Mungafiska Kulimbana na Maghanoghano Ghakugongoweska

1-2. Kasi nyengo zinyake mpositole Paulosi wakajipulikanga wuli, ndipo chifukwa wuli chiyelezgero chake chingatovwira? (Ŵaroma 7:​21-24)

KASI ntchivichi chikwiza mu maghanoghano ghinu para mukughanaghanira vya mpositole Paulosi? Kasi mukughanaghana vya mishonale wachikanga, msambizgi waluso, panji munthu uyo wakalemba mabuku ghanandi gha mu Baibolo? Para ndivyo vikwiza mu maghanoghano ghinu, mbwenu mukuneneska. Kweni nyengo zinyake Paulosi nayo wakasuzgikanga maghanoghano panji kugongowa. Nga umo vikuŵira na taŵanandi ŵa ise, nayo wakasuzgikanga na maghanoghano ghakugongoweska.

² Ŵazgani Ŵaroma 7:​21-24. Mu kalata yake iyo wakalembera Ŵaroma, Paulosi wakayowoya umo wakajipulikiranga, ndipo panji taŵanandi tingajipulika nga ndiyo nyengo zinyake. Paulosi wakaŵa Mkhristu wakugomezgeka ndipo wakakhumbisiskanga kupulikira Chiuta, kweni chifukwa chakuti wakaŵa wambura kufikapo chikaŵa chakusuzga kuti nyengo zose wachitenge ivyo Chiuta wakukhumba. Padera pa suzgo ili, Paulosi nyengo zinyake wakasuzgikanga na maghanoghano ghakugongoweska ghakukhwaskana na ivyo wakachita kumasinda kweniso suzgo la muthupi lambura kumara ilo wakaŵa nalo.

3. Kasi tidumbiskanenge vichi mu nkhani iyi? (Wonaniso “Mazgu Ghalongosoreka.”)

³ Nangauli Paulosi wakalimbananga na maghanoghano ghakugongoweska, kweni wakazomerezga yayi kuti maghanoghano ghakugongoweskaa agha ghamutondeske kughanaghanira viwemi. Mu nkhani iyi, tidumbiskanenge mafumbo agha: Kasi ntchivichi chikapangiska Paulosi kuti nyengo zinyake wajipulikenge ‘wakusokwa’ panji kuti wakusuzgika? Kasi wakachitanga wuli kuti watonde maghanoghano ghakugongoweska? Ndipo kasi tingachita wuli kuti titonde maghanoghano ghakugongoweska?

IVYO VIKAPANGISKANGA PAULOSI KUŴA NA MAGHANOGHANO GHAKUGONGOWESKA

4. Kasi ntchivichi chikapangiska Paulosi kuŵa na maghanoghano ghakugongoweska?

⁴ Vinthu ivyo wakachita kumasinda. Pambere wandazgoke Mkhristu, Paulosi uyo pakwamba wakamanyikwanga kuti Saulosi, wakachita vinthu vinandi viheni ivyo pamanyuma wakadandawura navyo. Mwachiyelezgero, wakawoneleranga apo munthu wakugomezgeka Stefano wakadinyikanga na malibwe m’paka nyifwa ndipo wakakolerana navyo. (Mil. 7:58; 8:1) Kweniso Saulosi wakadangiliranga pakutambuzga Ŵakhristu.—Mil. 8:3; 26:​9-11.

5. Kasi Paulosi wakajipulikanga wuli chifukwa cha vinthu ivyo wakachita kumasinda?

⁵ Pamanyuma pakuti wazgoka Mkhristu, mpositole Paulosi nyengo zinyake wakasuzgikanga maghanoghano na ivyo wakachita kumasinda. Apo vyaka vikajumphangapo wati waŵa Mkhristu, wakwenera kuti wakajiyimbanga mulandu chomene chifukwa cha ivyo wakachitanga pakutambuzga Ŵakhristu kumasinda. Mwachiyelezgero, apo wakalembanga kalata yake yakwamba yakuluta ku Ŵakorinte cha mu 55 C.E., wakati: “Nili wakwenelera yayi kuchemeka mpositole, chifukwa nkhatambuzganga mpingo wa Chiuta.” (1 Kor. 15:9) Pamanyuma pa vyaka pafupifupi 5, mu kalata yake yakuluta ku Ŵaefeso, wakajilongosora kuti ni “munthu muchoko chomene pa ŵatuŵa wose.” (Efe. 3:8) Ndipo apo wakalemberanga Timote, Paulosi wakajilongosora kuti pakwamba wakaŵa “wakuyuyura Chiuta na wakutambuzga ŵanthu ŵake kweniso munthu wamsinjiro.” (1 Tim. 1:13) Ghanaghanirani waka umo Paulosi wakwenera kuti wakajipulikiranga apo wakaluta kukendera mpingo na kukumana na awo pakwamba wakaŵatambuzganga, panji ŵachibali ŵa ŵanthu awo wakaŵatambuzganga pakwamba.

