Te Lua Nofoaiga Tupu

15 Ne oko mai te agaga o te Atua ki luga i a Asalia te tama tagata a Oteta. 2 Tenā ne fano ei a ia o fakafetaui ki a Asa kae fai atu ki ei: “Faka‵logo mai ki a au, e Asa fakatasi mo Iuta mo Peniamina kātoa! A Ieova e fakatasi mo koutou māfai e tumau koutou i a ia;+ kae kafai e ‵sala koutou ki a ia, ka maua eiloa ne koutou a ia,+ kae kafai e tiaki ne koutou a ia, ka tiaki foki ne ia koutou.+ 3 Ko leva eiloa* ne ‵nofo a tino Isalaelu e aunoa mo te Atua tonu, e aunoa mo se faitaulaga ke akoako latou, kae e aunoa foki mo te tulafono.+ 4 Kae i taimi e puapuaga ei latou e ‵foki mai latou ki a Ieova te Atua o Isalaelu kae ‵sala atu ki a ia, kae maua eiloa ne latou a ia.+ 5 I taimi konā e seai se tino e mafai o faimalaga mo te filemu,* me e seai se filemu e maua i tino o te fenua. 6 Ne tuki pala ne te atufenua e tasi a te suā atufenua mo te fakai e tasi a te suā fakai, me ne fai ne te Atua ke ‵numi valevale latou fakatasi mo vaegā puapuaga kese‵kese.+ 7 Kae ko koe, fakamalosi kae sa loto vāivāi,*+ me ka isi eiloa se taui e maua ona ko au galuega.”

8 I te lagonaga ne Asa a pati konei mo te valoaga a te pelofeta ko Oteta, ne loto malosi tou tagata kae tapale kea‵tea ne ia a tupua fakatakalia‵lia mai fenua katoa o Iuta+ mo Peniamina kae mai fakai kolā ne puke ne ia i te koga maugā o Efalaima, kae ne toe fai faka‵lei ne ia te fatafaitaulaga a Ieova telā e tu i mua o te fakaosoga o te fale o Ieova.+ 9 Kae ne fakamaopoopo fakatasi ne ia a Iuta mo Peniamina kātoa mo tino fakaa‵tea kolā e ‵nofo tasi latou mai Efalaima mo Manase mo Simeona,+ me ne ‵tele mai se aofaki lasi o latou ki a ia mai Isalaelu i te laveaga ne latou i a Ieova tena Atua e ‵kau fakatasi ki a ia. 10 Tenā ne maopoopo fakatasi ei a latou i Ielusalema i te tolu o masina o te 15 tausaga o te pulega a Asa. 11 I te aso tenā ne ofo atu ne latou a taulaga ki a Ieova mai mea kolā ne puke mai ne latou i te taua, e 700 pulumakau kae 7,000 mamoe. 12 E se gata i ei, ne fai ne latou se feagaiga ke ‵sala atu latou ki a Ieova te Atua o olotou tupuga mo olotou loto kātoa mo olotou ola* kātoa.+ 13 So se tino e se ‵sala ki a Ieova te Atua o Isalaelu e ‵tau o tamate, faitalia me se tamaliki foliki io me se tino matua, se tagata io me se fafine.+ 14 Tenā ne fai ei te lotou tautoga ki a Ieova i se leo maluga, kae paka‵laga mo te fia‵fia, fakatasi mo pu mo piukila. 15 Kae ne fia‵fia a Iuta kātoa ki te tautoga, me ne fai ne latou te tautoga tenā mo olotou loto kātoa kae ne ‵sala atu latou ki a ia mo te loto fiafia kae ne maua ne latou a ia,+ kae ne tumau a Ieova i te tukuatuga o te filemu ki a latou i koga katoa.+

16 Ne tapale kea‵tea ne te tupu ko Asa a tena tupuna fafine ko Maaka+ mai tena tulaga e pelā me ko te tupu fafine, me ne faite ne tou fafine se tupua matagā ke tapuaki ki ei i te pou lakau tapu.*+ Ne ‵kati ki lalo ne Asa a tupua matagā a tou fafine kae fakamasei ne ia kae ‵sunu i te Vanu o Ketalono.+ 17 Kae ko koga ma‵luga ne seki fakaseai+ i Isalaelu.+ E se gata i ei, ne katoatoa* eiloa a te loto o Asa i tena olaga kātoa.+ 18 Kae ne aumai ne ia a mea kolā ne fakatapu ne lāua mo tena tamana ki loto i te fale o te Atua tonu—ko siliva, aulo mo meāfale valevale.+ 19 Ne seki ai eiloa se taua ne tupu ke oko ki te 35 tausaga o te pulega a Asa.+