Chifukwa Icho Tikukhumbikwira Sembe Yakuwombora

1-2. Kasi tikukhumbikwira kuwomboleka ku vichi, ndipo chifukwa wuli? (Ŵaroma 7:​22-24) (Wonaniso chithuzi.)

GHANAGHANIRANI chakuchitika ichi. Nyumba yawa uku munthu wali mukati, viliŵa vyamugundumukira ndipo wakutondeka kuti wafumemo. Ngwamoyo, kweni wangafuma yayi kwambura kuti munyake wamovwira. Icho wangachitapo nkhuchemerezga waka chomene kuti munyake wamovwire na kumuponoska.

² Waliyose wa ise wali mu mukhaliro wanthena uwu. Munthowa wuli? Adamu wati wagalukira Yehova, wakazgoka wakwananga. Kufuma apo, kwananga uku wakapirako ŵana ŵake. Ivi vikapangiska kuti mtundu wose wa ŵanthu ukoleke na kwananga nga ni munthu uyo nyumba yamuwira. Ndipo nga ni munthu uyu, nase tikukhumbikwira munthu munyake kuti watiwombore. Mpositole Paulosi wakalongosora makora za kwananga uko tili kuhara mu kalata yake yakuluta ku Ŵaroma. (Ŵazgani Ŵaroma 7:​22-24.) Iyo wakapempha kuti wathaskike “ku thupi ilo likumutolera ku nyifwa iyi.” Paulosi wakakoleka na kwananga uko wakahara, ndipo wakaŵa kuti wangayigwentha yayi nyifwa. (Rom. 6:23) Nase tili mu mukhaliro wanthena uwu. Tikukhumbikwira kuwomboleka!

3. Kasi sembe yakuwombora yingatithaska wuli?

³ Paulosi wati wayowoya mukhaliro wakusuzga uwo wakaŵamo, wakatipaso chigomezgo. Wati wafumba kuti: “Ni njani wanithaskenge ku thupi ilo likunitolera ku nyifwa iyi?,” Paulosi wakajizgoraso kuti: “Nkhuwonga Chiuta kwizira mwa Yesu Khristu Fumu yithu!” (Rom. 7:25) Apa Paulosi wakang’anamuranga sembe yakuwombora ya Yesu.a Chifukwa cha sembe yakuwombora iyi (1) Yehova wangatigowokera zakwananga zithu, (2) tingachizgika ku kwananga na kuzakaŵaso ŵakufikapo, kweniso (3) tingaphemana na Mlengi withu. Kusambira fundo izi kutovwirenge kuti timutemwenge chomene Yehova, “Chiuta uyo wakupeleka chigomezgo.” (Rom. 15:13) Kutovwirengeso kuti timuwongenge chomene Yesu—“mwa mweneuyo tili kufwatulika kwizira mu chiwombolero.”—Kol. 1:​14, bi7.

CHIFUKWA CHA SEMBE YAKUWOMBORA TINGAGOWOKEREKA ZAKWANANGA ZITHU

4-5. Chifukwa wuli tose tikukhumbikwira sembe yakuwombora? (Mupharazgi 7:20)

⁴ Tikukhumbikwira sembe yakuwombora kuti tigowokereke zakwananga zithu. Munthu waliyose wambura kufikapo wakwananga, kwali nkhwizira mu vyakuyowoya panji vyakuchita. (Ŵazgani Mupharazgi 7:20.) Zakwananga zinyake zikuŵa zikuruzikuru. Mwachiyelezgero, Dango la Mozesi likatenge para munthu wachita uleŵi kweniso wakoma munthu, wakwenera kukomeka. (Lev. 20:10; Maŵa. 35:​30, 31) Nangauli kwananga kunyake kungaŵa kukuru yayi, kweni nkhwananga nipera. Mwachiyelezgero, wamasalimo Davide wakati: “Nipwelelerenge mendero ghane kuti nileke kwananga na lulimi lwane.” (Sal. 39:1) Nadi, nyengo zinyake ivyo tikuyowoya kungaŵa kwananga.—Yak. 3:2.

