Kenese

29 Fakamuli ifo, ne toe faimalaga atu a Iakopo ki te fenua o tino i te feitu ki Saegala. 2 Ne lavea ne ia se vaikeli i tua o te fakai mo lafu mamoe e tolu e takato‵kato i ana tafa, me e masani o fainu ne latou a lafu mamoe i te vaikeli tenā. E isi se fatu lasi e ‵pono i te gutu o te vaikeli. 3 Kafai ko maopoopo katoa a lafu mamoe ki te koga tenā, ko fakateka ei kea‵tea ne latou a te fatu mai te gutu o te vaikeli, kae fainu a lafu mamoe, ka oti ko toe fakafoki ei ne latou a te fatu tenā ki te gutu o te vaikeli.

4 Muna a Iakopo ki a latou: “Oku taina, a koutou ne tino mai fea?” ne tali atu latou: “A matou ne tino mai Halana.”+ 5 Ne fai atu a ia ki a latou: “E iloa ne koutou a Lapana+ te mokopuna o Nakoli?”+ ne tali atu latou: “E iloa ne matou a ia.” 6 Ne fai atu a ia ki a latou: “E a, e malosi tou tagata?” Ne tali atu latou: “E malosi fua a ia. Kae tenei a tena tama fafine ko Lasela+ ko o‵mai mo ana mamoe!” 7 Tenā ne fai atu ei a ia: “A te mea nei ko te tutonu fua. E seki oko ki te taimi e fakamaopoopo mai ei a lafu mamoe. Fainu aka a mamoe, ko ave ei latou o fagai.” 8 Olotou muna: “E se mafai ne matou o fai te mea tenā seiloga ke maopoopo katoa mai a lafu, ko fakateka ei kea‵tea ne latou a te fatu mai te gutu o te vaikeli. Tenā ko fainu ei ne matou a mamoe.”

9 Kae koi fai‵pati a tou tagata mo latou, kae oko atu a Lasela mo mamoe a tena tamana, me i a ia se tausi mamoe fafine. 10 I te laveaga ne Iakopo a Lasela, te tama fafine a Lapana te tuagane o tena mātua, mo mamoe a Lapana, ne fanatu fakavave a Iakopo kae fakateka kea‵tea ne ia te fatu mai te gutu o te vaikeli, fainu atu ei a mamoe a Lapana te tuagane o tena mātua. 11 Tenā ne sogi atu ei a Iakopo ki a Lasela kae tagi i se leo maluga. 12 Kae ne kamata o fakamatala atu ne Iakopo ki a Lasela i a ia e kāiga* mo tena tamana kae ko ia ko te tama tagata foki a Lepeka. Ne tele fakavave atu tou fafine o fakailoa te mea tenā ki tena tamana.

13 I te logoga eiloa a Lapana+ i te tala e uiga ki a Iakopo te tama tagata a tena tuagane, ne tele atu a ia o fakafetaui ki tou tagata. Ne ‵sai kae sogi atu a ia ki tou tagata kae puke mai ne ia ki tena fale. Kae ne kamata o fakamatala atu ne Iakopo ki a Lapana a mea katoa kolā ne ‵tupu ki a ia. 14 Ne fai atu a Lapana ki a ia: “A koe ko oku ivi mo oku ‵kano tonu.”* Tenā ne ‵nofo ei a ia mo tou tagata i se masina e tasi.

15 Ne fai atu a Lapana ki a Iakopo: “Ona ko tāua e kāiga,*+ e mata, e ‵tau o tavini mai koe ki a au e aunoa mo se ‵togi? Fai mai, se a te ‵togi e manako koe ki ei?”+ 16 A Lapana e tokolua ana tama fāfine. A te igoa o te tamaliki matua ko Lea, kae ko te tamaliki foliki ko Lasela.+ 17 A Lea e se matagali, kae ko Lasela se fafine tinogali kae taulekaleka. 18 A Iakopo ne fiafai ki a Lasela, tenā ne fai atu ei a ia: “Au e fiafia o tavini atu ki a koe i tausaga e fitu mō tau tama fafine foliki ko Lasela.”+ 19 Muna a Lapana: “E ‵lei ke tuku atu ne au tou fafine ki a koe, i lō te tuku atu ne au ki se isi tagata. Nofo faeloa i oku tafa.” 20 Ne tavini atu a Iakopo i tausaga e fitu mō Lasela,+ kae ne fai fua a tausaga konā e pelā me ne mu aso ki a ia ona ko tena fiafai ki tou fafine.

