Te Muamua Nofoaiga Tupu

21 Tenā ne tu aka ei a Satani* o ‵teke ki tino Isalaelu kae ne fakamalosi atu ki a Tavita ke lau te aofaki o tino Isalaelu.+ 2 Ne fai atu a Tavita ki a Ioapo+ mo takitaki o tino: “Olo o lau aka a tino Isalaelu mai Pelesepa ke oko ki Tanu;+ ko lipoti mai ei ki a au ko te mea ke iloa ne au te lotou aofaki.” 3 Kae ne fai atu a Ioapo: “Ke fakatokouke eiloa ne Ieova ana tino faka-100 taimi! Toku aliki te tupu, e a, e seki fai a latou katoa konei e pelā me ne tavini a toku aliki? Kaia e manako ei toku aliki o fai te mea tenei? Kaia e fai ei tou tagata mo pogai e agasala ei a tino Isalaelu?”

4 Kae ne manumalo eiloa te fakatonuga a te tupu i a Ioapo. Tenā ne fano ei a Ioapo kae faimalaga atu i loto i Isalaelu, oti aka, vau ei a ia ki Ielusalema.+ 5 Ne tuku atu ne Ioapo ki a Tavita a te aofaki o tino kolā ne fakamau olotou igoa. A te aofaki o tāgata Isalaelu katoa kolā e isi ne olotou pelu e toko 1,100,000, kae ko tāgata Iuta kolā e isi ne olotou pelu+ e toko 470,000. 6 Kae ko te kau Levi mo tino Peniamina ne seki aofia i a latou+ kolā ne fakamau olotou igoa, me ne takalialia a Ioapo+ ki te fakatonuga a te tupu.

7 Ne seki fiafia a te Atua tonu ki te mea tenei, tenā ne fakasala ei ne ia a Isalaelu. 8 Tenā ne fai atu ei a Tavita ki te Atua tonu: “Ko oti ne fai ne au se agasala+ masei ‵ki i te faiga o te mea tenei. I te taimi nei, fakamolemole fakamagalo mai te mea ‵se+ a tau tavini, me ko oti ne fai ne au se mea valea ‵ki.”+ 9 Kae ne faipati atu a Ieova ki a Kato,+ te tino fakamatala fakaasiga a Tavita, ana muna: 10 “Fano o fai atu ki a Tavita, ‘Konei a pati ne fai mai ne Ieova: “E tolu a mea ka tuku atu ne au ki a koe. Filifili aka a te mea telā e ‵tau o fai ne au ki a koe.”’” 11 Tenā ne vau ei a Kato ki a Tavita kae fai atu ki ei: “Konei a pati a Ieova ne fai mai, ‘Filifili aka te mea telā e manako koe ki ei  12 me e ‵tau o poko se oge+ i tausaga e tolu, io me ka fakatakavale koe ne ou fili i loto i se tolu masina i te taimi e fakaoko+ atu ei te pelu a ou fili ki a koe, io me ke oko atu te pelu a Ieova i aso e tolu—ko famai i te fenua+—kae ka fakamasei+ ne te agelu a Ieova a kogā fenua katoa o Isalaelu.’ Nei la, ke mafaufau koe ki te tali e ‵tau o fai atu ne au ki te Atua telā ne uga mai ne ia au.” 13 Ne fai atu a Tavita ki a Kato: “Ko oko loa au i te mafatia. Fakamolemole, tuku atu au ki lima o Ieova, me e lasi ‵ki+ tena alofa fakamagalo; kae sa tuku atu au ki lima o se tagata.”+

14 Tenā ne fai ei ne Ieova ke poko se famai+ i Isalaelu, telā ne ‵mate+ i ei a tino Isalaelu e toko 70,000. 15 E se gata i ei, ne uga atu ne te Atua tonu se agelu o fakamasei a Ielusalema; kae i te taimi ko pili ei o fai ne ia te mea tenā, ne lavea ne Ieova te mea tenā kae ne fanoanoa a ia ona ko te fakalavelave+ tenā, kae ne fai atu a ia ki te agelu telā e aumai ne ia te fakamaseiga: “Ko lava!+ Tuku ki lalo tou lima.” A te agelu a Ieova ne tu pili atu ki te koga tuki saito a Onano+ te tino Iepuse.+

