Kenese

14 I aso o Amalafilo te tupu o Sina,+ Alioka te tupu o Elasa, Kitalaoma+ te tupu o Elama+ mo Titalu te tupu o Koima, 2 ne taua atu a latou konei ki a Peila te tupu o Sotoma,+ Pesa te tupu o Komolo,+ Senapo te tupu o Atamaa, Semepo te tupu o Sepoima+ mo te tupu o Pela, telā ko Soala. 3 Ne ‵kau fakatasi a latou katoa konei i te Vanu o Setima,+ telā ko te Tai ‵Kona.*+

4 Ne tavini atu latou ki a Kitalaoma i tausaga e 12, kae i te 13 o tausaga ne ‵teke atu latou ki a ia. 5 Kae i te 14 o tausaga ne o‵mai a Kitalaoma fakatasi mo tupu kolā ne ‵kau atu ki a ia kae fakatakavale ne latou a tino Lefaima i Aselota-kanaima, tino Susema i Hamo, tino Emima+ i Save-kiliataima, 6 mo tino Holite+ i te lotou mauga ko Seila+ ke oko ki lalo i Elepalana, telā e tu i te koga lavaki. 7 Tenā ne toe ‵foki ei latou kae oko atu ki Enemisipata, telā ko Katesa,+ kae fakatakavale ne latou a te kogā fenua kātoa o tino Amaleka+ e pelā foki mo tino Amoli+ kolā e ‵nofo i Hasasona-tamala.+

8 I te taimi tenei, ne māti atu a te tupu o Sotoma, e pelā foki mo te tupu o Komolo, te tupu o Atamaa, te tupu o Sepoima, mo te tupu o Pela, telā ko Soala, kae ne olo atu e pelā me se kautau o taua ki a latou i te Vanu o Setima, 9 o taua atu ki a Kitalaoma te tupu o Elama, Titalu te tupu o Koima, Amalafilo te tupu o Sina mo Alioka te tupu o Elasa+​—e tokofa a tupu e taua atu ki tupu e tokolima. 10 A te Vanu o Setima ne ‵fonu i lua o kolotā, kae ne ‵to atu a tupu o Sotoma mo Komolo ki loto i ei i te taimi ne taumafai ei o ‵tele kea‵tea, kae ko tino kolā ne ‵toe mai ne ‵tele ki koga maugā. 11 Tenā ne puke ei ne tino kolā ne manumalo a koloa katoa o Sotoma mo Komolo mo olotou meakai katoa kae olo i te lotou auala.+ 12 Ne puke foki ne latou a Lota, te tama a te taina o Apelamo telā ne nofo i Sotoma,+ fakatasi mo ana koloa kae olo i te lotou auala.

13 Fakamuli ifo, ne vau se tagata telā ne sao i te taua kae fakailoa atu ki a Apelamo te tagata Epelu. I te taimi tenā, a ia e nofo i tafa o lakau ‵lasi o Mamele te tino Amoli,+ ko te taina foki o Esekolo mo Anele.+ A tāgata konei ne taugasoa o Apelamo. 14 Ne logo a Apelamo i tena kāiga*+ ko oti ne ave fakapagota. Tenā ne fakamaopoopo ei ne ia ana tāgata apo i te taua, ko tavini e toko 318 kolā ne fa‵nau i loto i tena kaukāiga, kae olo atu ki Tanu+ o ‵sala a kautau konā. 15 I te po, ne vaevae ne ia tena kautau, kae ne taua atu a ia mo ana pologa kae fakatakavale ne latou a kautau konā. Ne afuli ne ia a latou ke oko ki Hopa, i te feitu ki mātū o Tamaseko. 16 Ne toe maua ne ia a koloa katoa, kae ne toe maua foki ne ia a tena kāiga ko Lota, ana koloa, fāfine mo nisi tino.

17 Mai tua o te fokimaiga o Apelamo i te fakatakavalega o Kitalaoma mo tupu kolā ne ‵kau ki ei, ne fanatu te tupu o Sotoma o fakafetaui ki a Apelamo i te Vanu o Save, telā ko te Vanu o te Tupu.+ 18 Kae ne aumai ne Mekisateko+ te tupu o Salema+ a falaoa mo uaina ki a ia; a ia ko te faitaulaga a te Atua Tafasili i te Maluga.+

19 Tenā ne fakamanuia ei ne ia a Apelamo ana muna:

Kae ne tuku atu ne Apelamo ki a ia te tasi-vae-sefulu o mea katoa.+

21 Mai tua ifo, ne fai atu te tupu o Sotoma ki a Apelamo: “Tuku mai a tino ki a au, kae puke a koloa ma koe.” 22 Kae ne fai atu a Apelamo ki te tupu o Sotoma: “Au e sisi toku lima o tauto atu i mua o Ieova te Atua Tafasili i te Maluga, te Tino telā ne faite ne ia te lagi mo te lalolagi, 23 me ka se puke eiloa ne au se mea e tasi mai i au mea, ke oko ki se filo io me se mea ‵sai taka, ko te mea ke se mafai o fai aka koe, ‘Ne fai ne au a Apelamo ke maumea.’ 24 Ka seai saku mea e puke vagana ko mea kolā ko oti ne kai ne tamataene konei. Kae pelā mo tusaga o tāgata kolā ne olo mo au, ko Anele, Esekolo mo Mamele+—tuku la ke puke olotou tusaga.”