Kasi Visopa Vyose Vikuyana Waka? Kasi Vyose Vikulongozgera kwa Chiuta?
Ivyo Baibolo likuyowoya
Visopa vyose vikuyana waka yayi. Baibolo lili na viyelezgero vinandi vya visopa ivyo vikukondweska Chiuta yayi. Ndipo visopa ivi vili mu magulu ghaŵiri.
Gulu lakwamba: Vikusopa vikozgo
Baibolo likulongosora kusopa vikozgo na mazgu nga ghakuti “ngawaka,” “vyawaka,” kweniso “vinthu vyambura chandulo.” (Yeremiya 10:3-5; 16:19, 20) Yehovaa Chiuta wakapa mtundu wa Israyeli dango lakuti: “Ungaŵanga na ŵachiuta ŵanyake chara padera pa ine.” (Ekisodo 20:3, 23; 23:24) Ndipo para Ŵaisrayeli ŵamba kusopa ŵachiuta ŵanyake, ‘ukali wa Yehova ukagoleranga.’—Maŵazgo 25:3; Levitiko 20:2; Ŵeruzgi 2:13, 14.
Chiuta wandasinthe, iyo wakukwiya nipera para ŵanthu ŵakusopa vikozgo ivyo ‘ŵakuvichema ŵachiuta.’ (1 Ŵakorinte 8:5, 6; Ŵagalatiya 4:8) Iyo wakuphalira wose awo ŵakukhumba kusopa iyo kuti ŵaleke kwendezgana na wose awo ŵakusopa vikozgo, wakuti: “Fumanipo pakati pawo, ndipo jipaturani kwa iwo.” (2 Ŵakorinte 6:14-17) Chifukwa wuli pera Chiuta wakapeleka dango ili, usange visopa vyose vikuyana waka kweniso vikovwira ŵanthu kuŵa paubwezi na Chiuta?
Gulu lachiŵiri: Vikusopa Chiuta waunenesko kweni mu nthowa yambura kwenelera
Nyengo yinyake, Ŵaisrayeli ŵakamba kusopa Chiuta mwakutolera vigomezgo na mitheto ya mitundu yinyake iyo yikasopanga vikozgo. Ivi vikapangiska kuti Yehova wakane kusopa kwawo chifukwa iyo wakukana kusazga kusopa kwaunenesko na kwautesi. (Ekisodo 32:8; Dotoronome 12:2-4) Yesu nayo wakasuska ŵalongozgi ŵa visopa ŵa mu nyengo yakale chifukwa ŵakasopanga Chiuta mu nthowa yambura kwenelera. Iwo ŵakawonekanga nga mbosopisopi, kweni unenesko ngwakuti ŵakazerezganga “vinthu vyakuzirwa vya Dango, ivyo ni urunji, lusungu, na kugomezgeka.”—Mateyu 23:23.
Mwakuyana waka, mazuŵa ghano chisopa chekha icho chikuchita vinthu mwaunenesko ndicho chikovwira ŵanthu kuŵa paubwezi na Chiuta. Ndipo unenesko uwu ukusangika mu Baibolo. (Yohane 4:24; 17:17; 2 Timote 3:16, 17) Kweni visopa ivyo visambizgo vyake vikususkana na Baibolo vikupangiska ŵanthu kutondeka kuŵa paubwezi na Chiuta. Visambizgo vinandi ivyo ŵanthu ŵakugomezga kuti ni vya mu Baibolo, vikamba na ŵanthu awo ŵakasopanga vikozgo. Visambizgo ivi ni nga chisambizgo cha Utatu, mzimu ukufwa yayi, kweniso chakuti ŵanthu ŵaheni ŵakuphya ku moto. Chisopa icho chikusambizga vinthu ivi chikusopa “pawaka,” panji kuti ntchambura ntchito, chifukwa Chiuta wakukana kumusopa mwakugwiliskira ntchito maluso gha Chisopa.—Mariko 7:7, 8.
Chiuta wakutinkha kuti chisopa chichitenge upusikizgi. (Tito 1:16) Kuti chisopa chovwire ŵanthu kuŵa paubwezi na Chiuta, chikwenera kuŵasambizga vinthu ivyo vingaŵawovwira pa umoyo wawo wa zuŵa na zuŵa, m’malo mwa kuŵachichizga waka kulondezga mitheto panji malango gha chisopa. Mwachiyelezgero, Baibolo likuti: “Usange munthu wakujiwona kuti ni musopisopi kweni wakutondeka kukora lulimi lwake, wakupusika mtima wake, ndipo kusopa kwa munthu uyu nkhwawaka. Kusopa kwakutowa na kwambura kufipiskika panthazi pa Chiuta, Dada withu ni uku: kupwelelera ŵalanda na vyokoro mu suzgo yawo, ndiposo kujisungilira wambura kabanga kakufuma ku charu.” (Yakobe 1:26, 27) Baibolo la Tumbuka Bible, likugwiliskira ntchito mazgu ghakuti “kusopa kwambura kukazuzgika,” pakulongosora za kusopa kutuŵa, kwambura upusikizgi.