Isaia
22 Se fekau ‵mafa e uiga ki te Vanu o Fakaasiga:*+
Se a te mea ne tupu ki a koe, ko olo aka ei koutou katoa ki luga i tuafale?
2 A koe ko ‵numi valevale,
E te fakai logoa, te fakai fiafia.
Au tino ne tamate ne seki tamate ki te pelu,
Kae seki ‵mate foki latou i se taua.+
3 Ou tino pule fakasaua katoa ko oti ne ‵tele fakatasi kea‵tea.+
Ne puke fakapagota latou kae seki fakaaoga i ei se kausana.
A latou katoa kolā ne maua ne puke fakapagota,+
Faitalia te ‵mao o te koga ne ‵tele latou ki ei.
4 Tenā te pogai e fai atu ei au: “‵Fuli kea‵tea ou mata mai i a au,
Kae ka tagi mautuutu au.+
Sa taumafai o fakamafanafana au
Ona ko te fakaseaiga o te tama fafine a oku tino.+
5 Me i te aso tenā se aso o te ‵numi mo te takavale mo te manavase,+
Mai te Aliki Sili, ko Ieova o kautau,
I te Vanu o Fakaasiga.
7 A toe vanu ‵lei a koe
Ka ‵fonu i kaliota tau,
Kae ka ‵tu a solofanua* i olotou tulaga i mataloa o ‵pui o te fakai,
8 Kae ko te ‵pui* o Iuta ka tapale kea‵tea.
“I te aso tenā ka ‵kilo atu koutou ki te fale e tuku i ei a meatau o te Fale o te Vao,+ 9 kae ka lavea ne koutou a pūga e uke i te ‵pui o te Fakai o Tavita.+ Kae ka asu mai ne koutou a vai mai te vai i lalo.+ 10 Ka lau ne koutou a fale o Ielusalema, kae ka ofa ne koutou a fale ke fakamalosi ki ei a te ‵pui. 11 Kae ka faite ne koutou se lua i te va o ‵pui e lua mo fakatali a vai mai te vai mua, kae e se ‵kilo koutou ki te Atua Sili telā ne faite ne ia te mea tenā, kae e se lavea ne koutou te Atua telā ne faite ne ia i aso mua.
12 I te aso tenā, a te Aliki Sili ko Ieova o kautau,
Ka fakatonu atu ki a latou ke ‵tagi mautuutu mo te fanoanoa,+
Ona ko olotou ulu ne ‵vele ke ‵tula kae ne ‵pei foki latou ki gatu lautaga.
13 Kae i lō te fai penā, ne fai ‵kaiga kae fia‵fia,
Ne tamate a pulumakau mo mamoe,
Ne ‵kai ki ‵kano o manu kae inu ki uaina.+
‘Ke na ‵kai kae inu tatou me taeao ko ‵mate ei tatou.’”+
14 Tenā ne fakaasi mai ei ne Ieova o kautau a te mea tenei ki oku taliga: “‘A te mea ‵se tenei ka se toe faka‵lei aka ona ko koutou ke oko eiloa ki te taimi e ‵mate ei koutou,’+ ko pati a te Aliki Sili ko Ieova o kautau.”
15 Konei a pati a te Aliki Sili, ko Ieova o kautau ne fai mai: “Fano ki loto i te situati tenei, ki a Sepina,+ telā ko te pule o te fale,* kae fai atu ki ei, 16 ‘Se a te mea e manako koe ki ei i konei, kae ko oi te tino e manako koe ki ei i konei, ko keli ei ne koe se tanuga mō koe i te koga tenei?’ Ko keli ne ia tena tanuga i se koga maluga; ko ‵kati ne ia se koga malōlō mō ia i se kaupapa. 17 ‘Kiloke! A Ieova ka ‵pei ‵tuki ne ia koe ki lalo, e te tagata, kae puke ‵mau atu ki a koe. 18 Ka pelupelu ne ia koe ke ‵mau kae ‵pei atu koe e pelā me se pōlo ki se laukele lauefa. Ka mate atu koe i konā, kae ka olo atu ki konā au kaliota ‵malu, se mea fakamasiasi eiloa ki te kāiga o tou matai. 19 Kae ka ave kea‵tea ne au koe mai i tou tulaga kae tapale kea‵tea koe mai tou tofi.
20 “‘I te aso tenā, ka kalaga atu ei au ki taku tavini ko Eliakimo+ te tama tagata a Hilikia, 21 kae ka fakapei ne au a ia ki tou gatu ‵loa kae faka‵mau atu tou fusi o fakatamilo i a ia,+ kae ka tuku atu ne au tau pule ki tena lima. Kae ka fai a ia mo tamana o tino e ‵nofo i Ielusalema penā foki loa mo te kāiga o Iuta. 22 Kae ka tuku atu ne au a te kī o te fale* o Tavita+ ki tena tuauma. Ka ‵tala ne ia kae seai se tino e toe ‵pono ne ia; kae ka ‵pono ne ia kae seai se tino ka toe ‵tala ne ia. 23 Ka ‵tuki ne au a ia e pelā me se pine ki se koga tumau, kae ka fai a ia e pelā me se nofogaaliki ‵malu ki te kāiga o tena tamana. 24 Kae ka fakatau‵tau ne latou i luga i a ia a te ‵malu kātoa o te kāiga o tena tamana, ko fanau mo tino ne ‵tupu mai i a ia, ko tamā pōla katoa, ko mea e foliga mai pelā me ne pōla, e pelā foki mo tiā ‵lasi katoa.
25 “‘I te aso tenā,’ ko te folafolaga a Ieova o kautau, ‘a te pine telā ne ‵tuki i se koga tumau ka tapale kea‵tea,+ kae ka ‵kati ke siga ki lalo, kae ko te amoga telā ne ‵lago ne ia ka tō kae ka masei, me ko Ieova tenā ne faipati mai.’”