21 Tenā ne fai atu ei a Iakopo ki a Lapana: “Tuku mai taku avaga me ko kātoa nei a aso o taku taviniga ki a koe, ko te mea ke na ‵nofo tasi māua.”* 22 Ne fakamaopoopo mai ne Lapana a tino katoa i te koga tenā kae fai ne ia se ‵kaiga. 23 Kae i te afiafi tenā, ne fakaiku aka ne ia ke avatu tena tama fafine ko Lea ki a Iakopo ko te mea ke ‵moe fakatasi lāua. 24 Ne tuku atu foki ne Lapana a tena tavini fafine ko Selepa ki tena tama fafine ko Lea mo fai tena tavini.+ 25 I te taeaoakaga, ne lavea ne Iakopo me ko Lea ne ‵moe mo ia! Tenā ne fai atu ei a ia ki a Lapana: “Se a te mea ko fai ne koe ki a au? E a, e seki tavini atu au ki a koe mō Lasela? Kaia ne fakatogafiti ei ne koe au?”+ 26 Ne tali atu a Lapana ki a ia: “E sē se tuu masani i te koga tenei ke fakaavaga muamua te tamaliki foliki i lō te tamaliki matua. 27 Ke fai ‵kaiga tatou i se vaiaso kātoa mō te fafine tenei. Ka oti ko tuku atu ei ki a koe te suā fafine tenei, māfai e tavini mai koe ki a au i te suā fitu tausaga.”+ 28 Ne fai eiloa ne Iakopo te mea tenā kae ne fai ‵kaiga latou i te vaiaso kātoa mō te fafine tenei, kae i te otiga, tuku atu ei ne Lapana a tena tama fafine ko Lasela mo fai tena avaga. 29 E se gata i ei, ne avatu foki ne Lapana a tena tavini fafine ko Pila+ ki tena tama fafine ko Lasela mo fai tena tavini.+

30 Ne ‵moe foki a Iakopo mo Lasela kae ne alofa malosi atu a ia ki a Lasela i lō Lea, kae ne tavini a ia ki a Lapana i te suā fitu tausaga.+ 31 I te taimi ne matea ei ne Ieova i a Iakopo e se alofa malosi* ki a Lea, ne fai ei ne ia ke faitama*+ tou fafine, kae ko Lasela ke se afu.+ 32 Ne faitama a Lea kae fanau mai ne ia se tamaliki tagata kae ne fakaigoa ne ia ki a Leupena,*+ me ne fai mai tou fafine: “Ko lavea ne Ieova toku puapuaga,+ kae nei la, ka kamata o alofa mai taku avaga ki a au.” 33 Ne toe faitama tou fafine kae fanau mai ne ia se tamaliki tagata kae fai aka: “Ne tuku mai te tamaliki tenei me ne lagona ne Ieova i a au e se alofagina.” Tena ne fakaigoa ei ne ia ki a Simeona.*+ 34 Ne toe faitama foki tou fafine kae fanau mai ne ia se tamaliki tagata, kae fai aka: “Nei la, ka kau mai taku avaga ki a au, me ko tokotolu nei ana tama tāgata i a au.” Ne fakaigoa ei ne ia ki a Levi.*+ 35 Ne toe faitama foki tou fafine kae fanau mai ne ia se tamaliki tagata, kae fai aka: “I te taimi tenei ka ‵viki atu au ki a Ieova.” Tenā ne fakaigoa ei ne ia ki a Iuta.*+ Mai tua ifo i ei, ne seki toe faitama tou fafine.