Esoto

26 “E ‵tau o faite ne koe te faleie tapu+ ki laugatu e sefulu ne faite mai laugatu lino ne mio faka‵lei ana filo, filo lanu moana, vulu lanu violeta mo filo lanu kula. E ‵tau o ‵sui ne koe ki luga i ei a ata+ o kelupi.+ 2 A laugatu takitasi e ‵tau o 28 kupita* te ‵loa kae 4 kupita te lauefa. E ‵tau o ‵pau katoa te ‵lasi o laugatu konā.+ 3 E ‵tau o ‵soko fakatasi a laugatu e lima mo fai se vaega e tasi, kae penā foki a nisi laugatu e lima mo fai te suā vaega. 4 Ka faite ne koe ne pu faka‵lave ki filo lanu moana i te kapakapa o te laugatu e tasi, kae ke fai foki penā i te kapakapa tafa ki tua o te suā vaega i te feitu telā ka ‵soko fakatasi i ei te avā mea konā. 5 Ka faite ne koe e 50 a pu faka‵lave i te laugatu e tasi, kae 50 a pu faka‵lave i te kapakapa o te suā laugatu ko te mea ke fakafesagai i te koga e ‵soko fakatasi ei te avā mea konā. 6 E ‵tau o faite ne koe e 50 a pine aulo kae ‵soko fakatasi a laugatu ki pine konā, ko fai ei mo fai se laugatu e tasi o te faleie tapu.+

7 “Ka faite foki ne koe ne laugatu mai fulufulu o kouti+ mo ufi te faleie tapu mai luga. Ka faite ne koe e 11 a laugatu+ penā. 8 A laugatu takitasi e ‵tau o 30 kupita te ‵loa kae 4 kupita te lauefa. E ‵tau o ‵pau katoa te ‵lasi o laugatu e 11 konā. 9 E ‵tau o ‵soko fakatasi ne koe a laugatu e lima, kae ‵soko fakatasi a nisi laugatu e ono, ko ‵fetulua ei ne koe te ono o laugatu i te feitu ki mua o te faleie. 10 Kae e ‵tau o faite ne koe e 50 a pu faka‵lave i te kapakapa o te laugatu e tasi, ko te laugatu tafa ki tua o te vaega tenā, kae 50 a pu faka‵lave i te kapakapa o te suā laugatu i te koga telā ka ‵soko fakatasi ei te avā mea konā. 11 E ‵tau o faite ne koe e 50 a pine kopa, ko faka‵lave ei a pine ki pu faka‵lave ke ‵soko fakatasi a laugatu konā, ko fai ei mo fai se laugatu e tasi. 12 A te ‵toega o te laugatu e tuku ke tautau ki lalo. A te āfa o te laugatu telā e ‵toe ka fakatautau ifo ki lalo i te feitu ki tua o te faleie tapu. 13 A te ‵toega o te loa o te laugatu e tuku ke tautau ki lalo e takitasi kupita i feitu takitasi o te faleie tapu, ke ufi ki ei te faleie.

14 “Ka faite foki ne koe se ufi o te faleie ki pa‵kili o mamoe ne vali ke kula, kae mai luga i ei se ufi telā e faite ki pa‵kili o takesa.+

15 “Ka faite ne koe a felemi* laupapa+ o te faleie tapu mai te lakau ko te akasia ke ‵tu ‵tonu ki luga.+ 16 A felemi laupapa takitasi e ‵tau o sefulu kupita te ma‵luga kae tasi mo te āfa kupita te lauefa. 17 A felemi laupapa takitasi e taki lua a fakanifonifoga i ei. Tenā te auala e ‵tau ei o faite ne koe a felemi laupapa katoa o te faleie tapu. 18 E ‵tau o faite ne koe e 20 felemi laupapa mō te feitu ki saute o te faleie tapu, telā e saga ki saute.

