Nkhondo Njakofya Chomene
Ŵanthu ŵakusangana na masuzgo ghakuru para kukuchitika nkhondo na viwawa kuluska masoka ghanyake. Ŵasilikari kweniso ŵanthu awo nkhondo yili kuŵachitikirapo, ŵakumanya makora masuzgo agho ghakuŵapo para kwachitika nkhondo.
ŴASILIKARI
Gary wa ku Britain wakuti: “Wamunthu ukuchita wofi chomene kuti nyengo zose uwonenge ŵanthu ŵakufwa kweniso ŵakupwetekeka chomene. Ndipo ukujipulika kuti ndiwe wambura kuvikilirika.”
Wilmar wa ku Colombia wakuti: “Nkhalasika na vipolopolo pa msana kweniso kumaso ndipo nkhawonanga ŵanthu ŵanandi ŵakukomeka, ŵana na ŵachekuru wuwo. Nkhondo yikupangiska kuti wamunthu uleke kukhwaskika chomene para ŵanthu ŵakusuzgika na kufwa.”
Zafirah wa ku United States wakuti: “Para ukuwona munthu wakulasika na futi, vikufumamo luŵiro yayi mu maghanoghano. Nyengo zose mu maghanoghano ukuwona waka munthu wakulira na kuphupha na umoyo. Nakuti ukumuluwa yayi munthu uyu.”
ŴANTHU BWEKA
Oleksandra wa ku Ukraine wakuti: “Nkhawonanga nga ningazakakondwaso yayi. Nkhawopanga chomene kufwa kweniso nkhawopanga kuti ŵabali na ŵabwezi ŵane ŵafwenge.”
Daler wa ku Tajikistan wakuti: “Tikawopanga chomene chifukwa tikeneranga kwimilira pa mzere wakupokera chakurya, kufuma 2 koloko kumatanda kucha m’paka 11:00 koloko usiku. Mtima ukaŵanga waka bii, chifukwa tikamanyanga kuti nyengo yiliyose tingalasika.”
Marie wa ku Rwanda wakuti: “Ŵapapi ŵane wose ŵakafwa pa nkhondo. Nkhaŵa mulanda ndipo pakaŵavya wakunipembuzga panji kunipwelelera.”
Nangauli ŵanthu awo taŵazunura pachanya apa ŵakakumana na masuzgo ghakuru chifukwa cha nkhondo, kweni pasono ŵali na mtende. Ndipo ŵakugomezga kuti sonosono apa nkhondo na viwawa vimarenge. Gongwe la Mulinda ili likulongosora ivyo Baibolo likuyowoya umo nkhondo yizamumalira.