Te Lua Samuelu
2 Oti aka, ne fesili atu a Tavita ki a Ieova:+ “E ‵tau o fano au ki se fakai e tasi o Iuta?” Muna a Ieova ki a ia: “Fano.” Ne toe fesili atu a Tavita: “Ko te fakai fea e ‵tau o fano au ki ei?” Ne tali mai a ia: “Ki Hepelona.”+ 2 Tenā ne olo atu ei a Tavita mo ana avaga e tokolua, ko Ainoama+ mai Ieseleelu mo Apikaila+ te avaga a Napalu te tino Kalamelu telā ko mate. 3 Ne ave foki ne Tavita a tāgata kolā ne ‵nofo tasi mo ia,+ ko tāgata taki tokotasi mo olotou kāiga, kae ne ‵nofo latou i fakai i tafa o Hepelona. 4 Tenā ne olo atu ei a tāgata o Iuta ki konā kae ‵tofi ne latou a Tavita ke fai mo tupu o Iuta.+
Ne fai atu latou ki a Tavita: “A tāgata o Iapese-kileata ne tanu ne latou a Saulo.” 5 Tenā ne uga atu ei ne Tavita a avefekau ki tāgata o Iapese-kileata kae fai atu ki a latou: “Ke fakamanuia koutou ne Ieova, me ne fakaasi atu ne koutou te alofa fakamaoni ki te otou aliki ko Saulo e auala i te tanuga o ia.+ 6 Ke fakaasi atu ne Ieova a te alofa fakamaoni mo te fakamaoni ki a koutou. Ka fakaasi atu foki ne au ki a koutou a te atafai ona ko te mea tenei ne fai ne koutou.+ 7 Ke fakama‵losi otou lima kae ke fai koutou pelā me ne tāgata loto ‵toa, me i te otou aliki ko Saulo ko mate, kae ko oti ne ‵tofi au ne tino o Iuta ke fai mo tupu o latou.”
8 Kae ko Apinelu+ te tama tagata a Nelu, te takitaki o te kautau a Saulo, ne puke ne ia a Isoposeta+ te tama tagata a Saulo kae olo atu mo ia ki te suā feitu ki Manaima+ 9 kae fai ne ia mo fai te tupu o Kileata,+ tino Asulite, tino Ieseleelu,+ Efalaima,+ Peniamina mo Isalaelu kātoa. 10 A Isoposeta te tama tagata a Saulo ko 40 ana tausaga i te taimi ne fai ei a ia mo tupu o Isalaelu, kae ne pule a ia i tausaga e lua. Kae ne ‵lago atu eiloa a tino o Iuta ki a Tavita.+ 11 A te leva o te taimi* ne fai ei a Tavita mo tupu i Hepelona ki luga i tino o Iuta e ‵tusa mo te fitu tausaga mo te ono masina.+
12 A Apinelu te tama tagata a Nelu mo tavini a Isoposeta, te tama tagata a Saulo, ne olo atu mai Manaima+ ki Kipeona.+ 13 Ne olo atu foki a Ioapo+ te tama tagata a Seluia+ mo tavini a Tavita kae fetaui mo latou i te vai o Kipeona; ne ‵nofo te potukau e tasi i te feitu tenei o te vai, kae ko te suā potukau i te suā feitu o te vai. 14 Oti aka, ne fai atu a Apinelu ki a Ioapo: “Tuku mai a tamataene ke ‵tu o taua* i mua o tatou.” Tenā ne fai atu ei a Ioapo: “Ke ‵tu mai la ki luga.” 15 Ne ‵tu aka latou kae olo atu, e toko 12 mai Peniamina kolā ne ‵kau atu ki te tama a Saulo ko Isoposeta, kae toko 12 mai tavini a Tavita. 16 Ne ‵lave atu te suā tino ki te ulu o te suā tino kae fakatau ‵suki ne latou olotou soa ki te pelu i te kaokao, ‵mate katoa ei latou. Tela la, ne fakaigoa a te koga tenā i Kipeona ki a Helekata-hasulima.