16 I te kiloakaga a Tavita, ne lavea ne ia a te agelu a Ieova e tu i te va o te lalolagi mo te lagi mo te pelu+ i tena lima e fakasino atu ki Ielusalema. Ne faka‵siga fakavave ifo a Tavita mo te kau toeaina, e ‵pei ki gatu lautaga,+ mo olotou mata e ‵fuli ki te laukele.+ 17 Ne fai atu a Tavita ki te Atua tonu: “E a, e se ko au ne fai atu ke lau aka a tino? Ko au te tino ne agasala, kae ko au te tino fai mea ‵se;+ kae ko mamoe konei—ne a olotou mea ne fai? Ieova toku Atua, fakamolemole fakaoko mai tou lima ki a au mo te kāiga o toku tamana; kae sa aumai te mala tenei ki ou tino.”+

18 Tenā ne fai atu ei te agelu a Ieova ki a Kato+ ke fai ki a Tavita ke fano o fakatu se fatafaitaulaga ki a Ieova i te koga tuki saito a Onano te tino Iepuse.+ 19 Tenā ne fano ei a Tavita e ‵tusa mo te pati a Kato telā ne fai mai ne ia i te igoa o Ieova. 20 I te taimi tenā, ne ‵fuli aka a Onano kae lavea ne ia te agelu, kae ko ana tama tāgata e tokofa kolā ne ‵nofo mo ia i konā ne olo o ‵muni. A Onano ne tuki ana saito. 21 I te fanatuga a Tavita ki a ia, ne kilo atu a Onano kae lavea ne ia a Tavita, kae ne fano fakavave a ia ki tua mo te koga tuki saito kae ifo ki a Tavita mo ana mata e ‵fuli ki te laukele. 22 Muna a Tavita ki a Onano: “Fakatau* mai ki a au tau koga tuki saito, ke fakatu ne au i ei se fatafaitaulaga mō Ieova. Fakatau mai ki a au i tena ‵togi kātoa, ko te mea ke fakagata+ aka a te mala tenei e poko i tino.” 23 Kae ne fai atu a Onano ki a Tavita: “Puke ma koe te koga tenā, kae ke fai ne toku aliki te tupu so se mea telā e ‵lei ki a ia. Ko tuku atu ne au ki a koe a pulumakau mo fai a taulaga ‵sunu mo te mea tuki saito+ mo fai a fafie mo saito mo fai te taulaga meakai. E tuku atu ne au a mea katoa konei.”

24 Kae ne fai atu te Tupu ko Tavita ki a Onano: “Ikai, e ‵tau o ‵togi ne au ki tena ‵togi kātoa, me ka se puke ne au a mea a koe kae tuku atu ki a Ieova io me ofo atu a taulaga ‵sunu kolā e seki ‵togi ne au.”+ 25 Tenā ne tuku atu ei ne Tavita ki a Onano a sekela* e 600 e ‵tusa mo te ‵mafa o aulo mō te koga tenā. 26 Kae ne faite ne Tavita se fatafaitaulaga+ ki a Ieova i konā kae ofo atu i ei a taulaga ‵sunu mo taulaga ‵kai fakatasi, kae ne kalaga atu a ia ki a Ieova, telā ne tali mai ki a ia mai te lagi e auala i te afi+ telā ne ‵ka i ei te taulaga ‵sunu i luga i te fatafaitaulaga. 27 Tenā ne fai atu ei te fakatonuga a Ieova ki te agelu+ ke fakafoki tena pelu ki te koga e tuku i ei. 28 I te taimi tenā, i te laveaga ne Tavita me ko tali mai a Ieova ki a ia i te koga tuki saito a Onano te tino Iepuse, ne ofo atu faeloa ne ia a taulaga i konā. 29 Kae ne ‵tu eiloa te faleie tapu o Ieova telā ne faite ne Mose i te koga lavaki mo te fatafaitaulaga o taulaga ‵sunu i te koga maluga i Kipeona+ i te taimi tenā. 30 Ne seki mafai ne Tavita o fanatu ki mua i ei o faipati ki te Atua, me ne mataku a ia ona ko te pelu a te agelu a Ieova.