Salamo
Ki te takitaki o te kau fai pese. Ko te pese a Tavita.
41 E fiafia so se tino e saga tonu atu ki te tino malalo;+
Ka fakasao ne Ieova a ia i te aso o te puapuaga.
2 Ka leoleo ne Ieova a ia kae tausi a ia ke ola.
Ka taku a ia me e fiafia i te lalolagi;+
Ka se mafai ne koe o tuku atu a ia ki ana fili ke fai olotou loto.+
3 Ka tausi ne Ieova a ia i luga i te moega e masaki ei a ia;+
I te taimi e masaki ei ka ‵fuli katoatoa ne koe tena moega.
4 Me e fai atu au: “Ieova, ke na talia mai au.+
Faka‵lei mai au,+ me i a au ne agasala ki a koe.”+
5 Kae ko oku fili e fai‵pati ki mea matagā e uiga ki a au:
“Ko te taimi fea ka mate ei a ia kae galo atu tena igoa?”
6 Kafai e vau se tino i a latou ki a au, e faipati mai a ia mo te loi i tena loto.
E ‵sala a ia ki se mea ke fakalogo‵mae ei au;
Ko fano ei a ia o fakasalalau atu ki tua.
7 A latou katoa kolā e takalia‵lia ki a au e musu‵musu te suā tino ki te suā tino;
E fai ne latou se togafiti masei o ‵teke mai ki a au:
8 “E isi se mea matagā ko pule atu ki a ia;
Nei la, ko takato a ia i lalo, ka se toe tu aka eiloa a ia.”+
9 Ke oko eiloa ki te tagata telā e fealofani māua, ko ia telā e talitonu au ki ei,+
Telā ne kai sāle ki aku meakai, ko oti ne ‵teke mai ki a au.*+
10 Kae ko koe, e Ieova, ke na talia mai au kae fakatu aka au ki luga,
Ko te mea ke toe taui atu ne au ki a latou.
11 E auala i te mea tenei ka iloa ei ne au i a koe e fiafia mai ki a au:
Māfai ko se mafai ne toku fili o kalaga mo te manumalo i luga i a au.+
12 E penei mo au, e ‵lago mai koe ki a au ona ko toku fakamaoni;+
Ka tausi eiloa ne koe au i ou mua ki te se-gata-mai.+
Amene kae Amene.