17 Ne masei ‵ki te taua telā ne fai i te aso tenā, kae fakamuli ifo ne fakatakavale ei ne tavini a Tavita a Apinelu mo tāgata Isalaelu. 18 A tama tāgata e tokotolu a Seluia+ ne ‵nofo atu i konā, ko Ioapo,+ Apisai+ mo Asaelu;+ kae ko Asaelu ko ia loa ko makini e pelā eiloa mo te manu ko te kasele māfai ko tele i te vao. 19 Ne afuli ne Asaelu a Apinelu, kae ne seki ‵fuli eiloa a ia o tele ki te fakaatamai io me ki te fakamaui ko te mea ke maua ne ia a Apinelu. 20 I te kilomaiga a Apinelu ki ana tua, ne fesili atu a ia, “Ko koe tenei e Asaelu?” kae ne tali atu a ia, “Ao, ko au eiloa.” 21 Tenā ne fai atu ei a Apinelu ki a ia: “‵Fuli o tele ki te feitu fakaatamai io me ki te feitu fakamaui o ‵poa se tamataene e tokotasi i ei, kae puke so se mea e maua ne koe i a ia.” Kae ne seki manako a Asaelu o fakagata te afuliga o ia. 22 Ne toe fai atu a Apinelu ki a Asaelu: “Ko lava te vau o afuli au. Kaia ka tamate ei ne au koe? E mafai pefea ne au o kilo atu ki mata o Ioapo tou taina?” 23 Kae ne ita eiloa a ia ma tu, tenā ne velo ei ne Apinelu a tena tinae ki te muli o tena tao,+ kae ne sae te tao i tena tua, ne siga ifo a ia i konā, mate eiloa. A tino katoa kolā ne olo atu ki te koga ne siga kae mate i ei a Asaelu ne ‵tu malie i konā.
24 Ne ‵tele atu a Ioapo mo Apisai o afuli a Apinelu. I te taimi ko tō ei te mata o te la, ne oko atu latou ki te tamā mauga o Ama, telā e saga atu ki Kia i te auala ki te koga lavaki o Kipeona. 25 I konā ne maopoopo fakatasi a tino Peniamina mai tua o Apinelu, kae ne fai latou pelā me se potukau e tasi kae ‵tu mai katoa i te taulu o se mauga foliki e tasi. 26 Tenā ne kalaga atu ei a Apinelu ki a Ioapo: “E a, ka taua faeloa tatou ki te pelu ki te se-gata-mai? E se iloa ne koe me ka iku atu fua ki te logo‵mae? E pefea te leva e manako koe ki ei, ko fatoa fai atu ei koe ki ou tino ke se toe afuli ne latou olotou taina?” 27 Kae ne fai atu a Ioapo: “E pelā eiloa mo te Atua tonu e ola, moi ne se faipati mai koe, penei e afuli faeloa ne tino konei olotou taina ke oko eiloa ki te tafataeao.” 28 Ne ili ne Ioapo te pu i te taimi nei, kae ne seki toe afuli ne ana tāgata a Isalaelu, tenā ne gata ei te taua.
29 Ne olo atu a Apinelu mo ana tāgata i loto i te Alapaa+ i te po kātoa tenā kae olo atu foki ki te suā feitu o te Iolitana kae ma‵laga atu i loto i te vanu ‵poko, oko atu ei ki Manaima.+ 30 I te fokimaiga a Ioapo i te afuliga o Apinelu, ne fakamaopoopo ne ia a tino katoa. Mai tavini a Tavita, e toko 19 ne ‵galo, fakatasi mo Asaelu. 31 Kae ne fakatakavale ne tavini a Tavita a tino Peniamina mo tāgata a Apinelu, kae e toko 360 olotou tāgata ne ‵mate i ei. 32 Ne puke ne latou a Asaelu+ kae tanu a ia i te tanuga o tena tamana, telā e tu i Peteleema.+ Tenā ne ma‵laga atu ei a Ioapo mo ana tāgata i te po kātoa tenā kae oko atu ki Hepelona+ i te tafataeao.