Te Lua Tupu

3 A Iolama+ te tama tagata a Aapo ne fai mo tupu o Isalaelu i Samalia i te 18 tausaga o te pulega a te tupu o Iuta ko Iosefatu, kae ne pule a ia i tausaga e 12. 2 Ne fai faeloa ne ia a mea ma‵sei i te kilokiloga a Ieova, kae e se pelā mo te masei o tena tamana io me ko tena mātua, me ne fakaseai ne ia a pou fatu tapu o Paala kolā ne faite ne tena tamana.+ 3 Kae ne ‵piki ‵mau eiloa a ia ki agasala a Ielopoamo te tama tagata a Nepata kolā ne fai ei ke agasala a Isalaelu.+ Ne seki tiaki eiloa ne ia a mea konā.

4 A Mesa te tupu o Moapi se tausi mamoe, kae e masani o ‵togi sāle atu ne ia a tamā mamoe e 100,000 mo mamoe tāgata ma‵tua e 100,000 kolā e seki ‵vele olotou fulufulu ke fakaaloalo atu ki te tupu o Isalaelu. 5 I te taimi ne mate ei a Aapo,+ ne ‵teke atu te tupu o Moapi ki te tupu o Isalaelu.+ 6 Tenā ne fano ei te tupu o Samalia ko Iolama o fakamaopoopo a Isalaelu kātoa i te aso tenā. 7 Ne uga foki ne ia se fekau ki te tupu o Iuta ko Iosefatu, ana muna: “A te tupu o Moapi ko ‵teke mai ki a au. E a, e vau koe ke olo tāua o taua atu ki te kau Moapi?” Kae ne tali atu a ia: “Au ka fanatu.+ Au e ‵pau eiloa mo koe. A oku tino e ‵pau eiloa mo ou tino. Aku solofanua e ‵pau eiloa mo au solofanua.”+ 8 Tenā ne fesili atu ei a ia: “Ko te auala fea ka olo aka ei tatou?” Ne tali mai a ia: “I te auala ki te koga lavaki o Etoma.”

9 Tenā ne olo atu ei te tupu o Isalaelu fakatasi mo te tupu o Iuta mo te tupu o Etoma.+ Mai tua o te malaga a latou i aso e fitu, ne seki ai ne vai ma tino o te kautau mo manu fagai kolā e tau‵tali atu i olotou tua. 10 Ne fai aka te tupu o Isalaelu: “Mafaga o mea masei! Ne fakamaopoopo ne Ieova a tupu e tokotolu konei, ke tuku atu fua ki lima o tino Moapi!” 11 Tenā ne fai atu ei a Iosefatu: “E a, e seai se pelofeta a Ieova i konei ke mafai ne tatou o fesili atu ki a Ieova?”+ Kae ne tali atu se tavini e tokotasi a te tupu o Isalaelu: “Ko Elisaia+ te tama tagata a Safata telā ne ‵ligi sāle ne ia a vai ki lima o Elia.”*+ 12 Ne fai atu a Iosefatu: “E faipati mai eiloa a Ieova e auala i a ia.” Tenā ne olo ifo ei a te tupu o Isalaelu mo Iosefatu mo te tupu o Etoma ki a ia.

13 Ne fai atu a Elisaia ki te tupu o Isalaelu: “Ne a aku mea ka fai ki a koutou?+ Olo atu ki pelofeta a otou tamana mo pelofeta a otou mātua.”+ Kae ne fai atu te tupu o Isalaelu ki a ia: “Ikai, me ko Ieova ne fakamaopoopo mai ne ia a tupu e tokotolu konei ke tuku atu ki lima o Moapi.” 14 Tenā ne fai atu ei a Elisaia: “E pelā eiloa mo Ieova o kautau e ola, ko ia telā e tavini* au ki ei, moi se āva au ki te tupu o Iuta ko Iosefatu,+ ka se kilo atu eiloa au ki a koe io me saga atu ki a koe.+ 15 Aumai ki a au se tino tātā kitala.”+ I te taimi eiloa ne kamata ei o tātā te kitala a te tino tātā kitala, ne oko atu te ‵mana o Ieova ki luga i a ia.+ 16 Ne fai atu a ia, “Konei a pati a Ieova ne fai mai: ‘Keli ne lua i te vanu tenei, 17 me konei a pati a Ieova ne fai mai: “Ka seai se matagi, kae ka seai ne vaiua; kae ko te vanu tenei ka ‵fonu eiloa i vai,+ kae ka inu koutou mai i ei, ko koutou mo otou lafu manu, mo nisi manu a koutou.”’ 18 Kae ko te mea tenei se mea faigofie fua i te kilokiloga a Ieova,+ me ka tuku atu foki ne ia a Moapi ki otou lima.+ 19 E ‵tau mo koutou o ofa ki lalo so se fakai e isi ne olotou ‵pui+ mo toe fakai ‵lei, e ‵tau o ‵kati ki lalo ne koutou a lakau ‵lei katoa, e ‵tau o tanu ne koutou a koga katoa e isi ne vai i ei, kae e ‵tau o fakamasei ne koutou ki fatu a laukele ‵lei katoa.”+

20 Kae i te tafataeao, i te taimi e ofo atu ei te taulaga meakai i te tafataeao,+ ne ‵sali mai te vai mai te feitu ki Etoma, kae ne ‵fonu te fenua i vai.

21 Ne ‵logo a tino Moapi katoa me i tupu ko o‵mai o taua ki a latou, tenā ne fakamaopoopo fakatasi ei ne latou a tāgata katoa kolā e mafai o ave meatau, kae olo atu o ‵tu i te tuakoi. 22 I te lotou ala akaga i te tafataeao ‵malu, ne ‵kasa atu te la ki luga i te vai, kae i te kilokiloga a tino Moapi i te suā feitu ne foliga kula te vai e pelā me ne toto. 23 Ne fai atu latou: “A mea konei ne toto! E mautinoa eiloa me ko oti ne fakatau tamate ne tupu a latou eiloa ki te pelu. Tino Moapi, ‵tou olo o puke a mea o te taua!”+ 24 I te lotou okoatuga ki koga e ‵nofo ei te kautau a Isalaelu, ne ‵tu aka a tino Isalaelu kae kamata o ‵ta a tino Moapi kolā ne ‵tele kea‵tea mai i a latou.+ Ne olo atu latou ki loto i Moapi, kae ‵ta eiloa a tino Moapi i te lotou auala. 25 Ne ofa ki lalo ne latou a fakai, kae ko tāgata taki tokotasi ne pei ne latou se fatu ki loto i laukele ‵lei katoa o te fenua o faka‵fonu ki fatu; ne tanu ne latou a vai katoa,+ kae ‵kati ki lalo a lakau ‵lei katoa.+ Fakamuli loa, ne ‵toe mai fua te ‵pui fatu o Kila-helesi,+ kae ne fakatamilo ne tino e fakaaoga siligi kae ofa ne latou ki lalo.

26 I te laveaga ne te tupu o Moapi me ko takavale latou i te taua, ne puke ne ia a tāgata e toko 700 kolā e isi ne olotou pelu kae olo o taua atu ki te tupu o Etoma;+ kae ne seki mafai ne latou o manumalo i ei. 27 Tenā ne puke ei ne ia tena toekimua tagata telā ka sui i a ia kae ofo atu e pelā me se taulaga ‵sunu+ i luga i te ‵pui. Kae ne kaitaua malosi latou ki tino Isalaelu, tenā ne olo kea‵tea ei a tino Isalaelu mai te taua atu ki a ia kae toe ‵foki atu ki te lotou fenua.