6. Kasi ntchivichi chinyake icho chikapangiska Paulosi kuti wasuzgikenge chomene maghanoghano? (Wonaniso mazgu ghamusi.)

⁶ Munga mu thupi. Paulosi wakayaniska suzgo ilo likamupangiskanga kusuzgika chomene maghanoghano na “munga mu thupi.” (2 Kor. 12:7) Mpositole uyu wakayowoya yayi suzgo ili, kweni mazgu agho wakagwiliskira ntchito ghakulongora kuti vingachitika kuti likaŵa suzgo la ulwari, kwenjerwa, panji suzgo linyake ilo likapangiskanga kuti wapulikenge vyakuŵinya chomene.b

7. Chifukwa wuli chikaŵa chakusuzga kuti nyengo zose Paulosi wachitenge icho ntchiwemi? (Ŵaroma 7:​18, 19)

⁷ Ivyo wakabudiskanga. Paulosi wakasuzgikanga na vinthu ivyo wakabudiskanga. (Ŵazgani Ŵaroma 7:​18, 19.) Nangauli wakakhumbanga kuchita icho ntchiwemi, kweni thupi lake lakwananga likamutondeskanga kuchita nthena. Nakuti wakazomerezga kuti pakaŵa kulimbana pakati pa makhumbiro ghake ghakwananga na khumbo lake lakuti wachite icho ntchiwemi. Ndipouli, Paulosi wakaŵikapo mtima kuti wasinthe. (1 Kor. 9:27) Nakuti wakwenera kuti wakakwenyeleranga chomene para wachitaso tumikhaliro tuheni uto wakatuleka!

UMO PAULOSI WAKACHITIRA PAKULIMBANA NA MAGHANOGHANO GHAKUGONGOWESKA

8. Kasi makalata gha Paulosi ghakulongora kuti wakachita wuli kuti wasinthe wunthu wake?

⁸ Nga umo ghakulongolera makalata ghake, Paulosi wakaghanaghaniranga chomene umo mzimu wa Chiuta ungawovwilira iyo na Ŵakhristu ŵanyake kuti ŵaleke kughanaghanira makhumbiro ghaheni na kusintha wunthu wawo. (Rom. 8:13; Gal. 5:​16, 17) Kanandi Paulosi wakayowoyanga pakweru makhumbiro ghaheni na vyakuchita ivyo Ŵakhristu ŵakwenera kugega kuti ŵakondweske Chiuta. (Gal. 5:​19-21, 26) Tikukayika yayi kuti Paulosi wakaghanaghanirangapo ivyo wakatondekanga kuchita makora, kupenjerezga ulongozgi mu Malemba, na kuwona nthowa izo wangatondera masuzgo ghake. Ntheura tikugomezga kuti nayo wakalondezganga ulongozgi uwo wakapelekanga ku ŵanji.

9-10. Kasi ntchivichi chikamovwira Paulosi kulimbana na maghanoghano ghakugongoweska? (Ŵaefeso 1:7) (Wonaniso chithuzi.)

