Esoto

1 Konei a igoa o tama tāgata a Isalaelu, telā ko Iakopo, kolā ne olo fakatasi mo ia ki Aikupito, ko tāgata taki tokotasi mo olotou kāiga katoa:+ 2 ko Leupena, Simeona, Levi mo Iuta;+ 3 Isakala, Sepulona mo Peniamina; 4 Tanu mo Nafatali; Kato mo Asela.+ 5 A te aofaki o tino katoa kolā ne fa‵nau mai i te gafa o Iakopo* e ‵tusa mo te toko 70, kae ko Iosefa ko leva ne nofo atu i Aikupito.+ 6 Fakamuli loa, ne mate a Iosefa,+ e pelā foki mo ana taina katoa mo te kautama kātoa tenā. 7 Ne fanafanau a tino Isalaelu* kae ne gasolo aka o tokouke, ne fakaopoopo faeloa te lotou aofaki kae gasolo vave aka o ma‵losi, tenā ne ‵fonu ei te fenua i a latou.+

8 Fakamuli ifo, ne pule atu se tupu fou ki luga i Aikupito, se tino telā e se iloa ne ia a Iosefa. 9 Tenā ne fai atu ei a ia ki ana tino: “Kiloke! A tino Isalaelu ko tokouke kae ma‵losi atu i a tatou.+ 10 E ‵tau o fai ne tatou se mea ki a latou. Kafai e se fai penā ka fakaopoopo faeloa te lotou aofaki, kae kafai e tupu se taua ka ‵kau atu latou ki ‵tou fili o taua mai ki a tatou kae tiaki ne latou te fenua.”

11 Ne ‵tofi ne latou a pule* ke faimālō ne latou a tino ke galue ‵mafa,+ kae faite ne latou a fakai e ‵teu ei a mea a te Falao i Pitoma mo Lamese.+ 12 Kae ko te uke o galuega ‵mafa e fai ne latou, ko te gasolo aka foki o fakaopoopo te lotou aofaki kae salalau valevale, tenā ne ma‵taku malosi ei latou ona ko tino Isalaelu.+ 13 Ne faimālō eiloa ne tino Aikupito a tino Isalaelu ke fai ne latou a galuega ‵mafa.+ 14 Ne fakapuapuagatia ne latou olotou olaga i te faiga o galuega ‵mafa e pelā mo te faitega o mouta mo puliki mo vaegā galuega fakapologa katoa i te fenua. Ao, ne fakafi‵ta eiloa ne latou a tino Isalaelu ki tulaga faiga‵ta mo vaegā galuega fakapologa katoa.+

15 Fakamuli ifo, ne faipati atu a te tupu o Aikupito ki fāfine fakafa‵nau Epelu e igoa ki a Sapela mo Pua, 16 ana muna ki a lāua: “Kafai e fesoasoani atu koulua o fakafa‵nau a fāfine Epelu+ i luga i moega fakafa‵nau, e ‵tau o tamate ne koulua te pepe māfai se tamaliki tagata; kae kafai se tamaliki fafine tuku ke ola.” 17 Kae ko fāfine fakafa‵nau konei ne ma‵taku ki te Atua tonu kae ne seki fai ne lāua a te fakatonuga a te tupu o Aikupito. Ne faka‵sao eiloa ne lāua a tama‵liki tāgata.+ 18 Fakamuli ifo, ne kalaga atu a te tupu o Aikupito ki fāfine fakafa‵nau kae fai atu ki a lāua: “Kaia ne faka‵sao ei ne koulua a tama‵liki tāgata?” 19 Ne fai atu a fāfine fakafa‵nau ki te Falao: “A fāfine Epelu e ‵kese mo fāfine Aikupito. Ko latou eiloa ko ma‵losi kae koi tuai o oko atu te fafine fakafanau kae ko oti latou ne fa‵nau.”

20 Ne atafai faka‵lei ne te Atua a fāfine fakafa‵nau konei, kae ne gasolo aka eiloa o tokouke a tino Isalaelu kae ma‵losi foki. 21 Kae ona ko te ma‵taku o fāfine fakafa‵nau ki te Atua tonu, ne fai ei ne ia ke isi ne lā tama‵liki. 22 Fakamuli loa, ne fakatonu atu a te Falao ki ana tino katoa: “E ‵tau o ‵pei ne koutou a pepe tāgata katoa a tino Epelu ki loto i te vaitafe ko te Naila, kae ‵tau o faka‵sao ne koutou tama‵liki fāfine katoa.”+