Esoto

36 “Ka ga‵lue fakatasi a Pesaleli mo Oliapo mo tāgata apo* katoa kolā ko oti ne tuku atu ne Ieova ki ei a te poto mo te malamalama ke iloa ne latou o fai a galuega katoa o te taviniga ‵malu e pelā mo mea ne fakatonu mai ne Ieova.”+

2 Tenā ne ‵kami mai ei ne Mose a Pesaleli mo Oliapo mo tino apo katoa kolā ne tuku ne Ieova ki olotou loto a te poto,+ ko tino katoa kolā e loto fia‵fia o fai te galuega.+ 3 Ne puke ne latou mai i a Mose a meaalofa+ katoa kolā ne aumai ne tino Isalaelu mo fai te galuega i te taviniga ‵malu. Kae ne aumai faeloa ne tino konei olotou taulaga o te lotomalie i tafataeao katoa ki a ia.

4 Kae i te otiga ne kamata ne latou te faiga o te galuega tapu, ne o‵mai taki tokotasi a tino ga‵lue apo katoa, 5 kae fai atu latou ki a Mose: “Ko uke atu a mea konei ne aumai ne tino i lō mea e manakogina mo fai te galuega telā ne fakatonu mai ne Ieova ke fai.” 6 Tenā ne fakatonu atu ei a Mose ke fai se faka‵pulaga i loto i te fakai kātoa: “Tāgata mo fāfine, sa toe aumai ne meaalofa mō te galuega tapu.” Ona ko te mea tenā ne taofi ei ne tino te avatuga o olotou mea. 7 Ne lava kae ‵toe a mea ne avatu mo fai te galuega kātoa.

8 Ne faite ne tino apo+ katoa a te faleie tapu+ mo ana laugatu e sefulu ki laugatu lino ne mio faka‵lei ana filo, filo lanu moana, vulu lanu violeta, mo filo lanu kula; ne faite ne ia* kae ‵sui fakagaligali atu a kelupi ki luga i ei.+ 9 A laugatu takitasi e 28 kupita* te ‵loa kae 4 kupita te lauefa. E ‵pau eiloa te ‵lasi o laugatu katoa konā. 10 Tenā ne ‵soko fakatasi ei ne ia a laugatu e lima, kae ‵soko fakatasi foki ne ia a nisi laugatu e lima. 11 Oti aka, fai ei ne ia a pu faka‵lave ki filo lanu moana i te kapakapa o te laugatu e tasi i te koga telā ka ‵soko i ei. Ne fai foki ne ia penā i te kapakapa o te laugatu tafa ki tua i te koga telā ka ‵soko i ei. 12 Ne faite ne ia e 50 a pu faka‵lave i te laugatu e tasi, kae 50 a pu faka‵lave i te kapakapa o te suā laugatu i te koga telā ka ‵soko i ei, ko te mea ke fakafesagai a pu faka‵lave konā. 13 Fakamuli loa, faite ei ne ia e 50 a pine aulo kae ‵soko fakatasi a laugatu ki pine konā, ko fai ei mo fai se laugatu e tasi o te faleie tapu.

14 Tenā ne faite ei ne ia a laugatu mai fulufulu o kouti mo ufi te faleie tapu mai luga. Ne faite ne ia e 11 a laugatu penā.+ 15 A laugatu takitasi e 30 kupita te ‵loa kae 4 kupita te lauefa. E ‵pau eiloa te ‵lasi o laugatu e 11 konā. 16 Tenā ne ‵soko fakatasi ei ne ia a laugatu e lima, kae ‵soko fakatasi foki ne ia a nisi laugatu e ono. 17 Oti aka, faite ei ne ia e 50 a pu faka‵lave i te kapakapa o te laugatu tafa ki tua i te koga telā e ‵soko i ei, kae faite ne ia e 50 a pu faka‵lave i te kapakapa o te suā laugatu telā e ‵soko ki ei. 18 Ne faite ne ia e 50 a pine kopa ke ‵soko fakatasi ei a laugatu konā, ko fai ei mo fai se laugatu e tasi.