⁹ Nangauli nyengo zinyake Paulosi wakagongowanga, kweni wakalutilira kuwona vinthu mwakwenelera. Mwachiyelezgero, wakakondwanga para wapokera malipoti ghawemi kufuma ku ŵanyake awo ŵakachitiranga lumoza uteŵeti. (2 Kor. 7:​6, 7) Wakakondwangaso chifukwa cha kuŵa paubwezi na Ŵakhristu ŵanyake. (2 Tim. 1:4) Ndipo wakamanyanga kuti Yehova wakakondwanga nayo. Nadi, Paulosi wakakondwanga chifukwa wakateŵeteranga Chiuta “na njuŵi yituŵa.” (2 Tim. 1:3) Nanga ni apo wakajalirika mu jele ku Romu, Paulosi wakachiska Ŵakhristu ŵanyake kuti ‘ŵasekelere mu Fumu.’ (Fil. 4:4) Nakuti para tikuŵazga mazgu ghake, tingawona kuti ghakulongora kuti wakakhaliranga waka kughanaghanira vya masuzgo ghake yayi panji ivyo wakabudiskanga. Ntchakuwonekerathu kuti para maghanoghano ghakugongoweska ghiza mu mtima wake, Paulosi wakachitangapo kanthu mwaluŵiro kuti wambeso kuwona vinthu mwakwenelera.

¹⁰ Paulosi wakafiskaso kulimbana na maghanoghano ghakugongoweska chifukwa wakagomezganga kuti sembe yakuwombora chikaŵa chawanangwa chakuluta kwa iyo payekha. (Gal. 2:20; ŵazgani Ŵaefeso 1:7.) Ivi vikamovwira kuti wagomezgenge chomene kuti Yehova wali kumugowokera kwizira mwa Yesu Khristu. (Rom. 7:​24, 25) Nangauli wakabudiska vinyake kumasinda kweniso wakatondekanga kuchita makora vinyake, Paulosi wakalutilira kuchita mwakukondwa “uteŵeti wakupatulika” kwa Chiuta.—Heb. 9:​12-14.

11. Chifukwa wuli chiyelezgero cha Paulosi ntchakukhozga kwa ise?

¹¹ Nga ni Paulosi, nase tingajipulika nga kuti mtima withu ukulimbana na suzgo linyake. Lingaŵa la ivyo tikughanaghana, ivyo tikuchita, panji ivyo tikuyowoya. Nase nyengo zinyake tingafika na pakuyowoya kuti, “Namunthu wakusuzgika ine!” Mudumbu munyake zina lake Elizac wa vyaka vya m’ma 20 wakulongosora umo wakujipulikira, wakuti: “Nkhukhozgeka chomene para nkhughanaghanira umo vinthu vikaŵira kwa Paulosi. Mtima ukuŵako mu malo pakumanya kuti ndine pera yayi nkhujipulika munthowa iyi. Nkhuwona kuti nkhani iyi yikunikumbuska waka kuti Yehova wakumanya ivyo ŵanthu ŵake ŵakujumphamo.” Kasi tingachita wuli kuti nga ni Paulosi, nase tiŵe na njuŵi yituŵa na kulutilira kuŵa ŵakukondwa nanga tingaŵa na maghanoghano ghakugongoweska?

IVYO TINGACHITA KUTI TILIMBANE NA MAGHANOGHANO GHAKUGONGOWESKA

12. Kasi nyengo zose tikwenera kuchita vichi kuti tilimbane na maghanoghano ghakugongoweska?

¹² Lutilirani kuŵa na ndondomeko yakuchitira vinthu vyauzimu. Para tili na ndondomeko yiwemi yakuchitira vinthu vyauzimu, chiŵenge chipusu kuŵika mtima pa vinthu viwemi. Ndondomeko iyi tingayiyaniska na vinthu ivyo tikwenera kulutilira kuchita kuti tiŵe na mathupi ghawemi na ghankhongono. Para tikurya chakurya chakwenelera, tikuchita maseŵero ghakukhozga thupi, na kugona mwakukwana, kanandi tikujipulika makora. Mwakuyana waka, tose tili kujiwonera tekha umo tikujipulikira makora para nyengo zose tikuŵazga Mazgu gha Chiuta; kunozgekera maungano, kuwungana, na kuzgorapo pa maungano. Vinthu ivi vikutovwira kuti tilimbane na maghanoghano ghakugongoweska.—Rom. 12:​11, 12.

13-14. Kasi Ŵakhristu ŵanyake ŵakugomezgeka ŵasanga chandulo wuli chifukwa cha kuŵa na ndondomeko yiwemi yakuchitira vinthu vyauzimu?