⁵ Ghanaghanirani ivyo mukachitapo kumanyuma panji ivyo mukayowoya. Kasi muli kuyowoyapo vinthu vinyake ivyo mukuwona kuti mphanyi mukayowoya yayi? Kasi muli kuchitapo vinthu ivyo mukudandaura navyo? Tikukayika yayi kuti zgoro linu pa mafumbo ghose ndakuti enya. Baibolo likuti: “Usange tikuyowoya kuti: ‘Tilije zakwananga,’ tikujipuluska tekha ndipo unenesko mulije mwa ise.”—1 Yoh. 1:8.

6-7. Kasi ntchivichi chikupangiska kuti chiŵe chamachitiko kuti Yehova watigowokere zakwananga zithu? (Wonaniso chithuzi.)

⁶ Sembe yakuwombora ndiyo yikupangiska kuti Yehova watigowokere zakwananga zithu. (Efe. 1:7) Ndipouli, ivi vikung’anamura kuti Yehova wakusulako waka yayi ivyo tamubudira nga kuti palije icho chachitika. Vikumukwiyiska Yehova para tikuchita kwananga. (Yes. 59:2) Pakuti Yehova ni murunji, wakeneranga wachitepo chinthu chinyake icho chingapangiska kuti waŵe na vifukwa vyakuti watigowokere zakwananga zithu.

⁷ Dango la Mozesi likakhumbanga kuti Ŵaisrayeli ŵapelekenge sembe za nyama kuti zibenekelere zakwananga zawo. (Lev. 4:​27-31; 17:11) Sembe izi zikaŵa muzgezge wa sembe yikuru ya Yesu na vitumbiko ivyo vikwiza. Nyifwa ya Yesu ndiyo yikapeleka chifukwa chakuti Yehova watigowokere zakwananga zithu. Ivyo Paulosi wakalembera Ŵakhristu ŵa ku Korinte vikulongora kuti wakamanyanga kuzirwa kwa sembe ya Yesu. Wati walemba vinthu viheni ivyo ŵakachitanga kumanyuma, wakaŵaphalira kuti: “Kweni mwageziskika mwatowa, mwatuŵiskika, mwapimika ŵarunji mu zina la Fumu yithu Yesu Khristu ndiposo na mzimu wa Chiuta withu.”—1 Kor. 6:​9-11.

8. Kasi mungaghanaghanira vichi apo mukunozgekera kuzakasangikapo pa Chikumbusko cha chaka chino?

⁸ Apo mukunozgekera Chikumbusko cha chaka chino, patulani nyengo ya kughanaghanirapo vyandulo ivyo mukusanga chifukwa chakuti Yehova wakumugowokerani zakwananga zinu. Mwachiyelezgero, chifukwa cha sembe yakuwombora, mukweneraso kujiyimba mulandu yayi panji kusuzgika maghanoghano na zakwananga izo muli kulapa kale. Wuli usange vikumusuzgani kuzomerezga kuti wali kumugowokerani nadi zakwananga zinu? Nyengo zinyake cha mumtima muli kuyowoyapo kuti, ‘Nkhumanya kuti Yehova wangagowokera, kweni ine ningajigowokera yayi.’ Usange mukujipulika nthena, kumbukani kuti: Yehova ndiyo wakugowokera, ndipo wali kupeleka udindo wakweruzga kwa Mwana wake. Yehova wandapelekepo kwa imwe panji kwa munthu waliyose mulimo wakweruzga uyo wakwenera kugowokereka panji yayi. Baibolo likuti: “Usange tikwenda mu ungweru nga umo [Yehova] waliri mu ungweru, . . . ndopa za Mwana wake Yesu zikutitozga ku kwananga kose.” (1 Yoh. 1:​6, 7) Tikwenera kugomezga kuti fundo iyi njaunenesko nga umo tikugomezgera visambizgo vinyake vya mu Baibolo. Chifukwa cha sembe yakuwombora, Yehova wali na chifukwa chakukwana cha kutigowokelera, ndipo Baibolo likuti iyo ‘ngwakunozgeka kugowokera.’—Sal. 86:5.

