Te Lua Nofoaiga Tupu

5 Ne fakapalele ne Solomona a galuega katoa ne ‵tau o fai ne ia ki te fale o Ieova.+ Tenā ne aumai ei ne Solomona ki loto a mea ne fakatapu ne tena tamana ko Tavita,+ kae tuku ne ia a siliva, aulo, mo nisi mea katoa ki loto i te potu ‵teu koloa o te fale o te Atua tonu.+ 2 I te taimi tenā ne fakamaopoopo ne Solomona a toeaina o Isalaelu, ulu katoa o matakāiga, mo takitaki o kāiga o Isalaelu i olotou tamana. Ne o‵mai latou ki Ielusalema o aumai te pusa o te feagaiga a Ieova mai te Fakai o Tavita,+ telā ko Siona.+ 3 Ne maopoopo mai a tāgata katoa o Isalaelu i mua o te tupu i te taimi o te ‵kaiga fiafia* telā ne fai i te fitu o masina.+

4 Tenā ne olo atu ei a toeaina katoa o Isalaelu kae ne sau aka ne tino Levi a te Pusa.+ 5 Ne aumai ne latou te Pusa, te faleie o maopoopoga,+ mo meāfale tapu katoa i loto i te faleie. Ne aumai ne faitaulaga mo tino Levi* a mea konā. 6 A te Tupu ko Solomona mo te maopoopoga kātoa o tino Isalaelu kolā ne fakatonu ki ei ke fetaui mo ia, ne ‵tu atu i mua o te Pusa. Ko oko eiloa i te uke o mamoe mo pulumakau ne ofo+ atu telā ko se mafai ei o lau aka io me iloa te aofaki. 7 Tenā ne aumai ei ne faitaulaga a te pusa o te feagaiga a Ieova ki tena tulaga, i loto i te potu tafa ki loto o te fale, ko te Potu Tafasili i te Tapu, mai lalo i kapakau o kelupi.+ 8 A kapakau o kelupi ne ‵fola mai luga o te tulaga o te Pusa, ko te mea ke fakamalu ne kelupi mai luga a te Pusa mo ana amo.+ 9 A amo e ‵loa ‵ki telā ko mafai ei o lavea atu a mata o amo mai te Potu Tapu i mua o te potu tafa ki loto, kae e se mafai o lavea mai i tua. Kae koi tuku eiloa i konā ke oko mai ki te aso nei. 10 E seai ne mea i loto i te Pusa kae ko papa fatu fua e lua kolā ne tuku atu ne Mose ki loto i ei i Holepa,+ i te taimi ne fai ei ne Ieova se feagaiga+ mo tino Isalaelu i te lotou o‵maiga ki tua mo Aikupito.+

11 I te taimi ne o‵mai ei a faitaulaga ki tua mo te koga tapu (me i faitaulaga katoa kolā ne ‵nofo i konā ko oti ne fakatapu olotou foitino,+ faitalia te potukau e ‵kau latou i ei),+ 12 a tino Levi usuusu katoa+ mai te kāiga o Asafo,+ Hemanu+ mo Ietutunu+ mo olotou tama tāgata mo olotou taina e ‵pei katoa ki gatu mai laugatu ‵lei, kae puke ne latou a sumepalo, mea fakatagi‵tagi e isi ne uka i ei mo kitala; ne ‵tu latou i te feitu ki saegala o te fatafaitaulaga, kae ne ‵tu fakatasi mo latou ko faitaulaga e toko 120 kolā e faka‵tagi ne latou a pu.+ 13 I te taimi eiloa ne ‵viki kae fakafetai fakatasi atu ei a tino faka‵tagi pu mo tino usuusu ki a Ieova, kae fanaka foki te ‵tagi o pu, sumepalo mo nisi mea fakatagi‵tagi i te taimi e ‵viki atu ei latou ki a Ieova, “me i a ia e ‵lei; a tena alofa fakamaoni e tumau ki te se-gata-mai,”+ ko te mea eiloa ko ‵fonu a te fale, ko te fale o Ieova i te kaumana.+ 14 Ne seki mafai ne faitaulaga o ‵tu o tavini atu ona ko te kaumana, me ko ‵fonu eiloa te fale o te Atua tonu i te ‵malu o Ieova.+