Te Lua Tupu

15 I te 27 tausaga o te pulega a te tupu o Isalaelu ko Ielopoamo,* ne fai a Asalia*+ te tama tagata a te tupu o Iuta ko Amasia+ mo fai te tupu.+ 2 Ko 16 ana tausaga i te taimi ne fai ei a ia mo tupu, kae ne pule a ia i Ielusalema i tausaga e 52. A te igoa o tena mātua ko Iekolia mai Ielusalema. 3 Ne tumau a ia i te faiga o mea ‵tonu i te kilokiloga a Ieova, e pelā eiloa mo mea ne fai ne tena tamana ko Amasia.+ 4 Kae ko koga ma‵luga ne seki fakaseai,+ kae ko tino koi ofo atu eiloa a taulaga kae fai ke fanaka te au mai olotou taulaga i luga i koga ma‵luga konā.+ 5 Ne fai ne Ieova ke puapuaga a te tupu, kae ne tumau eiloa tou tagata i te fai pelā me se lepela+ ke oko ki te aso ne mate ei. Ne nofo a ia i se isi fale,+ i te taimi ne pule atu ei a Iotama te tama tagata a te tupu+ i te fale,* o fakamasino a tino o te fenua.+ 6 Kae ko te tala fakasolopito kātoa o Asalia,+ ana mea katoa ne fai, e a, e se tusi katoa i te tusi o tala fakasolopito i taimi o tupu o Iuta? 7 Tenā ne takato ifo ei a Asalia o malō‵lo fakatasi mo ana tupuga,+ kae ne tanu ne latou a ia fakatasi mo ana tupuga i te Fakai o Tavita; kae ko tena tama tagata ko Iotama ne fai mo tupu e sui ei a ia.

8 I te 38 tausaga o te pulega a te tupu o Iuta ko Asalia,+ ne fai a Sakalia+ te tama tagata a Ielopoamo mo fai te tupu o Isalaelu i Samalia, kae ne pule a ia i masina e ono. 9 Ne fai ne ia a mea ma‵sei i te kilokiloga a Ieova, e pelā eiloa mo mea ne fai ne ana tupuga. Ne seki tiaki ne ia a agasala ne fai ne Ielopoamo te tama tagata a Nepata kolā ne fai ei ke agasala a tino Isalaelu.+ 10 Tenā ne fai ei ne Saluma te tama tagata a Iapese se togafiti o ‵teke atu ki a ia kae ta a ia+ i Ipeleamo.+ I te otiga ne tamate tou tagata, ne fai a ia mo tupu e sui ei a ia. 11 Kae ko te tala fakasolopito kātoa o Sakalia, e tusi katoa i te tusi o tala fakasolopito i taimi o tupu o Isalaelu. 12 Ne fakataunu i ei a pati a Ieova ne fai ki a Ieu: “E fa kautama o au tama tāgata+ ka saga‵saga i te nofogaaliki o Isalaelu.”+ Kae tenā eiloa te mea ne tupu.

13 A Saluma te tama tagata a Iapese ne fai mo tupu i te 39 tausaga o te pulega a te tupu o Iuta ko Usia+ kae ne pule a ia i se masina kātoa i Samalia. 14 Tenā ne vau ei a Manaema te tama tagata a Katei mai Tilesa+ ki Samalia o ta a Saluma+ te tama tagata a Iapese i Samalia. I te otiga ne tamate tou tagata, ne fai a ia mo tupu e sui ei a ia. 15 Kae ko te tala fakasolopito kātoa o Saluma mo tena togafiti ne fai, e tusi katoa i te tusi o tala fakasolopito i taimi o tupu o Isalaelu. 16 Tenā ne vau ei a Manaema mai Tilesa o ‵ta fakapalele a Tifesa mo tino katoa i loto i ei mo ana tuakoi katoa, me ne seki ‵tala ne latou ana mataloa ki a ia. Ne ‵ta ne ia te fakai kae saesae a tinae o fāfine fai‵tama i ei.

17 I te 39 tausaga o te pulega a te tupu o Iuta ko Asalia, ne fai a Manaema te tama tagata a Katei mo fai te tupu i Isalaelu, kae ne pule a ia ki Samalia i tausaga e sefulu. 18 Ne tumau a ia i te faiga o mea ma‵sei i te kilokiloga a Ieova. Ne seki tiaki ne ia a agasala katoa ne fai ne Ielopoamo te tama tagata a Nepata kolā ne fai ei ke agasala a Isalaelu,+ i tena olaga kātoa. 19 Ne vau a te tupu o Asulia ko Pulu+ ki te fenua, kae ne tuku atu ne Manaema ki a Pulu e 1,000 taleni* siliva ona ko tena fesoasoani o faka‵mautakitaki tena pulega i te malo.+ 20 Tenā ne fakaputu aka ei ne Manaema a siliva ne maua mai Isalaelu mai tāgata takutakua kae mau‵mea.+ Ne tuku atu ne ia ki te tupu o Asulia e 50 sekela* siliva ma tāgata taki tokotasi. Tenā ne foki ei te tupu o Asulia kae seki nofo i te fenua. 21 Kae ko te tala fakasolopito kātoa o Manaema,+ ana mea katoa ne fai, e a, e se tusi katoa i te tusi o tala fakasolopito i taimi o tupu o Isalaelu? 22 Tenā ne takato ifo ei a Manaema o malō‵lo fakatasi mo ana tupuga; kae ko tena tama tagata ko Pekaia ne fai mo tupu e sui ei a ia.

