jimboka uékasïreenga sánderu sési marhuakuni Tata Diosï Jeobani no jiókuarhiaspti ánchikuarhiteechani para sánderu sentabu andani.
Kánikua agradesidu jarhaska indeni ejemplu jingoni engajtsïni juchiiti taatiicha íntskuka ka juchiiti tanimu ermanuecha. Imeecheeri ejemplujtsïni jorhendaspti parani Tata Diosïni marhuakuni ka ístujtsïni jorhendasti eskajtsïni Jeoba méntkisï kuidariuaka engachi orheta peeraska Tata Diosïiri Reinueri ambe (Mat. 6:33).
UEENASÏNGA MARHUANI TIEMPU KOMPLETUERI
Debbieni jingoni tembuchaspka 1980 jimbo, sési jásï pirenchi ma enga segura japka néna marhuakuni Tata Diosïni. Tsimarhanchi uékasïreenga tiempu kompletueri marhuani. Ísï jimbo. tanimu kutsï tátsekua engachi na tembuperapka, Debbie prekursora úkuarhispti. Ka ma uéxurhini tátsekua engachi na tembuperapkia, kúnguarhikua sapichu ma jimbochi mótsispka parachi jarhuajpeni aianhpini ka jíjtuni prekursori úkuarhispka.
Jiáni engachi tembuperapka 1980 jimbo.
Ísï tátsekua, chkétakuarhispkachi ka nóteruchi uékasïreengia jima jarhani. Ísï jimbo, sirkuitueri orhejtsïkuti jingonchi uandontskuarhespka ka imajtsïni xénchperakua jingoni arhispti: “Chájtsï mismu sánderu kʼéri úxaka problemani. Imani ambejkujtsïsï exeni jaka enga no sési jaka. Joperu engajtsï jánguarhintaska sési jásï ambe exeni, kuenta íntskukuarheakajtsï eska uánikua ambe jarhaska enga ambakitiika”. Meruchi indeni ambesï uékani japka kurhaani (Sal. 141:5). Jirejiresïchi ueenaspka ísï úni ka nóchi ióndaspka kuenta íntskukuarheni eska uánikua ambe sési jarhaspka. Uánikua kúnguarhikuarhu anapuechaksï jánguarhintaxapti sánderu sési marhuakuni Tata Diosï Jeobani, asta sapiicha ka ima pirenchiicha jamberi engaksï uámbeecha no Testiguepka. Jorhenguarhispkachi ambakiti ambe exeni ka mintsikani eska Jeoba sési peentaaka uandanhiatani jiáni enga ima sési exeaka (Miq. 7:7). Tsípintaspkachi ka iámindu ambe sánderu sési jarhasptia.
Engachi primeru xanhari nípka jorhentperakuarhu para prekursoriicha, tʼámu jorhentpirichaksï jarhaspti ka tanimuksï máteru paisiicha jimbo marhuaspti. Imajtsïni fotuechani exeraaspti ka aiangusptijtsïni ambe engaksï xáni nitamakuarhipka ka na enga Tata Diosï újchakuraapka. Inde ambe úspti eskachi juchajtu uékapiringa misionerueni. Ka uandaspkachi eskachi ísï úpiringa.
Columbia Británica Kʼumanchikua Reinuerirhu 1983 jimbo.
Ka 1984 jimbo, mótsispkachi Quebec enga jukari 4,000 kilometru (2,485 miia) iauani jaka Columbia Británica uératini. Jima fransesi uandanhasïndi, ísï jimbo, jatsispkachi para jorhenguarhini jimbanhi idioma ma ka ísï irekani eska imeecha. Joperu ístuchi someni no andangutasïreenga sentabu. Ma xanhari, acheetijtsïni ma jurajkuspti papasï úksïmani imeeri echeri jimbo. Indeni ambejkuchisï jatsipka para tʼireni, joperu Debbie jánguarhintasïreendi mámaru úmantani papasïni ka ásperani. Nájkirukachi indeni uandanhiateechani jatsiapka, jánguarhintaspkachi tsípikua jingoni tekaantani. Ístuchi úspka exekuarhini na engajtsïni Jeoba kuidariuenga (Sal. 64:10).