CHIFUKWA CHA SEMBE YAKUWOMBORA TINGACHIZGIKA NA KUZAKAŴA ŴAKUFIKAPO

9. Kasi lizgu lakuti ‘kwananga’ likusazgaposo vichi? (Salimo 51:5)

⁹ Mu Baibolo, lizgu lakuti ‘kwananga’ likung’anamura waka kuchita chinthu chiheni pera yayi, kweni likung’anamuraso kuleka kufikapo uko tili kubabika nako. (Ŵazgani Salimo 51:5.) Ndipo kuleka kufikapo kukupangiska kuti tichitenge kwananga pera yayi, kweni kukupangiskaso kuti tilwarenge, kuchekura, na kufwa. Lekani na ŵabonda wuwo ŵakuti ŵandachitepo kwananga, ŵakulwara na kufwa. Kweniso lekani ŵanthu ŵaheni na ŵawemi wuwo wose ŵakusuzgika na kufwa. Tose tili ŵambura kufikapo chifukwa tili kuhara kwananga kufuma kwa Adamu.

10. Kasi Adamu na Eva ŵakajipulika wuli ŵati ŵananga?

¹⁰ Ghanaghanirani waka umo Adamu na Eva ŵakajipulikira ŵati ŵananga na kuŵa ŵambura kufikapo. Ŵakasuzgika chomene maghanoghano. Iwo ŵati ŵananga waka, ŵakamba kusangana na masuzgo chifukwa cha kuswa dango la Chiuta—dango ilo ‘likalembeka mu mitima yawo.’ (Rom. 2:15) Ŵakajipulika kuti vinthu vinyake vyasintha kwa iwo—ndipo ŵakawona kuti vinthu vili makora yayi. Ŵakawona kuti ŵandavware ndipo ŵakabisama kwa Mlengi wawo. (Gen. 3:​7, 8) Ndipo aka kakaŵa kakwamba mu umoyo wawo kuti Adamu na Eva ŵajiyimbe mulandu, ŵenjerwe, kujiwona ŵambura kuvikilirika, kupulika vyakuŵinya, kweniso kuŵa na soni. Ndipo ŵakeneranga kulimbana na maghanoghano agha m’paka apo ŵafwirenge.—Gen. 3:​16-19.

11. Kasi kwananga kukupangiska kuti tijipulikenge wuli?

¹¹ Kwananga kukupangiska kuti nase tijipulikenge nga umo yikajipulikiranga mbumba yakwambilira. Kwananga kukupangiskaso kuti tisuzgikenge maghanoghano kweniso kupulika vyakuŵinya. Nanga tingayezga wuli kuti tiŵe na umoyo uwemi, kweni tingamazga yayi masuzgo ghanyake. Chifukwa wuli? Nga umo Baibolo likuyowoyera, ntchifukwa chakuti chilengiwa chili ‘kuzgoreka kuŵa chawaka.’ (Rom. 8:20) Ndipo uwu mbunenesko nadi, tose tikukhwaskika. Mwachiyelezgero, ghanaghanirani ivyo ŵanthu ŵanandi ŵakuyezgayezga kuchita kuti chilengiwa chileke kunangika, paŵavye kuswa malango, ŵawuskepo ukavu, kweniso kuti vyaru vyose viŵe pamtende. Nangauli pangaŵa kusintha pachoko waka, kweni unenesko ngwakuti ŵatondeka kumazga masuzgo agha. Kweni kasi sembe yakuwombora yingatiwombora wuli ku kwananga uko tili kuhara?

12. Kasi sembe yakuwombora yikutipa chigomezgo wuli?

¹² Sembe yakuwombora yikutipa chigomezgo chakuti “chilengiwa chizamufwatuka ku wuzga wa kuvunda.” (Rom. 8:21) Ichi chikung’anamura kuti para tazakaŵa ŵakufikapo mu charu chiphya, tizamulwaraso yayi; nesi kujiyimba mulandu, kwenjerwa, kujipulika ŵambura kuvikilirika, kupulika vyakuŵinya, panji kukhozgeka soni. Kweniso vyose ivyo tikuyezgayezga kuchita kuti charu chiŵe makora ndiposo tikhalenge mwamtende, vizamuwa pawaka yayi chifukwa tizamuwusikanga na Yesu Khristu, “Karonga wa Mtende,” uyo wakatiwombora ku kwananga.—Yes. 9:​6, 7.