23 I te 50 tausaga o te pulega a te tupu o Iuta ko Asalia, ne fai a Pekaia te tama tagata a Manaema mo fai te tupu o Isalaelu i Samalia, kae ne pule a ia i tausaga e lua. 24 Ne tumau a ia i te faiga o mea ma‵sei i te kilokiloga a Ieova. Ne seki tiaki ne ia a agasala ne fai ne Ielopoamo te tama tagata a Nepata kolā ne fai ei ke agasala a Isalaelu.+ 25 Tenā ne fai ei ne tena ofisa o kautau ko Peka+ te tama tagata a Lemalia se togafiti o ‵teke ki a ia kae ta a ia i Samalia i te taoa malosi i te fale* o te tupu fakatasi mo Alikopa mo Alie. E toko 50 tāgata mai Kileata ne olo mo ia; kae i te otiga ne tamate ne ia, ne fai a ia mo tupu e sui ei a ia. 26 Kae ko te tala fakasolopito kātoa o Pekaia, ana mea katoa ne fai, e tusi katoa i te tusi o tala fakasolopito i taimi o tupu o Isalaelu.

27 I te 52 tausaga o te pulega a te tupu o Iuta ko Asalia, ne fai a Peka+ te tama tagata a Lemalia mo fai te tupu o Isalaelu i Samalia, kae ne pule a ia i tausaga e 20. 28 Ne tumau a ia i te faiga o mea ma‵sei i te kilokiloga a Ieova, kae ne seki tiaki ne ia a agasala ne fai ne Ielopoamo te tama tagata a Nepata kolā ne fai ei ke agasala a Isalaelu.+ 29 I aso o te tupu o Isalaelu ko Peka, ne fanatu a te tupu o Asulia ko Tikila-pilesa+ o puke a Itioni, Apelu-peta-maaka,+ Ianoa, Ketesa,+ Hasola, Kileata+ mo Kalilaia, ko fenua katoa o tino Nafatali,+ kae ne ave fakapagota ne ia a tino i ei ki Asulia.+ 30 Tenā ne fai ei ne Hosia+ te tama tagata a Ela se togafiti o ‵teke atu ki a Peka te tama tagata a Lemalia, ne ta ne ia tou tagata kae tamate atu; kae ne fai ei a ia mo tupu e sui ei tou tagata i te 20 tausaga o te pulega a Iotama+ te tama tagata a Usia. 31 Kae ko te tala fakasolopito kātoa o Peka, ana mea katoa ne fai, e tusi katoa i te tusi o tala fakasolopito i taimi o tupu o Isalaelu.

32 I te lua o tausaga o te pulega a Peka te tama tagata a Lemalia te tupu o Isalaelu, ne fai a Iotama+ te tama tagata a te tupu o Iuta ko Usia+ mo fai te tupu. 33 Ko 25 ana tausaga i te taimi ne fai ei a ia mo tupu, kae ne pule atu a ia ki Ielusalema i tausaga e 16. A te igoa o tena mātua ko Ielusa te tama fafine a Satoka.+ 34 Ne fai faeloa ne ia a te mea tonu i te kilokiloga a Ieova, e pelā eiloa mo mea ne fai ne tena tamana ko Usia.+ 35 Kae ko koga ma‵luga ne seki fakaseai, kae ko tino koi ofo atu eiloa a taulaga kae fai ke fanaka te au mai olotou taulaga i luga i koga ma‵luga konā.+ Ko ia te tino ne faite ne ia a te mataloa tafa ki luga o te fale o Ieova.+ 36 Kae ko te tala fakasolopito kātoa o Iotama mo ana mea ne fai, e a, e se tusi katoa i te tusi o tala fakasolopito i taimi o tupu o Iuta? 37 I aso konā ne kamata ei o uga atu ne Ieova a Lesina te tupu o Sulia mo Peka+ te tama tagata a Lemalia ke taua atu ki Iuta.+ 38 Tenā ne takato ifo ei a Iotama o malō‵lo fakatasi mo ana tupuga kae ne tanu fakatasi mo ana tupuga i te Fakai o Tavita tena tupuga. Kae ko tena tama tagata ko Aasa ne fai mo tupu e sui ei a ia.