Kenese

6 I te taimi ko gasolo aka ei o tokouke a tino i luga i te lalolagi kae ko fa‵nau mai olotou tama‵liki fāfine, 2 ne kamata o lavea ne tama a te Atua* tonu+ a te tauleka‵leka o tama fāfine a tino konā. Tenā ne kamata ei o puke ne latou a fāfine kolā e ma‵nako latou ki ei mo fai olotou avaga. 3 Tenā ne fai aka ei a Ieova: “Ka se mafai ne au o kufaki i te tagata ki te se-gata-mai,+ me i a ia se tino* fua. Ona ko te mea tenā, ka ola fua a ia i tausaga e 120.”+

4 Ne ‵nofo a Nefilimi* i te lalolagi i aso konā mo taimi mai tua ifo. I taimi konā, ne tumau eiloa a tama a te Atua tonu i te ‵moe fakatauavaga fakatasi mo tama fāfine a tāgata konā kae e isi ne olotou tama‵liki ne fai i a latou. A latou konei ko tāgata ‵mafi i aso mua, ko tāgata takutakua.

5 Mai tua ifo i ei, ne lavea ne Ieova te ma‵sei o amioga a te tagata i luga i te lalolagi kae ko manakoga katoa o tena loto e ma‵sei i taimi katoa.+ 6 Ne fanoanoa* a Ieova ona ko tino kolā ne faite ne ia i te lalolagi, kae ne mafatia* ei tena loto.+ 7 Muna a Ieova: “Ka ‵solo kea‵tea ne au mai te lalolagi a tino kolā ne faite ne au, ko te tagata fakatasi mo manu ‵lata, manu ‵tolo, mo manu eva o te lagi, me ko fanoanoa au i tino kolā ne faite ne au.” 8 Kae ko Ieova ne fiafia eiloa ki a Noa.

9 Tenei te tala fakasolopito o Noa.

A Noa se tagata amiotonu.+ Ne fakamaoni* faeloa a ia i tafa o tino kolā ne ola fakatasi mo ia.* Ne sa‵sale fakatasi eiloa a Noa mo te Atua tonu.+ 10 Fakamuli ifo, ne fai a tama tāgata e tokotolu a Noa ko Semu, Hamo mo Iafeta.+ 11 Kae ne lavea ne te Atua tonu me ko oti ne fakamaseigina a te lalolagi, kae ne ‵fonu i amioga fakasaua. 12 Ao, ne kilo ifo te Atua ki te lalolagi, kae ko oti ne fakamaseigina;+ ko oti ne fai ne tino katoa a mea matagā i te lalolagi.+

13 Fakamuli ifo, ne fai atu a te Atua ki a Noa: “Ko oti ne fakaiku aka ne au ke fakaseai a tino katoa, me ko ‵fonu eiloa a te lalolagi i amioga fakasaua ona ko latou, tela la, ka fakaseai ne au a latou fakatasi mo te lalolagi.+ 14 Faite ne koe se vaka* ki laupapa ‵lei.*+ Ka fai ne koe ne potu i loto i te vaka kae ufi a te koga i loto mo tua ki te kolotā.+ 15 E ‵tau o faite ne koe penei: A te vaka e ‵tau o 300 kupita* te loa, 50 kupita te lauefa kae 30 kupita te maluga. 16 Ka faite ne koe se famalama mō fakamaina* te vaka, e tasi te kupita mai luga. E ‵tau o faite ne koe se mataloa i te kaokao+ o te vaka kae faite foki te fata muamua, te fata i te lua mo te fata i te tolu.

17 “Kae ko au, ka aumai ne au se lofiaga+ ki te lalolagi ke fakaseai a tino katoa mai lalo o te lagi kolā e isi se mānava ola* i ei. Ka ‵mate atu a mea katoa i te lalolagi.+ 18 Kae ka faka‵mautakitaki ne au a taku feagaiga mo koe, kae e ‵tau mo koe o ulu ki loto i te vaka, ko koe, ko au tama tāgata, tau avaga, mo avaga a au tama tāgata.+ 19 Kae aumai ki loto i te vaka e taki lua vaega o manu ola kese‵kese,+ ko te mea ke ‵sao fakatasi latou mo koe, se manu tagata mo se manu fafine;+ 20 ko manu eva e ‵tusa mo olotou itukāiga, ko manu ‵lata e ‵tusa mo olotou itukāiga, mo manu ‵tolo katoa o te laukele e ‵tusa mo olotou itukāiga, e taki lua mai itukāiga o manu ka ulu atu ki loto ke mafai o ‵sao+ fakatasi mo koe. 21 Kae e pelā mo koe, e ‵tau o fakaputu kae ave ne koe a vaegā meakai katoa ke ‵kai+ ki ei a koutou e pelā foki mo manu.”

22 Kae ne fai eiloa ne Noa a mea katoa kolā ne fakatonu atu te Atua ke fai ne ia. Ne fai eiloa ne ia a mea katoa.+