Te Muamua Nofoaiga Tupu

5 Konei a tama tāgata a Leupena,+ te toekimua a Isalaelu. A ia ko te toekimua, kae ona ko te mea ne fakalailai* ne ia te moega o tena tamana,+ ne tuku atu ei tena tulaga toekimua ki tama tāgata a Iosefa+ te tama tagata a Isalaelu, telā ne seki tusi ei tena igoa i te gafa o te toekimua. 2 E tiga eiloa e fai pelā i a Iuta+ e maluga atu i ana taina kae vau mai i a ia te tino telā ka fai mo takitaki,+ kae ko te tulaga o te toekimua ne tuku atu ki a Iosefa. 3 A tama tāgata a Leupena te toekimua a Isalaelu ko Hanoka, Palu, Eselona mo Kami.+ 4 A tama tāgata a Ioelu ko Semaia, a te tama tagata a Semaia ko Koka, a te tama tagata a Koka ko Simei, 5 a te tama tagata a Simei ko Mika, a te tama tagata a Mika ko Leaia, a te tama tagata a Leaia ko Paala, 6 kae ko te tama tagata a Paala ko Pelaa telā ne ave fakapagota ne te tupu o Asulia ko Tikila-pilinesa;+ a ia se takitaki o tino Leupena. 7 Ana taina kolā ne tusi olotou igoa i te gafa o olotou kāiga e ‵tusa mo olotou tupuga, ko te takitaki ko Ieiela, Sakalia 8 mo Pela te tama tagata a Asasa te tama tagata a Sema te tama tagata a Ioelu, telā ne nofo i Aloela+ ke oko atu eiloa ki Nepo mo Pala-meono.+ 9 I te feitu ki saegala ne nofo a ia i te kamataga o te koga lavaki i tafa o te Vaitafe ko te Eufilate,+ me ko gasolo o uke olotou lafu manu i te fenua o Kileata.+ 10 I aso o Saulo, ne taua atu latou ki tino Hakili, kolā ne takavale i olotou mua, tenā ne ‵nofo ei latou i olotou faleie i kogā koga katoa i te feitu ki saegala o Kileata.

11 A tino Kato ne ‵nofo i olotou tafa i te fenua o Pasana ke oko atu eiloa ki Saleka.+ 12 I Pasana, a Ioelu ko te takitaki, a Safama ko te tokolua, mo Ianaai mo Safata. 13 Kae ko olotou taina i kāiga o olotou tamana ko Mikaele, Mesulama, Seepa, Iolai, Iakana, Siia mo Epela, e tokofitu katoa latou. 14 Konei a tama tāgata a Apihaila te tama tagata a Huli te tama tagata a Ialoa te tama tagata a Kileata te tama tagata a Mikaele te tama tagata a Iesisai te tama tagata a Iato te tama tagata a Pusa. 15 Ahi te tama tagata a Apitielu te tama tagata a Kuni ko te ulu o te kāiga i te lotou tamana. 16 Ne ‵nofo latou i Kileata,+ i Pasana+ mo ana fakai fo‵liki,* mo laukele moukuā katoa o Salona ke oko ki te koga e gata i ei. 17 Ne tusi katoa olotou igoa i te fakasologa o gafa i aso o te tupu o Iuta ko Iotama+ mo aso o te tupu o Isalaelu ko Ielopoamo.*+

18 A tino Leupena, tino Kato mo te āfa o te matakāiga o Manase e toko 44,760 tāgata ‵toa i te lotou kautau kolā e ave sāle ne latou a talita mo pelu kae isi ne olotou kausana, kae ne akoakogina latou i taua. 19 Ne taua atu latou ki tino Hakili,+ Ietula, Nafiso+ mo Notapu. 20 Kae ne maua ne latou te fesoasoani i te taimi ne taua atu ei ki a latou, tenā ne tuku atu ei a tino Hakili mo tino katoa kolā ne olo fakatasi mo latou ki olotou lima, me ne ka‵laga atu latou ki te Atua mō se fesoasoani i te taua, kae ne saga atu a ia ki te lotou fakatagi me ne tali‵tonu latou ki a ia.+ 21 Ne puke ne latou olotou lafu manu—e 50,000 kamela, 250,000 mamoe kae 2,000 asini—e pelā foki mo tino e toko 100,000. 22 E tokouke a tino ne ‵mate me ko te Atua+ tonu tenā ne taua atu i ei. Kae ne ‵nofo eiloa latou i te lotou koga ke oko ki te taimi ne ave fakapagota+ ei latou.

23 A tino ne ‵tupu mai i te āfa o te matakāiga o Manase+ ne ‵nofo i te laukele o Pasana ke oko ki Paala-helemoni mo Senila mo te Mauga o Helemoni.+ E tokouke latou. 24 Konei a ulu o kāiga i olotou tamana: ko Efala, Isi, Elielu, Asilieelu, Ielemia, Hotavia mo Iatielu; a latou ne tāgata ‵toa, ne tāgata takutakua, kae ko ulu o kāiga i olotou tamana. 25 Kae ne seki fakamaoni latou ki te Atua o olotou tupuga kae fai ne latou faifaiga fakatauavaga sē ‵tau* mo atua o tino o te fenua,+ kolā ne afuli kea‵tea ne te Atua mai i olotou mua. 26 Tenā ne fakamalosi aka ei ne te Atua se manatu* i te loto o te tupu o Asulia+ ko Pulu (telā ko te tupu o Asulia ko Tikila-pilinesa)+ ko te mea ke ave fakapagota ne ia a tino Leupena, tino Kato, mo te āfa o te matakāiga o Manase kae avatu latou ki Hala, Hapola, Halaa mo te vaitafe i Kosana,+ te koga e ‵nofo latou i ei ke oko mai ki te aso nei.