Ma jurhiatikua, uandajpanhaspkachi parachi Canadá anapu Betelirhu marhuani. Joperuchi t’uini uininharhitaspkia solisitudini para Galaadiiri Jorhentperakuarhu nirani ka nóchi jánhaskaxapka ambe úni. Joperu jiókuarhispkachi Beteli marhuani. Engachi na niárapkia Beteli, kurhamarhispka erachini Kenneth Little, enga Komiterhu japka para Canadá anapu Betelini orhejtsïkuni: “¿Ka ambe úkuarhia juchaari solisitudi jingoni para Galaadi?”. Ka imajtsïni arhispti: “Exeakachia indeeri ambe enga na niárakia tiempu”.
Ma semana tátsekua niáraspti inde tiempu enga Debbie ka ji pʼímarhinhapka Galaadi. Iásïchi jatsispkia para erakuni ambe úni, erachi Little arhisptijtsïni: “Ambe uéjkijtsï erakuni, ménisïjtsï eratseaka eska máteru pribilejiu sánderu sési japiringa. Joperu iáminduechaksï jukaparhakuesti, Jeoba uaati újchakurani náki uéjkini”. Ísï jimbo, jiókuarhispkachi para Galaadi nirani ka úspkachi exeni eska erachi Little sésisï uandani japka. Jimboka ambe engajtsïni ima arhipka, májkuenchi arhiasïreenga máteru erachiichani engaksï no jánhaskani jarheenga néna marhuakuni Tata Diosïni.
ENGACHI NA MISIONERUEPKIA
(Uikixkandani) Ulysses Glass
(Jurhijkandani) Jack Redford
Kánikuachi tsípispka Galaadi nirani máteru 22 erachiicha jingoni klase 83 jimbo enga abrilini úkuarhipka 1987 jimbo, Brooklyn (Nueva York). Imeecha engaksï sánderu jorhentpienga jindeesptiksï erachi Ulysses Glass ka Jack Redford. Sóntku nitamaspti 5 kutsï ka kʼamakurhispti 6 de septiembrini de 1987 jimbo. Haitíchi axanhaspka máteru temungurhiri jingoni, John ka Marie Goode.
Haití 1988 jimbo.
Haití nóteru ma misioneru jarhasptia desde 1962 ka ménderuni jucha ueenaspka axanhani. Tanimu semana tátsekua engachi na uéntapkia Galaadi, ueenaspkachi marhuani kúnguarhikua sapichu ma jimbo engaksï 35 aianhpiriicha japka, uánikua juáteechaksï jarhaspti jimeesïsï enga kúnguarhikua japka. Jucha sapichkuni jarhaspka ka uánikua ambechi jatsispka para jorhenguarhini ka ístu juchajkusïni irekani japka imani kʼumanchikuarhu enga jindeepka para misioneruecha. Haití anapuechaksï kánikua pobriispti ka sáno iáminduechaksï no mítespti arhintani. Imani tiempu jimbo engachi jima irekapka, uánikua problemechaksï jarhaspti politika jimbo, sondaduechaksï uékani kénditani juramutini, marcheecha, xanharuechaksï míkuarhetini jarhani ka kurhini jarhanksï, ka urakaniichani.
Uánikua ambechi jorhenguarhispka Haití anapu erachiicheeri jimbokaksï tekaantaxapka ka tsípikua jingonksï irekani nájkirukaksï no sési nitamakuarhini japka. Imeechaksï xénchasïreendi Jeobani ka tsitisïrendiksï aianhpini. Pirenchi ma enga jatiriipkia no jorhenaspti arhintani, joperu memoria jimbo jorhenguarhiaspti 150 tekstuechani. Ambe engachi pauani pauani exeenga, jarhuatasïreendijtsïni aianguani kʼuiripuechani eska Tata Diosïiri Reinujkusï uaaka kénditaani iámindu problemechani. Kánikuachi tsípini pʼikuarherasïnga jimbokaksï máru estudiantiicha niáraspti prekursori regulariini, espesialiini ka orhejtsïkutiini.
