Muliska Wakasanga Mazgoro

Eliso uyo ni kaboni wa Yehova, zuŵa linyake wakasambiranga Baibolo na mwanakazi munyake. Mwamabuchi panyumba ya mwanakazi uyu pakiza ŵalendo. Ŵalendo aŵa wakaŵa muliska pamoza na muwoli wake. Eliso wakapulika kuti banja ili, mwana wawo yumoza pera wali kufwa mwasonosono.

Mudumbu Eliso wati waŵakhuza, muliska na muwoli wake ŵakamba kulira chomene. Pamanyuma, mwaukali muliska uyu wakati: “Nkhupulikiska yayi chifukwa icho Chiuta wazomerezgera kuti tisangane na chiyezgo ichi. Chifukwa wuli wangatora mwana wane yumoza pera? Nateŵetera Chiuta vyaka 28, nachita vinthu viwemi vinandi, ndipo iyi ndiyo njombe iyo wanipa. Chifukwa wuli Chiuta wali kukoma mwana wane?”

Eliso wakalongosolera banja ili kuti ni Chiuta yayi uyo wakatora mwana wawo. Wakadumbiskanaso nawo nkhani ya sembe yakuwombora, chiwuka, kweniso vifukwa ivyo Chiuta wazomerezgera kuti vinthu viheni vichitikenge. Muliska uyu pamoza na muwoli wake ŵakamuphalira Eliso kuti waŵapa mazgoro agho ŵakalombanga kuti ghazgoreke.

Sabata yakulondezgapo muliska na muwoli wake ŵakizaso ku nyumba ya Eliso kuti ŵasambirenge pamoza Baibolo na mwanakazi yura. Eliso na mwanakazi uyu, ŵakasambiranga mutu wakuti “Kasi Ŵakutemweka Ŵinu Awo Ŵali Kufwa Ŵazamuwuka?” mu buku la Kasi Baibolo Likutisambizga Vichi? Banja ili, likanweka chomene na sambiro ili ndipo likazgorangapo.

Pamanyuma, banja ili likaluta ku ungano wapadera wa Ŵakaboni ŵa Yehova uwo ukachitikira ku Tbilisi, Georgia. Ŵakakhwaskika chomene na chitemwa kweniso kukolerana uko ŵakawona pa ungano. Muliska uyu na muwoli wake ŵakayezgayezga kuti ŵawovwire ŵanthu ŵa mu tchalitchi lawo kuti ŵaŵe na mikhaliro iyi kweni ŵakatondeka.