Salamo
148 ‵Viki atu ki a Ioa!*
‵Viki atu ki a Ieova mai te lagi;+
‵Viki atu ki a ia mai koga ma‵luga.
2 ‵Viki atu ki a ia, ana agelu katoa.+
‵Viki atu ki a ia, ana kautau katoa.+
3 ‵Viki atu ki a ia, e te la mo te masina.
‵Viki atu ki a ia, e fetū maina katoa.+
4 ‵Viki atu ki a ia, e te lagi maluga
Mo vai mai i luga o te lagi.
5 Ke ‵viki atu a mea konā ki te igoa o Ieova,
Me ne fai tena fakatonuga, kae ne māfua mai ei a mea konā.+
6 E faka‵mautakitaki ne ia a mea konā ki te se-gata-mai, se-gata-mai eiloa;+
Ne fai ne ia tena fakatonuga telā ka se mafai o galo atu.+
7 ‵Viki atu ki a Ieova mai te lalolagi,
Koutou e manu ‵lasi o te tai mo vai ‵poko katoa,
8 Koutou e uila mo vaiua fatu, kiona mo kaumana ma‵tolu,
Koutou e matagi ma‵losi, kolā e ave ne latou tena muna,+
9 Koutou e mauga mo koutou e tamā mauga,+
Koutou e lakau fai fuaga mo lakau katoa ko alasi,+
10 Koutou e manu fe‵kai+ mo manu ‵lata,
Koutou e manu ‵tolo mo manu eva fai kapakau,
11 Koutou e tupu o te lalolagi mo koutou e fenua katoa,
Koutou e pelenise mo koutou e famasino katoa o te lalolagi,+
12 Koutou e tamataene mo tamafine,
Fakatasi mo tāgata ma‵tua mo tāgata fo‵liki.
13 Ke ‵viki atu latou ki te igoa o Ieova,
Me ko tena igoa fua telā e maluga ‵ki.+
A tena tulaga ‵malu e maluga atu i te lalolagi mo te lagi.+
14 Ka fakamaluga aka ne ia te malosi o ana tino,
Mō te vikiga o ana tino fakamaoni katoa,
Ko tama tāgata a Isalaelu, ko tino e pili ki a ia.
‵Viki atu ki a Ioa!*