¹³ Wonani chiyelezgero cha John, uyo wakasangika na kansa yakofya chomene apo wakaŵa na vyaka 39. Pakwamba wakasuzgikanga na maghanoghano ghakugongoweska. Wakajifumbanga kuti, ‘Kasi vyaŵa wuli kuti nilware nthenda iyi uku nichali muchoko?’ Pa nyengo iyi, mwana wake msepuka wakaŵa waka na vyaka vitatu. Kasi ntchivichi chikamovwira John kulimbana na maghanoghano ghakugongoweska agho wakaŵa nagho? Iyo wakuti: “Nangauli nkhaŵanga wakuvuka chomene, kweni nkhawoneseskanga kuti banja lane likulutilira kuchita vinthu vyauzimu. Tikalutanga ku maungano ghose, sabata yiliyose tikanjiranga mu upharazgi, kweniso tikachitanga kusopa kwa mbumba mwakukhazikika nanga ni apo chikaŵanga chakusuzga kuchita nthena.” Ndipo para wakukumbuka umo vikaŵira pa nyengo iyo, John wakutiso: “Para tasangana na suzgo lakofya, pakwamba tingaŵa na chitima chomene ndipo tingasuzgika maghanoghano, kweni pamanyuma tikuwona umo Yehova wakutipira nkhongono na kutisimikizgira kuti wakutitemwa. Yehova wangamuzgorani ŵankhongono, nga umo wakachitira kwa ine.”

¹⁴ Eliza, uyo tamuzunura kukwambilira wakuti: “Nyengo yiliyose para naluta ku maungano kweniso para nasambira panekha, nkhukumbuskika kuti Yehova wakunipulika ndipo wakunitemwa nadi. Ivi vikunikondweska chomene.” Nolan, uyo ni mulaŵiliri wa dera ku Africa, wakuyowoya ivyo vikovwira iyo na muwoli wake Diane, wakuti: “Tikulutilira kuchita vinthu vyauzimu nanga ni apo tagongoweskeka. Nakuti nyengo zose Yehova wakutovwira kuti tiwonenge vinthu mwakwenelera. Tikuyezga kukumbuka fundo yakuti Yehova watovwirenge na kutitumbika; nangauli tikumanya yayi umo wachitirenge, kweni tikumanya kuti watovwirenge.”

15. Kasi tikwenera kuchitaso vichi kuti tilimbane na maghanoghano ghakugongoweska? Yowoyani chiyelezgero.

¹⁵ Tikweneraso kuchita vinandi padera pa ivyo tadumbiskana kuti tilimbane na maghanoghano ghakugongoweska. Kuti tipulikiske, tiyelezgere kuti mwamba kulwara nthenda ya msana. Nyengo zinyake mungajipulikako makora para zuŵa lililose mukusanga nyengo ya kwendapo, kweni kuti suzgo ili limare mukwenera kuchita vinandi. Chakwamba mukwenera kumanya dankha icho chikwambiska suzgo linu, ndipo mungakhumbikwira kufufuza panji kukumana na dokotala. Mwakuyana waka, tikwenera kufufuza mu Baibolo na mabuku ghithu, kweniso panji kupempha wovwiri kwa Mkhristu wakukhwima mwauzimu kuti timanye ivyo vikwambiska suzgo lithu kweniso umo tingachitira kuti tilimbane na maghanoghano ghakugongoweska. Wonaniso masachizgo ghanyake agha agho ghangamovwirani.

16. Kasi ntchivichi chingamovwirani kuti mumanye ivyo vikumupangiskani kuti mwenjerwenge? (Salimo 139:​1-4, 23, 24)

¹⁶ Lombani na kusanda ivyo mukukhumbikwira nadi. Themba Davide likamanyanga kuti Yehova wakulimanya makora. Ntheura Davide wakapempha Yehova kuti wamovwire kumanya icho chikambiskanga ‘vyenjezgo vya mu maghanoghano ghake.’ (Ŵazgani Salimo 139:​1-4, 23, 24.) Namweso mungamupempha Yehova kuti wamovwirani kumanya icho chikwambiska maghanoghano ghinu ghakugongoweska na kumanya nthowa izo zingamovwirani kuti mulimbane nagho. Mungajifumbaso mafumbo nga ghakuti: ‘Kasi ntchivichi chomene icho chikunipangiska kuti nenjerwenge? Kasi pali chinyake icho chikupangiska kuti nyengo zose nifipenge mtima? Kasi nkhutemwa kughanaghanira waka vinthu vyakugongoweska m’malo mwa kukanizga mwaluŵiro maghanoghano ghanthena?’

