Esoto

38 Ne faite ne ia te fatafaitaulaga o taulaga ‵sunu mai te lakau ko te akasia. E sikuea, e lima kupita* te loa, e lima kupita te lauefa kae tolu kupita te maluga.+ 2 Tenā ne faite ei ne ia ana suki i ana ‵kōna e fa. Ne ‵piki ana suki ki ei. Oti aka, ufi ei ne ia ki te kopa.+ 3 Mai tua ifo, ne faite ne ia a meāfale katoa o te fatafaitaulaga, ko paketi, ko sevolo, ko pōla, ko foka mo mea tuku malala ‵ka. Ne faite ne ia a meāfale katoa ki te kopa. 4 Ne faite foki ne ia se mea valavala ki te kopa mō te fatafaitaulaga, mai lalo o tena kaugutu ke oko ki tena kogaloto. 5 Ne faite ne ia a ligi e fa i ‵kōna e fa i tafa o te mea valavala kopa ke faulu ki ei a amo. 6 Mai tua ifo i ei, ne faite ne ia a amo mai te lakau ko te akasia kae ufi ki te kopa. 7 Ne faulu ne ia a amo ki loto i ligi i feitu o te fatafaitaulaga ke sau ki ei. Ne faite ne ia te fatafaitaulaga e pelā me se pokisi laupapa e pu i te kogaloto.

8 Tenā ne faite ei ne ia se pesini kopa+ mo tena tulaga kopa; ne fakaaoga ne ia a kilo* a fāfine kolā ne fakatoka ke tavini atu i te mataloa o te faleie o maopoopoga.

9 Ne faite ne ia te koga ateatea.+ Mō te feitu ki saute o te koga ateatea, telā e saga ki saute, ne faite ne ia a ‵pui laugatu ki laugatu lino ne mio faka‵lei ana filo, telā e 100 kupita te loa.+ 10 E isi ne pou e 20 i ei mo lagolago kopa e 20, kae ko pine o pou mo olotou soko ne faite ki siliva. 11 I te feitu ki mātū e 100 kupita foki te loa o te ‵pui laugatu i ei. A olotou pou e 20 mo olotou lagolago e 20 ne faite ki te kopa. Kae ko pine o pou mo olotou soko ne faite ki siliva. 12 Kae ko te feitu ki togala e 50 kupita te loa o te ‵pui laugatu i ei. E isi ne pou e sefulu i ei mo lagolago e sefulu, kae ko pine o pou mo olotou soko ne faite ki siliva. 13 A te lauefa o te feitu ki saegala e 50 kupita. 14 E 15 kupita te loa o te ‵pui laugatu i te feitu e tasi, fakatasi mo pou e tolu mo lagolago e tolu. 15 Kae i te suā feitu, ko te feitu i te mataloa o te koga ateatea, e 15 kupita te loa o te ‵pui laugatu i ei, fakatasi mo pou e tolu mo lagolago e tolu. 16 A ‵pui laugatu katoa o te koga ateatea ne faite ki laugatu lino ne mio faka‵lei ana filo. 17 A lagolago o pou ne faite ki te kopa, a pine o pou mo olotou soko ne faite ki siliva, a olotou koga i luga ne ufi ki siliva, kae e isi ne mea faka‵mau siliva o pou katoa o te koga ateatea.+

18 A te ‵pui laugatu o te mataloa o te koga ateatea ne ‵laga ki filo lanu moana, vulu lanu violeta, filo lanu kula mo laugatu lino ne mio faka‵lei ana filo. E 20 kupita te loa kae 5 kupita te maluga, e ‵pau eiloa mo te ma‵luga o ‵pui laugatu o te koga ateatea.+ 19 A olotou pou e fa mo olotou lagolago e fa ne faite ki te kopa. A olotou pine ne faite ki siliva kae ko olotou feitu ki luga mo olotou soko ne ufi ki te siliva. 20 A pine faka‵lave katoa o te faleie tapu mo te koga ateatea ne faite ki te kopa.+

21 Konei a kope o te faleie tapu, te faleie tapu o te Feagaiga,+ kolā ne fakatonu atu a Mose ke fakamau ki lalo, e pelā me ko te tiute o te kau Levi+ mai lalo i te takitakiga a Itamala+ te tama tagata a te faitaulaga ko Alona. 22 Ne fai eiloa ne Pesaleli+ te tama tagata a Uli te tama tagata a Hulo mai te matakāiga o Iuta a mea katoa kolā ne fakatonu atu ne Ieova ki a Mose ke fai. 23 Ne fakatasi atu ki a ia ko Oliapo+ te tama tagata a Aisamako mai te matakāiga o Tanu, se tufuga faite mea, se tino poto i te ‵sui fakagali‵gali o mea kae se tino poto foki i te ‵laga o filo lanu moana, vulu lanu violeta, filo lanu kula mo laugatu lino ‵lei.

24 A aulo katoa kolā ne fakaaoga mo fai a galuega katoa i te koga tapu e ‵pau eiloa mo te aofaki o aulo o te taulaga fakagasuesue,+ e 29 taleni* kae 730 sekela* mai te sekela masani i te koga tapu.* 25 Kae ko siliva a tino o te fakapotopotoga kolā ne fakamau olotou igoa e ‵tusa mo te 100 taleni kae 1,775 sekela mai te sekela masani i te koga tapu.* 26 A te āfa sekela mō tino taki tokotasi ko te āfa sekela mai te sekela masani i te koga tapu,* me i tāgata katoa mai te 20 tausaga o fano ki luga kolā ne fakamau olotou igoa+ e ‵tusa mo te toko 603,550+ te lotou aofaki.

27 A te faitega o lagolago o te koga tapu mo lagolago o te ‵pui laugatu e ‵tusa mo te 100 taleni te lotou aofaki; a lagolago e 100 e ‵pau mo taleni e 100, e tasi te taleni mō lagolago takitasi.+ 28 Mai te 1,775 sekela, ne faite ne ia ki ei a pine o pou kae ufi olotou koga i luga kae soko fakatasi.

29 A kopa o te taulaga* e 70 taleni kae 2,400 sekela. 30 Ne faite ne ia mai i ei a lagolago o te mataloa o te faleie o maopoopoga, te fatafaitaulaga kopa mo tena mea valavala kopa, meāfale katoa o te fatafaitaulaga, 31 lagolago o te koga ateatea, lagolago o te mataloa o te koga ateatea, pine faka‵lave katoa o te faleie tapu mo pine faka‵lave+ katoa o te koga ateatea.