Isaia
3 Kiloke! a te Aliki tonu, ko Ieova o kautau,
Ko ave kea‵tea ne ia mai i Ielusalema mo Iuta so se vaegā mea e fakalagolago ki ei a tino ke tausi ei te ola,
Ko meakai mo vai,+
2 Te tagata mafi mo te toa,
Te famasino mo te pelofeta,+ te tino fakataulaitu mo te toeaina,
3 Te takitaki o te toko 50,+ te tino maluga mo te tino fakatonutonu,
Te tino poto i faifaiga faivailakau mo te tino apo i pati ‵lau.+
4 Ka fai ne au a tama‵liki tāgata mo fai olotou pelenise,
Kae ko tino fakalotolotolua ka pule i luga i a latou.
5 Ka fakasaua ne tino a nisi tino,
Ko tino taki tokotasi ki olotou tuakoi.+
Ka taua atu te tamaliki tagata ki te toeaina,
Kae ka ‵teke atu te tino sē tāua ki te tino e fakaaloalogina.+
6 E puke atu a tino tokotasi ki tena taina i loto i te fale o tena tamana kae fai atu:
“A koe e isi sou gatu ‵loa—ke fai koe mo fai te motou pule.
Ke pule atu koe ki te koga tenei ne fakamaseigina.”
7 Kae ka ‵teke mai a ia i te aso tenā:
“Au ka se fai mo fai tau tino fai pa‵kiaga;*
E seai ne aku meakai io me ne gatu i toku fale.
Ke mo a ma fai au mo pule i luga i tino.”
8 Me i a Ielusalema ko oti ne siga,
Kae ko Iuta ko oti ne pakū,
Me ne ‵teke atu latou ki a Ieova i olotou pati mo faiga;
Ne ‵teke malosi atu latou ki tena tulaga ‵malu.+
9 E fakatalitonu mai i olotou foliga a te ‵teke o latou,
Kae e folafola atu ne latou te lotou agasala e pelā mo Sotoma;+
E se taumafai latou o ‵funa aka te mea tenā.
Ka‵lofa eiloa i a latou, me ko aumai ne latou a te fakalavelave ki luga i a latou eiloa!
10 Fai atu ki tino amio‵tonu me ka ‵lei a mea katoa mō latou;
11 Kalofa eiloa i te tino masei!
Ka oko atu a fakalavelave ki luga i a ia,
Me i mea ne fai ne ana lima ka fai atu eiloa ki a ia!
12 E pelā mo oku tino, a olotou tino fakaga‵lue tino e fakasaua,
Kae ko fāfine e pule i a latou.
Oku tino, ou takitaki ko fai ne latou a koutou ke takasē‵se,
Kae ko faka‵numi ne latou a te ala e olo ei koutou.+
13 A Ieova ko tu i tena tulaga o fakamatala atu tena tagi;
Ko tu aka a ia o fakamasino a tino.
14 Ka fai ne Ieova te fakamasinoga ki toeaina mo pelenise o ana tino.
“Ko oti ne ‵sunu ne koutou te togavine,
Kae ko mea ne kaisoa ne koutou mai i tino ma‵tiva konā ko tuku i loto i otou fale.+
15 Kaia ne tuki pala ei ne koutou oku tino
Kae solo ki one a mata o tino ma‵tiva?”+ ko te folafolaga a te Aliki Sili, ko Ieova o kautau.
16 Muna a Ieova: “Ona ko tama fāfine o Siona e fakamaua‵luga,
E sa‵sale mo olotou ulu e fakamaluga,*
Kae kilo‵kilo olotou mata, kae evaeva,
Kae fai ke tagi‵tagi a mea e ‵sai i olotou vae,
17 Ka fai ne Ieova a ulu o tama fāfine o Siona ke ‵pala,
Kae ka fai ne Ieova olotou muālae ke ‵kila.+
18 I te aso tenā ka ave kea‵tea ei ne Ieova a te gali o olotou taulima,
Ko mea ‵sai ulu mo mea fakagaligali kolā e foliga pelā mo te feitu masina,+
19 Ko ligi, ko taulima mo veli,
20 Ko pulou, ko filifili i fatugugu mo fusi fakagali‵gali,
Ko mea tuku sausau mo mea fakagali‵gali e fai ei ke manuia latou,
21 Ko mama i matikao lima mo ligi isu,
22 Ko gatu ‵loa tāua, ko gatu ‵tao i tua, ko gatu ‵loa mo pausi tupe,
23 Ko kilo+ i lima mo gatu lino,
Ko pulou laugatu mo veli.
24 I lō te sinu pasama,+ ka pusaki mai i ei te manogi masei;
I lō te fusi, se lōpu;
I lō te laulu ne teu ke gali, se ulu tula;+
I lō te gatu ‵togi ‵mafa, se gatu lautaga;+
Kae se mea ‵pula i lō se ila gali.
25 E auala i te pelu ka ‵siga ei ou tāgata,
Mo otou tāgata ‵mafi katoa i se taua.+