13. Kasi tingaghanaghaniraso vichi apo tikunozgekera kuzakasangikapo pa Chikumbusko cha chaka chino?

¹³ Ghanaghanirani umo umoyo uzamuŵira para tazakaŵa ŵakufikapo. Ghanaghaniraniso waka umo vizamuŵira kuwuka makora mulenji uliwose, kukhala zuŵa lililose kwambura kufipa mtima kuti ise panji ŵakutemweka ŵithu tigonenge na njara, kulwara, panji kufwa. Nanga ni sono nthena, mungaŵa na mtende para ‘mukukoleska chigomezgo icho muli nacho icho chili nga ni nyanguru wa umoyo winu, ntchanadi na chakukhora.’ (Heb. 6:​18, 19) Nga umo nyanguru wakovwilira boti kuti lileke kuluta uku na uku, chigomezgo chinu Chachikhristu nacho chingakhozga chipulikano chinu na kumovwirani kuti muzizipizge masuzgo ghose agho mungasangana nagho. Gomezgani na mtima wose kuti Yehova “wakuŵapa njombe awo ŵakumupenja na mtima wose.” (Heb. 11:6) Mtende uwo mukusanga pasono kweniso chigomezgo cha munthazi icho muli nacho, ni vyamachitiko chifukwa cha sembe yakuwombora.

CHIFUKWA CHA SEMBE YAKUWOMBORA TINGAPHEMANA NA YEHOVA

14. Kasi kwananga kwakhwaska wuli ubwezi withu na Mlengi withu, ndipo chifukwa wuli?

¹⁴ Kufuma waka apo Adamu na Eva ŵakanangira, ŵanthu ubwezi wawo na Yehova ukatimbanizgika. Nakuti Baibolo likuti tose tikaŵa ŵalwani ŵa Chiuta. (Rom. 8:​7, 8; Kol. 1:21) Chifukwa wuli? Chifukwa chakuti Yehova ni murunji ndipo wakulekelera kwananga yayi. Pakuyowoya vya Yehova Baibolo likuti: “Maso ghinu ngatuŵa chomene, ghangadodoliska chiheni chara, ndipo mungalekelera uheni chara.” (Hab. 1:13) Ntheura kwananga kuli kupangiska kuti ŵanthu ŵatalikirane na Chiuta. Palije uyo wangaŵa paubwezi na Yehova, pekha para ivyo vikanangika vyanozgekaso na kuphemana nayo. Nakuti sembe yakuwombora yili kovwira kuti tiphemane nayo Yehova.

15. Kasi sembe yakuwombora yikapangiska vichi, ndipo paŵa vyakufumapo wuli?

¹⁵ Baibolo likuti Yesu ndiyo ni “sembe yakuphepiskira zakwananga zithu.” (1 Yoh. 2:2) Lizgu Lachigiriki ilo lili kung’anamulika kuti “sembe yakuphepiskira” lingang’anamura “kutuniska.” Kasi Yehova wakatuniskika wuli chifukwa cha sembe yakuwombora? Tileke kughanaghana kuti nyifwa ya Mwana wake yikamupangiska kuti wajipulikeko makora. M’malo mwake, sembe yakuwombora yikapangiska kuti watune, panji kukhorwa kuti fundo zake zaurunji zalondezgeka. Sono wakaŵa na chifukwa chakupulikikwa cha kuwezgerapo ubwezi pakati pa iyo na ŵanthu. (Rom. 3:​23-26) Nakuti ‘wakapima’ awo ŵakamusopanga mwakugomezgeka kuti mbarunji nanga ni apo Khristu wakaŵa wandafwe. (Gen. 15:​1, 6) Chifukwa wuli? Chifukwa cha sembe yakuwombora iyo yikaŵa kuti yizamupelekeka kunthazi. Yehova wakaŵa na chigomezgo chose kuti Mwana wake Yesu wazamupeleka sembe iyi. (Yes. 46:10) Sembe yakuwombora yikajura nthowa yakuti ŵanthu ŵaphemane na Chiuta.

