Iopu
11 Ne tali atu a Sofala+ te tino Naama:
2 “E a, ka seai eiloa se tali ki pati katoa konei,
Io me ko te lasi o te faipati ka fai ei ke tonu se tino?*
3 E a, ka ‵pono a gutu o tino ona ko au pati sē aoga?
E a, e seai se tino ka ‵liko ne ia koe ona ko au pati fakaitaita?+
5 Kae moi fai fua la ke faipati mai te Atua
Kae ‵tala mai ana laugutu ki a koe!+
6 Tenā ko fakaasi mai ei ne ia ki a koe a mea ‵funa o te poto,
Me i te poto e uke ana feitu.
Tenā ko iloa ei ne koe me e talia ne te Atua ke fakapuli atu a nisi mea ‵se a koe.
7 E mafai o iloa ne koe a mea ‵loto e uiga ki te Atua
Io me iloa a mea katoa e uiga ki* te Atua Malosi Katoatoa?
8 E maluga atu te poto tenā i te lagi. Se a tau mea e mafai o fai?
E ‵poko atu i te Tanuga.* Se a tau mea e iloa?
9 E loa atu i te lalolagi
Kae lauefa atu foki i te tai.
10 Kafai e fakasili aka a ia kae taofi ne ia se tino kae aumai ki te fono,
Ko oi e mafai o ‵teke atu ki a ia?
11 Me iloa ne ia māfai a tāgata ko amio fakaloiloi.
Kafai ko lavea ne ia a mea matagā, e a, ka se saga tonu a ia ki ei?
12 Kae ka fatoa malamalama te tagata valea
Māfai fua e mafai ne se asini vao o fanau mai se tagata.*
13 Moi ne fakatoka ne koe tou loto
Kae ‵fola atu ou lima ki a ia.
14 Kafai tou lima ne fai mea ‵se, tuku atu a mea konā ke ‵mao,
Kae ke mo a ma nofo te sē amiotonu i loto i ou faleie.
15 Tenā ko mafai ei o kilo ou mata ki luga e aunoa mo se pona;
E mafai ne koe o tu ‵mautakitaki, ko saoloto ei mai te mataku.
16 Tenā ko fakapuli ei ne koe ou fakalavelave;
Ka masaua fua ne koe te mea tenā e pelā me ne vai ne ‵tafe mai i ou tafa.
17 A tou olaga ka gasolo o maina atu i lō te la i te tutonu;
Ke oko ki tena pouliga ka ‵pau eiloa mo te tafataeao.
18 Ka isi se loto talitonu i a koe me e isi se fakamoemoega,
Kae ka kilokilo koe ki ou tafa kae takato ki lalo mo te tokagamalie.
19 Ka takato koe ki lalo, kae seai se tino e mataku koe ki ei,
Kae tokouke a tino ka ‵sala ki te taliaga a koe.
20 Kae ko mata o tino ma‵sei ka ‵kivi;
Kae ka se maua ne latou se koga ke ‵sao i ei,
Kae ko te lotou fakamoemoega fua e tasi ko te mate.”+