Esoto

40 Tenā ne fai atu ei a Ieova ki a Mose: 2 “I te aso muamua o te masina muamua e ‵tau o fakatu ne koe a te faleie tapu, ko te faleie o maopoopoga.+ 3 Tuku te pusa o te Feagaiga ki loto i ei+ kae ‵pui a te Pusa ki te ‵pui laugatu.+ 4 E ‵tau o aumai ne koe a te taipola+ ki loto kae fakatoka ana mea katoa ki luga i ei, kae aumai te tugamoli+ ki loto kae faka‵ka ana moli.+ 5 Tenā ko fakatu ei te fatafaitaulaga aulo o mea ma‵nogi+ i mua o te pusa o te Feagaiga kae ‵tau atu a te ‵pui laugatu mō te mataloa o te faleie tapu.+

6 “E ‵tau o fakatu ne koe a te fatafaitaulaga o taulaga ‵sunu+ i mua o te mataloa o te faleie tapu, ko te faleie o maopoopoga, 7 kae tuku te pesini i te va o te faleie o maopoopoga mo te fatafaitaulaga kae utu ki vai.+ 8 Tenā ko fakatoka ei ne koe te koga ateatea+ e fakatamilo i ei kae ‵tau a te ‵pui laugatu+ mō te mataloa o te koga ateatea. 9 Ka oti ko puke ei ne koe te sinu mo faū+ a tino kae faū a te faleie tapu mo mea katoa i loto i ei,+ kae fakatapu atu fakatasi mo ana meāfale katoa, ko te mea ke fai mo fai se mea e tapu. 10 E ‵tau o faū ne koe te fatafaitaulaga o taulaga ‵sunu mo ana meāfale katoa, ko fakatapu atu ei te fatafaitaulaga, ko te mea ke fai mo fai te fatafaitaulaga tafasili i te tapu.+ 11 Kae faū a te pesini mo tena tulaga kae fakatapu atu.

12 “Tenā ko aumai ei a Alona mo ana tama tāgata ke pili ki te mataloa o te faleie o maopoopoga kae fakakou‵kou latou ki vai.+ 13 Kae e ‵tau o fakapei ne koe a Alona ki gatu tapu+ kae faū+ ko fakatapu atu ei a ia, kae ka tavini mai a ia e pelā me se faitaulaga ki a au. 14 Ka oti ko aumai ei ana tama tāgata ke pili mai kae fakapei atu olotou gatu ‵loa.+ 15 E ‵tau o faū ne koe latou e pelā eiloa mo te faūga ne koe o te lotou tamana,+ ko te mea ke tavini mai latou e pelā me ne faitaulaga ki a au, kae ko te lotou faūga ka fai i ei ke tumau te lotou tofi fakafaitaulaga i olotou kautama katoa.”+

16 Ne fai eiloa ne Mose a mea katoa kolā ne fakatonu atu ne Ieova ke fai ne ia.+ Ne fai eiloa ne ia a mea konā.

17 I te aso muamua o te masina muamua, i te lua o tausaga ne fakatu aka ei te faleie tapu.+ 18 I te taimi ne fakatu aka ei ne Mose a te faleie tapu, ne faka‵moe ne ia a lagolago+ ki lalo, faka‵tu a felemi laupapa,+ faka‵mau ana lakau faka‵lava,+ kae faka‵tu aka ana pou. 19 Ne ‵fola ne ia te laugatu o te faleie i luga i te faleie tapu+ kae pulou atu a tena ufi+ mai luga i ei, e ‵tusa mo te fakatonuga a Ieova ne fai ki a Mose.

20 Oti aka, puke ei ne ia a papa fatu o te Feagaiga+ kae tuku atu ki loto i te Pusa,+ kae faulu atu a amo+ o te Pusa kae pulou a te ‵pono+ o te Pusa.+ 21 Ne aumai ne ia te Pusa ki loto i te faleie tapu kae ‵tau a te ‵pui laugatu+ i tena koga tonu ke ‵pui i ei a te pusa o te Feagaiga,+ e ‵tusa mo te fakatonuga a Ieova ne fai ki a Mose.

22 Oti aka, tuku ei ne ia te taipola+ i loto i te faleie o maopoopoga i te feitu ki mātū o te faleie tapu mai tua o te ‵pui laugatu, 23 kae fakatoka ne ia te laina o falaoa+ i luga i ei i mua o Ieova, e ‵tusa mo te fakatonuga a Ieova ne fai ki a Mose.

24 Ne fakatu ne ia te tugamoli+ i loto i te faleie o maopoopoga i mua o te taipola, i te feitu ki saute o te faleie tapu. 25 Ne faka‵ka ne ia a moli+ i mua o Ieova, e ‵tusa mo te fakatonuga a Ieova ne fai ki a Mose.

26 Oti aka, fakatu ei ne ia te fatafaitaulaga+ aulo i loto i te faleie o maopoopoga i mua o te ‵pui laugatu, 27 ko te mea ke ‵sunu a mea ma‵nogi+ ke fanaka te au i luga i ei,+ e ‵tusa mo te fakatonuga a Ieova ne fai ki a Mose.

28 Tenā ne ‵tau ei ne ia a te ‵pui laugatu+ mō te mataloa o te faleie tapu.

29 Ne fakatu ne ia te fatafaitaulaga o taulaga ‵sunu+ i te mataloa o te faleie tapu, ko te faleie o maopoopoga, ko te mea ke ofo atu ne ia a taulaga ‵sunu+ mo taulaga o meakai i luga i ei, e ‵tusa mo te fakatonuga a Ieova ne fai ki a Mose.

30 Tenā ne tuku ei ne ia te pesini i te va o te faleie o maopoopoga mo te fatafaitaulaga kae utu ki vai mo ‵fulu a lima mo vae.+ 31 Ne ‵fulu ne Mose mo Alona mo ana tama tāgata olotou lima mo vae i ei. 32 I so se taimi e ulu atu ei latou ki loto i te faleie o maopoopoga io me olo atu ki te fatafaitaulaga, e ‵tau eiloa o ‵fulu olotou lima mo vae,+ e ‵tusa mo te fakatonuga a Ieova ne fai ki a Mose.

33 Fakamuli loa, fakatoka ei ne ia te koga ateatea+ e fakatamilo i te faleie tapu mo te fatafaitaulaga, kae ‵tau te ‵pui laugatu mō te mataloa o te koga ateatea.+

Ne fakaoti ne Mose a galuega katoa. 34 Kae ne kamata o pulou ifo a te kaumana i luga i te faleie o maopoopoga, kae ne ‵fonu eiloa te faleie tapu i te ‵malu o Ieova.+ 35 Ne seki mafai o ulu atu a Mose ki loto i te faleie o maopoopoga me ko nofo tonu eiloa te kaumana mai luga i ei, kae ne ‵fonu te faleie tapu i te ‵malu o Ieova.+

36 I te taimi e masagi aka ei te kaumana mai i te faleie tapu, ko tiaki ei ne tino Isalaelu te lotou koga ‵nofo i vaega katoa o te lotou malaga.+ 37 Kae kafai e se masagi te kaumana, e se tiaki eiloa ne latou te koga tenā ke oko ki te aso e masagi ei.+ 38 Me ne nofo faeloa te kaumana a Ieova mai luga i te faleie tapu i te ao, kae i te po ko te afi telā e lavea mai ne tino Isalaelu i olotou fale i vaega katoa o te lotou malaga.+