Eseta

5 I te tolu o aso+ ne pei ei a Eseta ki ana gatu fakatupu kae tu i te koga ateatea tafa ki loto o te fale o te tupu telā e tu fakafesagai ki te fale o te tupu, kae ko te tupu e sagasaga i tena nofogaaliki i te fale o te tupu telā e fakafesagai atu ki te mataloa. 2 I te laveaga eiloa ne te tupu a te Tupu Fafine ko Eseta e tu i te koga ateatea, ne fiafia tou tagata, kae sisi aka tena tokotoko aulo+ i tena lima ki a Eseta. Tenā ne fanatu ei a Eseta kae fakapatele atu ki te mata o te tokotoko.

3 Ne fesili atu te tupu ki tou fafine: “Se a te fakalavelave, e te Tupu Fafine ko Eseta? Se a te mea e manako koe ki ei? Ke oko foki eiloa ki te āfa o toku malo ka tuku atu eiloa ne au ki a koe!” 4 Ne tali atu a Eseta: “Kafai e fiafia te tupu ki ei, ke o‵mai koulua mo Hamanu+ ki te ‵kaiga telā ko oti ne fakatoka ne au mō koe i te aso nei.” 5 Ne fai atu te tupu ki ana tāgata: “Fai atu ki a Hamanu ke vau fakavave, e ‵tusa mo te fakamolemole a Eseta.” Tenā ne olo atu ei a te tupu mo Hamanu ki te ‵kaiga ne fakatoka ne Eseta.

6 I te taimi ne inu uaina ei latou, ne fai atu te tupu ki a Eseta: “Se a tau fakamolemole? Ka tuku atu eiloa ki a koe! Kae se a te mea e manako koe ki ei? Ka tuku atu eiloa ne au te āfa o toku malo ki a koe!”+ 7 Ne tali atu a Eseta: “Tenei taku fakamolemole mo te mea e manako au ki ei, 8 Kafai e fiafia mai te tupu ki a au kae talia ne te tupu a taku fakamolemole kae fai ne ia a te mea e manako au ki ei, ke o‵mai fakatasi koulua mo Hamanu ki te ‵kaiga ka fai ne au mō koulua ma taeao; kae taeao ko fai ei ne au te mea ne fai mai te tupu ki ei.”

9 I te aso tenā ne fano kea‵tea a Hamanu mo te lifu kae fiafia tena loto. Kae i te laveaga ne Hamanu a Moletekai i te mataloa o te palesi o te tupu kae iloa ne ia me ne seki tu aka tou tagata mo te mataku ki a ia, ne kaitaua malosi a Hamanu ki a Moletekai.+ 10 Kae ne fa‵ki ne Hamanu te mea tenā kae fano ki tena fale. Tenā ne ‵kami mai ei ne ia ana taugasoa mo tena avaga ko Selesa.+ 11 Ne faipati fakamatamata a Hamanu e uiga ki tena maumea, ana tama tāgata e tokouke,+ mo te auala ne siki aka ei a ia ne te tupu ki se tulaga maluga kae fakamaluga aka a ia i nisi pelenise mo tavini a te tupu.+

12 Ne toe fai atu a Hamanu: “Kae sili atu i ei, e seai se isi tino aka ne ‵kami ne te Tupu Fafine ko Eseta kae na ko au ke olo fakatasi atu mo te tupu ki te ‵kaiga ne fakatoka ne ia.+ E isi foki soku ‵kamiga i te aso ma taeao ke ‵kai fakatasi mo tou fafine mo te tupu.+ 13 Kae e seai eiloa se aoga o mea katoa konei māfai ko lavea ne au a Moletekai te tino Iutaia e sagasaga i te mataloa o te palesi o te tupu.” 14 Ne fai atu tena avaga ko Selesa mo ana taugasoa katoa ki a ia: “Fakatu aka se pou e 50 kupita* te loa. Kae i te tafataeao ko fai ei koe ki te tupu me e ‵tau o fakatautau a Moletekai i luga i ei.+ Tenā ko olo fakatasi ei koe mo te tupu o fia‵fia i te ‵kaiga.” Ne ‵lei ki a Hamanu te manatu tenei, tenā ne fakatu aka ei ne ia se pou.