Kasi Baibolo Likuti Wuli na Nthengwa za Ŵanalume Pera Panji Ŵanakazi Pera?

Ivyo Baibolo likuyowoya

Chiuta ndiyo wakamba kupeleka malango gha nthengwa. Baibolo likuti: ‘Mwanalume wasidenge awiske na anyina na kubatikana na muwoli wake, ndipo ŵaŵenge thupi limoza.’ (Genesis 2:24) Dikishonare yinyake yikuti, lizgu ilo pa Chitumbuka tikuti “muwoli,” pa Chihebere likung’anamura mwanakazi. (Vine’s Expository Dictionary of Biblical Words) Yesu wakati “mwanalume na mwanakazi” ndiwo ŵatoranenge.—Mateyu 19:4.

Ntheura Chiuta wakukhumba kuti mwanalume na mwanakazi ndiwo ŵatoranenge. Ŵanalume na ŵanakazi ŵali kulengeka kuti ŵawovwiranenge maghanoghano, ŵakondweskanenge pakugonana, na kubaba ŵana.