Kasi Nkhondo na Viwawa Vizamumara Wuli?

CHIUTA WAZAMUMAZGA MABOMA GHA ŴANTHU

Baibolo likuti Chiuta wazamugwiliskira ntchito nkhondo ya Aramagedonia kuti wamazge maboma gha ŵanthu. (Chivumbuzi 16:16) Pa nyengo iyo, “mathemba gha charu chose” wazamuŵawunganyira wose pamoza ku “nkhondo ya zuŵa likuru la Chiuta Wankhongonozose.” (Chivumbuzi 16:14) Aramagedoni ni nkhondo ya Chiuta iyo yizamumazga nkhondo zose.

Chiuta wazamuwuskapo maboma gha ŵanthu ndipo Ufumu wake panji kuti boma lake ndilo lizamunjira m’malo mwa maboma agha. Ufumu uwu uzamuwusa kufuma kuchanya ndipo uzamuparanyikapo chara. (Daniyeli 2:44) Chiuta wasankha Mwana wake Yesu kuti ndiyo waŵe Fumu ya Ufumu wake. (Yesaya 9:​6, 7; Mateyu 28:18) Boma ili ni Ufumub uwo Yesu wakasambizga ŵalondezgi ŵake kuti ŵalombenge kuti wize. (Mateyu 6:​9, 10) Ŵanthu wose pa charu chose ŵazamuŵa ŵakukolerana, chifukwa ŵazamuwusikanga na boma limoza ilo Fumu yake ni Yesu.

Mwakupambana na maboma gha ŵanthu, Yesu wazamugwiliskiranga ntchito mazaza ghake kuti wawovwire ŵanthu. Chifukwa chakuti Yesu wakutemwera yayi, palije uyo wazamweruzgika mwambura urunji chifukwa cha fuko lake, charu, panji umo wali kukulira. (Yesaya 11:​3, 4) Ŵanthu ŵazamulweraso wanangwa wawo yayi. Chifukwa wuli? Chifukwa Yesu wazamughanaghaniranga munthu waliyose payekha na kumovwira. “Wazamuthaska mukavu uyo wakulilira wovwiri, wakuyuyuka na yose uyo walije movwiri. . . . Wazamuŵathaska ku kuyuzga na nkhaza.”—Salimo 72:​12-14.

Ufumu wa Chiuta uzamuwuskapo vilwero vyose vyakofya ivyo vili pa charu chapasi. (Mika 4:3) Uzamuwuskaposo ŵanthu ŵaheni awo ŵakukana kuleka nkhondo kweniso awo ŵakutimbanizga mtende. (Salimo 37:​9, 10) Waliyose kwali ni mwanalume, mwanakazi, mwana, wazamujipulikanga kuti ngwakuvikilirika kulikose uko wangaluta.—Ezekiyeli 34:28.

Mu Ufumu wa Chiuta ŵanthu ŵazamukondwanga chomene na umoyo uwemi. Ufumu uwu uzamuwuskapo masuzgo nga ukavu, njara, kweniso kusoŵa kwa malo ivyo vikwambiska viwawa. Waliyose wazamuŵa na chakurya chiwemi kweniso chinandi, na malo ghawemi ghakukhala.—Salimo 72:16; Yesaya 65:​21-23.

Ufumu wa Chiuta uzamuwuskapo masuzgo ghose agho ghakwamba chifukwa cha nkhondo. Masuzgo agha ghakusazgapo vyakuŵinya, kusuzgika maghanoghano, na masuzgo ghanyake. Kweniso nanga ni ŵanthu awo ŵali kufwa ŵazamuwuskika. (Yesaya 25:8; 26:19; 35:​5, 6) Mbumba zizamuŵa zakukolerana ndipo ŵanthu ŵazamukumbukaso yayi masuzgo agho nkhondo yikwambiska, chifukwa “vinthu vyakale vyafumapo.”—Chivumbuzi 21:4.

CHIUTA WAZAMUWUSKAPO KWANANGA

Para Ufumu wa Chiuta wamba kuwusa pa charu chapasi ŵanthu wose ŵazamusopanga Chiuta waunenesko, Yehovac, “Chiuta wa chitemwa na wa mtende.” (2 Ŵakorinte 13:11) Ŵanthu ŵazamusambira umo ŵangakhalira mwamtende. (Yesaya 2:​3, 4; 11:9) Ŵanthu awo ŵakupulikira Chiuta ŵazamufwatuka ku kwananga na kuŵa ŵarunji.—Ŵaroma 8:​20, 21.

CHIUTA WAZAMUWUSKAPO SATANA NA VIŴANDA VYAKE

Ufumu wa Chiuta uzamuparanya Satana na viŵanda vyake awo ŵakwambiska nkhondo. (Chivumbuzi 20:​1-3, 10) Pakuti kuzamuŵavya viŵanda, “kuzamuŵa mtende wakuzara.”—Salimo 72:7.

Gomezgani kuti layizgo la Chiuta lakuti wamazgenge nkhondo na viwawa lifiskikenge sonosono apa. Iyo wali na nkhongono kweniso ngwakukhumbisiska kumazga nkhondo.

• Chiuta wali na vinjeru kweniso nkhongono zakumazgira nkhondo na viwawa. (Yobu 9:4) Palije icho wangatondeka kufiska.—Yobu 42:2.

• Chiuta vikumuŵinya para wakuwona ŵanthu ŵakusuzgika. (Yesaya 63:9) Kweniso “wakutinkha waliyose uyo wakutemwa nkhaza.”—Salimo 11:5.

• Nyengo zose Chiuta wakufiska mazgu ghake; wakuteta yayi.—Yesaya 55:​10, 11; Tito 1:2.