17. Kasi ni nkhani wuli izo mungasambira pa sambiro la mwaŵene izo zingamovwirani kuti mughanaghanirenge vinthu vyakukhozga? (Wonaniso chithuzi.)

¹⁷ Pa sambiro la mwaŵene, sambirani nkhani iyo yingamovwirani pa suzgo linu. Mungasanga chandulo chomene usange nyengo na nyengo mungasambiranga vyakukhwaskana na mikhaliro ya Yehova. Mwachiyelezgero, mpositole Paulosi wakasanga chandulo chomene chifukwa cha kughanaghanira vyakukhwaskana na sembe yakuwombora na kugowoka kwa Yehova. Namweso mungachita mwakuyana waka. Gwiliskirani ntchito Buku Lakupenjera Nkhani la Ŵakaboni ŵa Yehova, Watch Tower Publications Index, panji mabuku ghanyake ghakovwira pakusambira Baibolo agho ghali mu chiyowoyero chinu, kuti musande nkhani nga zakukhwaskana na lusungu lwa Chiuta, kugowoka, na chitemwa chakugomezgeka. Para mwazisanga nkhani izo zingamovwirani, lembani mitu yake. Ŵikani nkhani izi pa malo apo mungaziwonanga, ndipo musambirenge nkhani izi nyengo yiliyose iyo mwamba kugongoweskeka. Yezgani kugwiliskira ntchito ivyo mwaŵazga pa suzgo linu.—Fil. 4:8.

18. Kasi Ŵakhristu ŵanyake ŵawona kuti ni nkhani wuli zakovwira chomene?

¹⁸ Eliza uyo tamuzunura kale, wakafufuza vinandi vyakukhwaskana na Yobu. Iyo wakuti: “Naneso vinthu pa umoyo wane vikaŵa nga umo vikaŵira kwa Yobu. Iyo wakasangana na viyezgo mwakulondezgana waka. Kweni pa nyengo iyo Yobu wakasuzgika chomene maghanoghano, wakaleka yayi kuthemba Yehova—nangauli wakamanyanga yayi chifukwa icho masuzgo agha ghakachitikiranga.” (Yobu 42:​1-6) Diane, uyo tamuzunura kale wakuti: “Ine na mfumu wane tikusambira buku la Sendelerani kwa Yehova. Tikuwonga chomene kuti Yehova wakutiwumba nga umo muwuvi wakuwumbira dongo. M’malo mwakuti tiŵike mtima pa vinthu vyakugongoweska, tikuyezga kujiwona nga kuti Yehova wakutiwumba na kutovwira kuti tiŵe ŵanthu ŵawemi. Ivi vikutovwira kuti tisendelere chomene kwa iyo.”—Yes. 64:8.

LAŴISKANI KUNTHAZI NA CHIGOMEZGO

19. Kasi nyengo zinyake tingajipulika wuli, kweni tingaŵa na chigomezgo wuli?

¹⁹ Nanga vingaŵa kuti talondezga ulongozgi uwo uli mu nkhani iyi, kweni nyengo zinyake tisuzgikenge nipera maghanoghano. Ndipo mazuŵa ghanyake tingagongoweskeka chomene! Ndipouli, Yehova wangatovwira kuti tilimbane na maghanoghano ghakugongoweska na kujipulikako makora. Ntheura tingaŵa na chigomezgo chose kuti mazuŵa ghanandi tikondwenge na umoyo chifukwa chakuti tili paubwezi uwemi na Yehova ndipo tikumanya kuti wakukondwa na ivyo tikumuchitira.

20. Kasi mwaŵikapo mtima kuchita vichi?

²⁰ Tiyeni tiŵikepo mtima kuti tileke kugongoweskeka na vinthu ivyo tikachita kumasinda, masuzgo ghithu, panji vinthu ivyo tikutondeka kuchita makora. Na wovwiri wa Yehova, tingafiska kulimbana na maghanoghano ghakugongoweska. (Sal. 143:10) Tikulindilira mwakunweka nyengo iyo tizamusuzgikaso yayi na maghanoghano ghakugongoweska. Panyengo iyo, tizamuwukanga waka mulenji uliwose kwambura kwenjerwa na chilichose, ndipo tizamukondwanga kuteŵetera Chiuta withu wachitemwa, Yehova!