Haití, tumbini ma mítespka enga mormonicheeri misioneruepka ka enga Trevor arhinhajka. Úspkachi uánikua xanhari uandontskuarheni Biblieri ambe. Ka máru uéxurhini tátsekua, kartarini ma janochespti ka ískuni pakaraspka jimboka jima arhisïreenga: “Itsï atakuarhiakia máteru k’éri tánguarhikua jimbo. Uékasïnga kʼuanhatsentani Haití ka prekursori espesialiini imani lugari jimbo engani mormoniicheri misioneruepka”. Ka ísï úspti, uánikua uéxurhini marhuaspti jima imeeri témba jingoni.
EUROPA KA TÁTSEKUA ÁFRICA
Ánchikuarhixapka Eslovenia 1994 jimbo.
Ísï tátsekua, axanhaspkachi lugari ma jimbo jini Europa jimbokachi ménderu úpiringia aianhpini. Ka 1992 jimbo, niáraspkachi Liubliana (Eslovenia), jima no iauani engaksï juchiiti taatiicha kʼuiripepka. Jiánisï, guerra jarhaxapti jima enga antesi Yugoslavia arhinheenga. Ka Viena (Austria) anapu Beteli, Zagreb anapu ofisinecha (Croacia) ka Belgrado (Serbia) anapu Beteli, exexapti aianhpikuani imani lugari jimbo. Joperu tátsekua tʼámu paisiicha engaksï Yugoslavia jingoni kuenta úkuarhienga, mándani paisi niáraspti jatsikuarheni Beteli ma.
Ísï jimbo, jatsispkachi para ménderu jorhenguarhini jimbanhi idioma ma ka jimbanhi pʼindekua ma. Eslovenia anapuechajtsïni arhisïreendi: “Jezik je težek” enga arhikuekajka “Idioma úkua jukasti”, ka ísïispti. Joperuchi sési pʼikuarherasïreenga jimbokachi exeasïreenga erachiicha na engaksï no jurajkuenga Tata Diosïni ka tsípikua jingonksï úni ambe enga Tata Diosïiri kúnguarhikua arhiauenga. Exeskachi na enga Jeoba újchakuraaka indeni jimbo, ka ménderuchi úspka exeni eska ima méntkisï xénchperakua jingoni sési peentasïnga uandanhiata ma ka jiáni enga ima sési exeaka. Iámu inde uéxurhiniicha engachi Eslovenia irekapka, jarhuatastijtsïni no mirikurhini ambe engachi jorhenguarhipkia ka ístuchi jorhenguarhiska máteru ambe.
Ka ménderuchi máteru nani axanhasïnga. Uéxurhini 2000 jimbo, axanhaspkachi Costa de Marfil, jini África Occidental. Joperu guerra ma úkuarhispti indeni paisi jimbo ka nobiembri 2002 jimbo, móskunhaspkachi Sierra Leona nani enga apenasi kʼamakurhipka guerra ma enga 11 uéxurhini japka. Kánikua úkua jukaspti ma repentku uéakuntani Costa de Marfil, joperu ambe engachi jorhenguarhipkia jarhuatasptijtsïni seguiriini tsípikua jingoni marhuani.
Jánguarhintaspkachi exeni na engaksï kʼuiripuecha sési kurhauenga Tata Diosïiri ambe ka na engaksï xáni xénchpereenga erachiicha engaksï xáni ióni tekaantapka guerra jimbo. Nájkirukaksï pobripka, uékasïreendiksï intsïmpini ambe ma. Pirenchi ma uékasïreendi intsïkuarhini Debbieni takusï ambe. Joperu ueenakuarhu Debbie jánguarhintaspti iatsitakuarhu arhini eska nómbe, joperu pirenchi arhispti: “Enga guerra japka, máteru paisirhu anapu erachiichajtsïni kánikua jarhuataspti. Iásïchi jucha jatsiskia para jarhuajpeni”. I ambejtsïni jorhendaspti májkueni úni eska imeecha.
