Iopu

2 Mai tua ifo, ne oko ki te aso ne ulu atu ei a tama tāgata a te Atua* tonu+ o ‵tu i olotou tulaga i mua o Ieova,+ kae ko Satani ne ulu atu foki i a latou o tu i tena tulaga i mua o Ieova.+

2 Tenā ne fai atu ei a Ieova ki a Satani: “A koe ne vau mai fea?” Ne tali atu a Satani ki a Ieova: “Mai te fanofanoga i te lalolagi kae sasale i ei.”+ 3 Kae ne fai atu a Ieova ki a Satani: “E a, kai lavea ne koe* taku tavini ko Iopu? E seai se tino e ‵pau mo ia i te lalolagi. A ia se tagata fai mea tonu kae fakamaoni,*+ e mataku ki te Atua kae ‵kalo kea‵tea mai mea ma‵sei. Koi puke ‵mautakitaki eiloa a ia ki tena fakamaoni,+ faitalia au taumafaiga ke ‵teke atu au ki a ia+ o fakaseai* a ia e aunoa mo se pogai.” 4 Kae ne tali atu a Satani ki a Ieova: “E sui fua te pa‵kili ki te pa‵kili. A te tagata ka tuku atu ne ia ana mea katoa ke tumau a ia i te ola. 5 Kae nei la, ‵kapa atu tou lima kae fakapakia atu tena ivi mo tena foitino, e mautinoa eiloa me ka muna masei a ia ki ou mata.”+

6 Tenā ne fai atu ei a Ieova ki a Satani: “Kiloke! Ko tuku atu tou tagata ki ou lima!* Ke mo a fua e puke koe ki tena ola!” 7 Tenā ne fano ei kea‵tea a Satani mai i mua o Ieova kae ta ne ia a Iopu ki fakafoa fakalogo‵mae*+ mai i ana alofivae ke oko ki luga i tena ulu. 8 Kae ne puke ne Iopu se potu ipu kele ke soisoi a ia ki ei, kae ne sagasaga a ia i lefu.+

9 Fakamuli loa, ne fai atu tena avaga ki ei: “E a, koi puke ‵mautakitaki eiloa koe ki tou fakamaoni? Muna masei atu ki te Atua, ko mate ei koe!” 10 Kae ne fai atu a ia ki tou fafine: “A koe e faipati pelā me se fafine valea. E a, e ‵tau fua o talia ne tatou a mea ‵lei mai i te Atua tonu kae e se talia ne tatou a mea ma‵sei?”+ I mea katoa konei, ne seki agasala eiloa a Iopu i ana laugutu.+

11 E tokotolu taugasoa o Iopu ne ‵logo i fakalavelave katoa kolā ne oko atu ki a ia, kae ne o‵mai a latou taki tokotasi mai olotou fenua—ko Elifasa+ te tino Timanu, Pilitati+ te tino Suaa,+ mo Sofala+ te tino Naama. Ne lotoma‵lie latou o maopoopo fakatasi kae olo o fakaasi atu te lotou a‵lofa ki a Iopu kae fakamafanafana atu ki a ia. 12 I te laveaga ne latou a ia mai i se koga tai ‵mao, e se iloa ne latou me ko ia. Ne kamata latou o ‵tagi ki luga kae saesae olotou gatu, kae peipei a ‵pefu ki luga ke ‵to ki olotou ulu.+ 13 Tenā ne saga‵saga ifo ei latou i te laukele fakatasi mo ia i ao e fitu mo po e fitu. E seai eiloa se tino ne fai sena pati ki a ia, me ne lavea ne latou te lasi o tena logo‵mae.+