Kasi Ŵakaboni ŵa Yehova Mbakugaluka?

Yayi, Ŵakaboni ŵa Yehova mbakugaluka yayi. Ndise Ŵakhristu ndipo tikulondezga Yesu na kuchita ivyo wakachitanga.

Kasi lizgu lakuti kugaluka likung’anamurachi?

Ŵanthu ŵakulipulikiska mwakupambana lizgu ili. Mu nkhani iyi, tiwonenge vinthu viŵiri ivyo ŵanthu ŵakughanaghana para ŵapulika lizgu ili, kweniso usange ndimo viliri na ise panji yayi.

• Ŵanyake ŵakughanaghana kuti ŵakugaluka mbanthu awo ŵali kufuma mu chisopa chinyake na kwambiska chawo. Ŵakaboni ŵa Yehova ŵandayambiske chisopa chawo. M’malo mwake, tikusopa kuyana na umo Ŵakhristu ŵakale ŵakachitiranga, ndipo ivyo ŵakachita na kusambizga vili kulembeka mu Baibolo. (2 Timote 3:16, 17) Tikugomezga kuti ŵanthu ŵakwenera kulondezga ivyo Malemba Ghakupatulika ghakuyowoya pa nkhani yakusopa.

• Ŵanyake ŵakughanaghana kuti chisopa chakugaluka chikuŵa chakofya ndipo chikuŵa na mulongozgi. Ŵakaboni ŵa Yehova ŵalije munthu uyo ŵakumuwona kuti ni mulongozgi wawo. M’malo mwake, tikulondezga mazgu gha Yesu ghakuti: “Mulongozgi winu njumoza, Khristu.”—Mt 23:10.

Ŵakaboni ŵa Yehova ni gulu lakofya yayi ndipo ŵandagaluke. Iwo ŵakovwirana kweniso ŵakovwira ŵanthu ŵanyake. Mwachiyelezgero, ntchito yithu yakupharazga yawovwira chomene ŵanthu kuleka nkharo ziheni nga nkhumwa minkhwala yakuloŵezga na moŵa. Kweniso tikovwira ŵanthu ŵanandi pa charu chose kuti ŵamanye kulemba na kuŵazga. Tikovwiraso para kwachitika soka. Tikulimbikira chomene kovwira ŵanthu, ndipo ivi ndivyo Yesu wakaphalira awo ŵakumulondezga kuti ŵachitenge.—Mateyu 5:13-16.