Ma tiempu tátsekua kʼuanhatsentaspkachi Costa de Marfil, joperuksï ménderu jarhaspti problemecha politika jimbo ka k’uiripuechaksï ueenaspti atajperani. Ísï jimbo, nobiembri de 2004, elikopteru jimbochi uéakuntaspka jima ka mándani kʼuiripu 10 kilujkusï (22 libra) úpti pákuarhini ambe engachi kánguarhini japka. Pisurhuchi kʼuíspka kuartelirhu ma enga Francia anapu ejersitu japka. Ísï pauandikuajtsïni abioni jimbo páspti asta Suiza ka terujkani chúrichi niáraspka Beteli. Ískuchi pakaraspka engachi exepka Grupuni enga Suiza anapu Betelini orhejtsïkujka, erachiichani engaksï jorhentpijka Jorhentperakuarhu de Entrenamientu Ministeriali ka témbeechani. Jimajtsïni erokaxapti, kamakamatasptijtsïni, jorhepiti t’irekuajtsïni íntskuspti ka kánikua chokolati jima anapu.
Arhijtsïkuaxati máru kʼuiripuechani engaksï máteru naniisï anapueka, Costa de Marfil 2005.
Ma tiempuchi Ghana axanhaspka, ka enga na ambandintapkia Costa de Marfili, ménderuchi jini kʼuanhatsentaspka. Jiáni enga xáni úkua jukapka, ka engachi méntku mótsini japka, kánikuajtsïni jarhuataspti erachiicheeri uékperakua. Debbie ka ji uandaspkachi eskachi sánderu jukaparharapiringia na enga Tata Diosï Jeobaeri kúnguarhikuarhu xénchperajka jimbokachi indeni ambesï sánderu xarhatajka. Ísï jimbo, inde uandanhiateecha engachi xáni jatsiapka jorhendasptijtsïni seguiriini marhuakuni Tata Diosïni.
MÉNDERUCHI TÁMISÏ AXANHASÏNGA PARA MARHUANI
Oriente Medioisï 2007 jimbo.
2006 jimbo, kartajtsïni ma niárachespti Beteli uératini nani engaksï Jeobaeri ánchikuarhitani exejka ka arhisïreendijtsïni parachi iásï Asia Occidental (Oriente Medio) marhuania. Jo, ménderuchi máteru uandanhiata jatsipiringia, uánikua ambe nitamakuarhini, máteru idioma ka kultura jorhenguarhini. Uánikua ambechi jatsispka para jorhenguarhini ima lugari jimbo enga politika ka relijioni kánikua uinhapikua jatsipka. Joperu ístuchi kánikua tsitispka enga kúnguarhikuecharhu japka erachiicha engaksï mámaru jásï idioma uandeenga ka engaksï májku k’eri úkuarhintatini japka jimbokaksï ísï úsïreenga eska Tata Diosïiri kúnguarhikua na arhiauenga. Ískujtsïni pakatasïreendi engachi exeenga na engaksï balori jingoni tekaanteenga nájkirukaksï no sési kánheenga familiarhu, eskuelarhu, ánchikuarhitarhu oksï besinuecha no sési kaani.
Ka 2012 jimbo, niraspkachi k‘eri tánguarhikua espesiali ma jimbo jini Tel Aviv (Israel). Nóchi no méni mirikurhiaka indeni jurhiatikua jimboka desde Pentekostesi uéxurhini 33 jimbo nóksï méni xáni uánikua Jeobaeri testiguecha tánguarhintaxapti indeni lugari jimbo.
Indeni uéxurhiniichani jimbo, axanhaspkachi para bisitarini paisini ma enga no sésikua jaka aianhpini. Paaspkachi máru publikasioniichani, uéraspkachi aianhpini ka niraspkachi máru k’éri tánguarhikuecharhu engaksï no uánikua tánguarhipka. Uápurisïksï jarhaspti soldaduecha ka reteniicha, joperuchi seguru pʼikuarherasïreenga jimbokajtsïni erachiicha pámbisïreenga parachi xéparini jámani.
