Iopu
2 E mafai o faulu ne koe se lōpu ki loto i ana puisu
Io me ‵suki tena kauvae ki se kafilo?
3 E a, e uke ana fakamolemole ka fai atu ki a koe,
Io me ka faipati faka‵lei atu ki a koe?
4 E a, ka fai ne ia se feagaiga mo koe,
Ko te mea ke mafai ne koe o fai a ia mo fai tau pologa i tena olaga kātoa?
5 E a, ka ta‵fao koe mo ia e pelā mo koe ma ta‵fao mo se manu eva
Io me ‵sai ne koe ki se seni ma au tama‵liki fāfine?
6 E a, e mafai ne tino fai pisinisi o fesuiaki olotou mea ki ei?
E a, ka vaevae ne latou a ia i tino fai pisinisi?
7 E a, ka velovelo ne koe tena pa‵kili ke ‵fonu i tao+
Io me ko tena ulu ki sana ika?
8 Tuku atu tou lima ki luga i ei;
Ka masaua ne koe te taua tenā kae ka se toe fai eiloa!
9 So se fakamoemoega ke fakatakavale a ia ka se taunu.
A te kilo atu fua ki ei ka fai ei koe ke manavase malosi.*
10 E seai se tino e loto toa o fakaitaita a ia.
Tela la, ko oi te tino e mafai o tu mai i oku mua?+
11 Ko oi te tino ne tuku muamua mai ne ia se mea ki a au ko ‵tau ei o toe ‵togi atu ne au ki a ia?+
So se mea i lalo o te lagi i a aku.+
12 Ka se nofo filemu au e uiga ki ana vae,
E uiga ki tena malosi mo te gali o tena foitino.
13 Ko oi te tino ne tapale ne ia tena ufi mai tua?
Ko oi ka ulu atu ki loto i ana kauvae kolā e ma‵tala?
14 Ko oi e mafai o ‵tala mālō ne ia a mataloa o ana gutu?
Ana nifo katoa e fakama‵taku.
15 E isi se laina o unafi i tena tua*
Ko oti ne faka‵piki fakatasi ke ‵mautakitaki.
16 A mea takitasi i ei e faī eiloa ki te suā mea
Ko seai ei se ea e ulu atu i te va o mea konā.
17 E ‵piki a mea konā ki nisi mea;
E ‵mau fakatasi kae e se mafai o ‵vae.
18 A tena mafatua e malapu mai i ei te mainaga,
Kae ko ana mata e ‵pau mo te sulu o te mainaga i te vaveao.
19 A te ‵lapa o te uila e vau mai loto i tena gutu;
Kae eva mai i ei a kalokaloafi.
20 A te au e vau mai loto i ana puisu,
E pelā me se ogaumu ne tafu ki mouku.
21 A tena mānava e fai i ei ke ‵ka a fatukalā,
Kae sae mai se afi mai loto i tena gutu.
22 A tena ua e malosi ‵ki,
Kae ko te mataku e tele i ana mua.
23 A mapelupeluga o tena foitino e ‵piki fakatasi kae ‵mautakitaki;
E ma‵keke e pelā me se fiti kae e se gasue‵sue.
24 A tena fatu e makeke e pelā me se fuafatu,
Ao, e makeke e pelā mo te fatu solo saito mai lalo.
25 Kafai e tu aka ki luga, ke oko eiloa ki tino ‵mafi e ma‵taku;
A tena gasuesue valevale e māfua i ei te manavase.
26 E seai se pelu e oko atu ki ei ka manumalo;
Io me ko te tao, te tāti io me ko te matasana.+
27 E fai ne ia a te fiti e pelā me se kausaito,
Te kopa e pelā me se lakau pala.
28 E se fai ne te matasana ke tele a ia kea‵tea;
A fatu o te siligi e ‵fuli ki mouku ma‵lō māfai e eva atu ki ei.
29 E fai ne ia te pago e pelā me se mouku malō,
Kae katakata ki te polepole o te tao.
30 Mai lalo i ei, e fai pelā mo mea makai‵kai mai matifiga o tiā kele;
E ‵fola tena foitino i te pela e pelā me se mea tuki saito.+
31 E fai ne ia a koga ‵poko ke ‵puna aka e pelā me se ulo;
E fai ne ia te tai ke sou e pelā me se ulo sinu manogi.
32 E tuku mai i ei se mea matilotilo i tena auala.
Ko mafaufau ei se tino me i koga ‵poko e sinā olotou ulu.
33 E seai eiloa se mea penā i luga i te laukele,
Se manu ne faite ke seai se mataku i ei.
34 E kilo atu mo te kaitaua ki so se mea telā e fakamaualuga.
Ko ia te tupu o manu fe‵kai katoa kae fakama‵taku.”