Isaia
31 Kalofa eiloa i a latou kolā e olo ifo ki lalo i Aikupito mō se fesoasoani,+
Kolā e fakalago‵lago ki solofanua,+
Kolā e tali‵tonu ki kaliota tau ona ko te uke o mea konā,
Mo solofanua tau* ona ko te lotou ma‵losi.
Kae e se ‵kilo atu latou ki te Atua Tapu o Isalaelu,
Kae e se ‵sala atu latou ki a Ieova.
2 Kae e poto foki a ia kae ka aumai ne ia te puapuaga,
Kae ka se faka‵foki ne ia ana pati.
Ka tu aka a ia o ‵teke te kāiga o tino amio matagā
Kae ‵teke atu ki a latou kolā e fesoasoani ki tino amio ma‵sei.+
3 A tino Aikupito ne tāgata fua kae e se ko te Atua;
A olotou solofanua ne mea faka-te-foitino kae e se ne agaga.+
Kafai ko fakaloa atu te lima o Ieova,
So se tino e fesoasoani atu ki ei ka siga
Kae ko so se tino e maua ne ia te fesoasoani ka pakū;
Ka ‵mate katoa latou i te taimi e tasi.
4 Me konei a pati a Ieova ne fai mai ki a au:
“E pelā eiloa mo te tagi a te leona, se tamā leona mafi, i luga i tena manu ne ta,
Māfai ko maopoopo fakatasi se potukau o tausi mamoe o ‵teke atu ki ei,
Kae e se mataku a ia i olotou leo
Io me manavase i te lotou logoa,
Ka penā foki a Ieova o kautau māfai ko fanaifo o taua atu
I luga i te Mauga o Siona mo tena tamā mauga.
5 E pelā me se manu eva e puipui ana punua, ka penā foki a Ieova o kautau ka ‵pulu ne ia a Ielusalema.+
Ka ‵pulu kae fakasao ne ia tou fafine.
Ka fakaola kae e se tamate ne ia tou fafine.”
6 “Toe ‵foki mai ki te Atua telā ne ‵teke malosi koutou ki ei, e tino Isalaelu.+ 7 Me i te aso tenā, ka ‵teke atu a tino taki tokotasi ki ana atua siliva sē aoga mo ana atua aulo sē tāua, kolā ne faite eiloa ne otou lima agasala.
8 Kae ko tino Asulia ka ‵mate i te pelu, e se i te pelu a se tagata
Kae ka fakaseai atu a ia i se pelu,+ e se i se pelu a se tino.
Ka tele a ia ona ko te pelu,
Kae ko ana tamataene ka fakagalue ‵mafa.
9 A tena kaupapa ka tele kea‵tea ona ko te mataku,
Kae ko ana pelenise ka ma‵taku ona ko te pou fakamailoga,” ko te folafolaga a Ieova,
Telā e tu tena mainaga* i Siona kae ko tena ogaumu i Ielusalema.