K’UANHATSENTASÏNGACHI ÁFRICA
Arhijtsïkperata ma preparariixapka jini República Democrática del Congo 2014 jimbo.
Uéxurhini 2013 jimbo, máteru ánchikuarhitachi intsïnhaspka enga méntku ménderueni jásïipka. Pʼímarhinhaspkachi para Kinsasa anapu Betelirhu marhuani jini República Democrática del Congo. K‘éri ma paisi ma jimbo enga uápurisï kánikua sési jándeka joperu kʼuiripuechaksï kánikua pobriisti ka jukari atajperakua ambe jarhasti. Ueenakuarhuchi uandaspka: “Miiuskachia África jimbokachi irekaskia jima; míteskachia ambe engachi nitamakuarhiaka”. Joperu, útasteruchi uánikua ambe jorhenguarhipiringa. Pori ejemplu, néna jámani jimeesïsï engaksï no jaka xanharuecha ni puentiicha. Ka ístu na engaksï tsípikua jingoni marhuajka erachiicha nájkirukaksï pobriika, kánikuaksï tsitisïndi aianhpini ka nirani tánguarhikuecharhu ka kʼérati tánguarhikuecharhu. Úspkachi exekuarhini na enga Tata Jeoba újchakurani jaka paraka imeeri kúnguarhikua sánderu kʼéaka. Inde uéxurhiniicha engachi Congo-Kinsasa irekaaka, ambakiti ambejtsïni jorhendasti ka ístujtsïni jarhuatasti parachi niárani amiguechani jatsiani engaksï niáraka juchaari familieni.
Aianhpini jámaxapkachi Sudáfrica 2023 jimbo.
Uéxurhini 2017 kʼamarani jámani, pʼímarhinhaspkachi parachi Sudáfrica anapu Beteli jimbo marhuani. Inde jindeesti sánderu k’éri Beteli engachi jimbo niáraka marhuani. Ánchikuarhitachi ma intsïnhaspka engachi no méni úpka. Ísï jimbo, uánikua ambechi jorhenguarhipiringa ménderu, joperu ambe engachi jorhenguarhipkia ménderujtsïni kánikua jarhuataspti. Uánikua erachiichaksï jarhaspti jima engaksï ióni sési marhuakupkia Tata Diosï Jeobani ka kánikuachi xénchaasïnga. Nájkirukaksï uápurisï anapueka ka mámaru jásï pʼindekuechanksï jatsiani, ískujtsïni pakatasïndi exeni na enga familia Beteli sési pájperajka. Ka Tata Diosï Jeoba újchakuraasïndi ka pínandikua íntsaasïndi jimbokaksï mójtakurhiskia ka ísïksï irekasïndi eskaksï Bibliarhu anapu prinsipiuecha na uandajka.
Iámindu inde uéxurhiniichani engachi xáni marhuakukia Tata Diosïni, Debbie ka ji úskachi uápurisï marhuani, mámaru járhati pʼindekuechani jorhenguarhiani ka idiomechani. Ka nájkiruka no méntkisï fásiliipka, úskachi exeni Tata Diosï Jeobaeri uékperakuani ka imeeri kúnguarhikueri ka ístu erachiicheeri (Sal. 144:2). Ambe engachi xáni jorhenguarhikia desde engachi ueenaka marhuani tiempu kompletueri jarhuatastijtsïni sánderu sési marhuakuni Jeoba.
Kánikua jukaparharasïnga na engajtsïni kʼuiriperaka juchiiti taatiicha, na engareni apoiariika juchiiti uarhiti Debbie, ka iámu parhakpinirhu anapu erachiicheeri ejempluecha. Nani uéjkichi marhuani, eratsetixakachia seguiriini jarhani jorhenguarhini ambe engajtsïni arhistachiaka juchaari K’éri Jorhentpiri.