Eseta
7 Ne olo atu a te tupu mo Hamanu+ ki te ‵kaiga a te Tupu Fafine ko Eseta. 2 Ne toe fai atu a te tupu ki a Eseta i te lua o aso i te taimi ko inu uaina ei: “Se a tau fakamolemole, e te Tupu Fafine ko Eseta? Ka tuku atu eiloa ki a koe. Kae se a te mea e manako koe ki ei? Ke oko foki eiloa ki te āfa o toku malo ka tuku atu eiloa ne au ki a koe!”+ 3 Ne tali atu a te Tupu Fafine ko Eseta: “Kafai e fiafia koe ki ei, e te tupu kae talia ne koe e te tupu, au e fakamolemole atu ke fakaola aka au, kae fakatagi atu au ke faka‵sao foki oku tino.+ 4 I a matou ko oti ne fakatau atu,+ ko au fakatasi mo oku tino, ke ‵ta fakapalele, ke tamate kae ke fakaseai.+ Moi ne fakatau atu fua matou ke fai pelā me ne pologa tāgata mo pologa fāfine, e nofo malie eiloa au. Kae ko te fakalavelave faigata tenei e sē se mea ‵tau, me ka fakamasei atu i ei ki te tupu.”
5 Tenā ne fai atu ei te tupu ko Asuelu ki te Tupu Fafine ko Eseta: “Ko oi te tino tenā, kae tefea te tagata loto toa ne fai ne ia te mea tenei?” 6 Muna a Eseta: “A te tagata masei telā ko te fili ko te tino matagā tenei ko Hamanu.”
Ne polepole eiloa a Hamanu i te mataku ona ko te tupu mo te tupu fafine. 7 Ne tu aka a te tupu mo te kaitaua mai te ‵kaiga kae fano ki tua i te fatoaga o te palesi, kae ne tu aka a Hamanu o fakamolemole ki te Tupu Fafine ko Eseta ke fakasao a ia, me iloa ne ia me ka fakasala eiloa a ia ne te tupu. 8 Ne foki mai te tupu mai te fatoaga o te palesi ki te fale e fai ei te ‵kaiga kae lavea ne ia a Hamanu e fakapale atu ki luga i te nofoga e nofo ei a Eseta. Muna a te tupu: “E a, ka pukemālō foki ne ia te tupu fafine i loto i toku fale?” I te otiga eiloa o pati a te tupu, kae ufi ne latou a mata o Hamanu. 9 Ne fai atu a Halapono,+ se ofisa e tokotasi a te tupu: “Ne fakatoka ne Hamanu se pou mō Moletekai,+ telā ne fakasao ne ia te tupu e auala i tena lipoti.+ Ne fakatu a te pou tenā i te fale o Hamanu, e 50 kupita* te maluga.” Tenā ne fai atu ei te tupu: “Fakatautau atu a ia ki ei.” 10 Ne fakatautau ne latou a Hamanu i te pou ne fakatoka ne ia mō Moletekai, kae ne galo atu i ei te kaitaua o te tupu.