19 Ne faite ne ia se ufi o te faleie ki pa‵kili o mamoe ne vali ke kula mo te suā ufi telā ne faite ki pa‵kili o takesa* ke ufi mai luga i ei.+

20 Ne faite ne ia mai te lakau ko te akasia+ a felemi laupapa ke ‵tu ‵tonu ki luga.+ 21 A felemi laupapa takitasi e sefulu kupita te ma‵luga kae tasi mo te āfa kupita te lauefa. 22 A felemi laupapa takitasi e taki lua a fakanifonifoga i ei. Tenā te auala ne faite ei ne ia a felemi laupapa katoa o te faleie tapu. 23 Tenā ne faite ei ne ia a felemi laupapa o te faleie tapu i te feitu ki saute, e 20 felemi laupapa, e ‵saga ki saute. 24 Ne faite ne ia e 40 a lagolago siliva ke tuku mai lalo i felemi laupapa e 20, e taki lua lagolago mai lalo i te felemi laupapa e tasi mō ana fakanifonifoga e lua, kae e taki lua lagolago mai lalo i nisi felemi laupapa takitasi mō olotou fakanifonifoga e taki lua.+ 25 Mō te suā feitu o te faleie tapu, telā ko te feitu ki mātū, ne faite ne ia a felemi laupapa e 20 26 mo olotou lagolago siliva e 40, e taki lua lagolago mai lalo i te felemi laupapa e tasi kae e taki lua lagolago mai lalo i nisi felemi laupapa takitasi.

27 Mō te vaega ki tua o te faleie tapu i te feitu ki togala, ne faite ne ia e ono a felemi laupapa.+ 28 Ne faite ne ia e lua felemi laupapa mo fai a pou i ‵kōna o te faleie tapu i te avā ‵kōna ki tua. 29 A pou konā e tapolo mai lalo ke oko eiloa ki luga i te ligi muamua. Tenā eiloa te mea ne fai ne ia ki te avā pou i ‵kōna. 30 Tela la, e valu te aofaki o felemi laupapa fakatasi mo olotou lagolago siliva e 16, e taki lua lagolago mai lalo i felemi laupapa takitasi.

31 Tenā ne faite ei ne ia a lakau faka‵lava mai te lakau ko te akasia, e lima lakau faka‵lava mō felemi laupapa i te feitu e tasi o te faleie tapu,+ 32 kae e lima a lakau faka‵lava mō felemi laupapa i te suā feitu o te faleie tapu, kae e lima mō felemi laupapa o te faleie tapu i te vaega ki tua i te feitu ki togala. 33 Ne faite ne ia te lakau faka‵lava telā e tele i te kogaloto o felemi laupapa mai te mata e tasi ke oko ki te suā mata. 34 Ne ufi ne ia a felemi laupapa ki aulo, kae ne faite ne ia olotou ligi ki aulo mo taofi ki ei a lakau faka‵lava, kae ufi ne ia a lakau faka‵lava ki aulo.+

35 Tenā ne faite ei ne ia se ‵pui laugatu+ ki filo lanu moana, vulu lanu violeta, filo lanu kula, mo laugatu lino ne mio faka‵lei ana filo. Ne ‵sui+ ne ia ki luga i ei a ata o kelupi.+ 36 Ne faite ne ia a pou ‵lasi e fa ki te lakau ko te akasia kae ufi ki aulo, fakatasi mo ana pine aulo, kae faite ne ia a lagolago siliva e fa mō pou konā. 37 Oti aka, faite ei ne ia se ‵pui laugatu mō te mataloa o te faleie ki filo lanu moana, vulu lanu violeta, filo lanu kula mo laugatu lino ne mio faka‵lei ana filo kolā ko oti ne ‵laga fakatasi,+ 38 e pelā foki mo ana pou e lima mo olotou pine. Ne ufi ne ia olotou koga i luga mo olotou soko ki aulo, kae ko olotou lagolago e lima ne ufi ki te kopa.