19 “Ka faite ne koe e 40 a lagolago siliva+ mai lalo i felemi laupapa e 20: e taki lua a lagolago mai lalo i te felemi laupapa e tasi mō ana fakanifonifoga e lua, kae e taki lua lagolago mai lalo i nisi felemi laupapa takitasi mō olotou fakanifonifoga e taki lua.+ 20 Mō te suā feitu o te faleie tapu, telā ko te feitu ki mātū, ke faite ne felemi laupapa e 20 21 mo olotou lagolago siliva e 40, e taki lua lagolago mai lalo i te felemi laupapa e tasi kae e taki lua lagolago mai lalo i nisi felemi laupapa takitasi. 22 Mō te vaega ki tua o te faleie tapu i te feitu ki togala, ka faite ne koe e ono a felemi laupapa.+ 23 Ka faite ne koe e lua felemi laupapa ke fai pelā me ne pou e lua i ‵kōna ki tua o te faleie tapu. 24 E ‵tau o tapolo a pou konā mai lalo ke oko eiloa ki luga i te ligi muamua. E ‵tau o fai penā a felemi laupapa e lua konā, ko fai ei mo fai a te avā pou i ‵kōna o te faleie tapu. 25 Kae e valu a felemi laupapa mo olotou lagolago siliva e 16, e taki lua lagolago mai lalo i te felemi laupapa e tasi kae taki lua lagolago mai lalo i nisi felemi laupapa takitasi.

26 “Ka faite ne koe a lakau faka‵lava mai te lakau ko te akasia, e lima mō felemi laupapa i te feitu e tasi o te faleie tapu,+ 27 kae e lima a lakau faka‵lava mō felemi laupapa i te suā feitu o te faleie tapu, kae e lima a lakau faka‵lava mō felemi laupapa i te feitu ki togala o te faleie tapu i te vaega ki tua. 28 A te lakau faka‵lava telā e tele i te kogaloto o felemi laupapa e ‵tau o tele mai i te mata e tasi ki te suā mata.

29 “Ka ufi ne koe a felemi laupapa ki aulo,+ kae ka faite ne koe olotou ligi ki aulo mo taofi ki ei a lakau faka‵lava, kae ka ufi ne koe a lakau faka‵lava ki aulo. 30 E ‵tau o fakatu ne koe te faleie tapu e ‵tusa mo te ata telā ne fakaasi atu ki a koe i luga i te mauga.+

31 “E ‵tau o faite ne koe se ‵pui laugatu+ ki filo lanu moana, vulu lanu violeta, filo lanu kula mo laugatu lino ne mio faka‵lei ana filo. E ‵tau o ‵sui ki luga i ei a ata o kelupi. 32 Ka fakatautau ne koe a te mea tenā i luga i pou kolā ne faite mai te lakau ko te akasia kae ne ufi ki aulo. E ‵tau o faite olotou pine ki aulo. A pou konā e faka‵tu i luga i lagolago siliva e fa. 33 Ka fakatautau ne koe a te ‵pui laugatu ki pine kae aumai te pusa o te Feagaiga+ mai loto i te ‵pui laugatu tenā. Ka ‵vae ne te ‵pui laugatu a te Potu Tapu+ mo te Potu Tafasili i te Tapu.+ 34 E ‵tau o ‵pono ne koe te pusa o te Feagaiga i loto i te Potu Tafasili i te Tapu.

35 “Ka tuku ne koe te taipola mai tua o te ‵pui laugatu, kae ko te tugamoli+ e tu fakafesagai ki te taipola mai te feitu ki saute o te faleie tapu; kae ko te taipola ka fakatu ne koe i te feitu ki mātū. 36 Ka faite ne koe se ‵pui laugatu mō te mataloa o te faleie ki filo lanu moana, vulu lanu violeta, filo lanu kula mo laugatu lino ne mio faka‵lei ana filo kolā ko oti ne ‵laga fakatasi.+ 37 Ka faite ne koe e lima a pou mai te lakau ko te akasia mō te ‵pui laugatu kae ufi atu ki te aulo. A olotou pine e ‵tau o faite ki aulo, kae ka faite ne koe olotou lagolago kopa e lima.