16. Kasi mungaghanaghaniraso vichi apo mukunozgekera Chikumbusko? (Wonaniso chithuzi.)

¹⁶ Ghanaghanirani waka umo umoyo winu uliri pasono chifukwa chakuti muli kuphemana na Chiuta. Mwachiyelezgero, mungachema Yehova kuti “Adada,” nga umo Yesu wakayowoyera. (Mat. 6:9) Nyengo zinyake mungachemaso Yehova kuti ni “Mubwezi” winu. Kweni para tikuchema Yehova kuti “Adada” panji “Mubwezi,” tikwenera kuchita nthena na ntchindi zikuru kweniso mwakujiyuyura. Chifukwa wuli? Chifukwa chakuti tili ŵanthu ŵakwananga ndipo tingasendelera yayi kwa Yehova pa ise tekha. Nakuti tili paubwezi na Yehova chifukwa cha sembe yakuwombora. Kwizira mwa Yesu, Yehova wali kupangiska kuti chiŵe chamachitiko kuti “waphemaneso na vinthu vinyake vyose, mwa kuwezgerapo mtende kwizira mu ndopa izo [Yesu] wakathiska pa khuni lakusuzgikirapo.” (Kol. 1:​19, 20, bi7) Lekani tingaŵa paubwezi na Yehova nanga ni sono nthena nangauli tili ŵakwananga.

SEMBE YAKUWOMBORA YIKULONGORA LUSUNGU LWA YEHOVA

17. Kasi sembe yakuwombora yikulongora wuli lusungu lwa Yehova? (Ŵaefeso 2:​4, 5)

¹⁷ Sembe yakuwombora yikulongora kuti Yehova “ngwalusungu chomene.” Iyo “wakatizgora ŵamoyo . . . apo tikaŵa ŵakufwa chifukwa cha kwananga.” (Ŵazgani Ŵaefeso 2:​4, 5.) Ŵanthu awo ŵali na “maghanoghano ghakwenelera umoyo wamuyirayira” ŵakulilira wovwiri, pakumanya kuti ŵali kukoleka mu wuzga wa kwananga uko ŵali kuhara ndipo ŵakukhumba kuwomboleka. (Mil. 13:48) Ndipo Yehova wakovwira ŵanthu aŵa kwizira mu uthenga wa Ufumu, na chilato chakuti ŵamumanye makora iyo kweniso Mwana wake, Yesu. (Yoh. 17:3) Para Satana wakaghanaghananga kuti kwananga uko Adamu na Eva ŵakachita kutondeskenge khumbo la Chiuta, wakajipusikanga waka.

18. Para tikughanaghanira za sembe yakuwombora, kasi tikwenera kukumbuka vichi?

¹⁸ Apo tikughanaghanirapo za vyandulo ivyo tikusanga chifukwa cha sembe yakuwombora, tikweneraso kukumbuka nkhani yakuzirwa chomene. M’malo mwakuwona waka kuti chilato cha sembe yakuwombora nkhutiponoska, tikweneraso kukumbuka kuti ni nthowa iyo Yehova wakugwiliskira ntchito kuzgora nkhani iyo Satana wakawuska mu munda wa Edeni. (Gen. 3:​1-5, 15) Kwizira mu sembe iyi, Yehova wakutuŵiska zina lake, kususka mautesi ghose agho Satana wali kuyowoya. Wakutiwomboraso ku kwananga na nyifwa, kulongora kuti ni Chiuta wachitemwa. Ndipo kwizira mu lusungu lwake lukuru, Yehova wali kutizomerezga kuti nase tichiteko mulimo wakususka mautesi gha Satana nangauli tili ŵakwananga. (Zinth. 27:11) Kasi mungalongora wuli kuti mukuwonga sembe yakuwombora? Tizamuzgora fumbo ili mu nkhani yakulondezgapo.