Isaia
41 “Faka‵logo mai kae sa logoa,* koutou e fenua fo‵liki;
Fai ke toe maua ne atufenua te lotou malosi.
Fai ke fakapili‵pili mai latou; ko fai ei ke fai‵pati mai latou.+
Fai ke maopoopo fakatasi tatou mō te fakamasinoga.
2 Ko oi ne fakatu aka ne ia se tino mai te feitu ki saegala,+
Mai te kalaga atu ki ei i te amiotonu ki Ana vae,*
Ke tuku atu a atufenua ki a ia
Kae fai ke fakatakavale ne ia a tupu?+
Ko oi ne fai ne ia latou ke liu ‵pefu i mua o tena pelu,
E pelā mo kausaito e agina ne te matagi i mua o tena kausana?
3 E afuli ne ia latou, kae fakasili atu i olotou tafa e aunoa mo te tuai
I luga i auala kolā e seki faima‵laga eiloa ana vae i ei.
4 Ko oi te tino ne gasue kae fai ne ia te mea tenei,
E ‵kami mai ne ia a kautama mai te kamataga eiloa?
5 Ne lavea ne fenua fo‵liki a te mea tenā kae ne ma‵taku.
A koga ‵mao o te lalolagi ne kamata o pole‵pole.
Ne fakapili‵pili mai latou kae o‵mai ki mua.
6 E fesoasoani atu a tino taki tokotasi ki olotou taugasoa
Kae fai atu ki tena taina: “Fakamalosi.”
7 Tenā ko fakamalosi ei ne te tufuga faite mea a te tino faite mea ki fiti;+
A te tino e tuki ne ia a mea ke pāpā ki te samala
E fakamalosi ne ia te tino e tuki fiti i te koga tuki fiti.
Ne fai atu a ia e uiga ki te koga soko fiti: “Ko oko eiloa i te ‵lei.”
Tenā ko faka‵mau ei ki fao ko te mea ke se siga.
8 “Kae ko koe e Isalaelu, ko taku tavini,+
A koe e Iakopo, telā ne filifili ne au,+
Ko te tama* a Apelaamo toku taugasoa,+
9 Ko koe, telā ne puke ne au mai koga ‵mao o te lalolagi,+
Mo koe, telā ne kalagagina ne au mai i toe koga ‵mao eiloa.
10 Sa mataku, me i a au e fakatasi atu ki a koe.+
Sa manavase, me i a au ko tou Atua.+
Ka fakamalosi ne au a koe, ao, ka fesoasoani atu au ki a koe,+
Ka puke ‵mau au ki a koe i toku lima fakaatamai o te amiotonu.’
11 Kiloke! A latou katoa kolā e kaitāua ki a koe ka ma‵vale kae masiasi.+
A latou kolā e taua mo koe ka se aoga kae ‵mate atu.+
12 Ka salasala koe ki tāgata kolā e kinau mo koe, kae ka se maua ne koe;
A tāgata kolā e taua mo koe ka fai pelā me ne mea e seai, e pelā me ne mea sē aoga.+
13 Me i a au, Ieova tou Atua, e puke ki tou lima fakaatamai,
Ko te Atua telā e fai atu ki a koe, ‘Sa mataku. Au ka fesoasoani atu ki a koe.’+
14 Sa mataku, a koe e te ilo* ko Iakopo,+
Koutou tāgata Isalaelu, au ka fesoasoani atu ki a koutou,” ko te folafolaga a Ieova, te Atua telā ne toe ‵togi mai ne ia koutou,+ te Atua Tapu o Isalaelu.
15 “Kiloke! Ko oti ne fai ne au koe pelā me se mea tuki saito,+
Se mea tuki saito fou mata ‵kai mō tuki a saito.
Ka lakalaka ne koe ki lalo a mauga kae tuki pala latou
Kae fai a tamā mauga e pelā me ne kaiga o saito.
16 Ka faka‵ma ne koe latou,
Kae ka agina latou kea‵tea ne te matagi;
Ka fakasalalau atu latou ne se kaumatagi.
17 “A tino fakaa‵lofa mo tino ma‵tiva e salasala ki vai, kae e seai.
Olotou alelo ko ma‵lō i te fiainu.+
Au, Ieova ka tali atu ki a latou.+
Au, te Atua o Isalaelu, ka se tuku tiaki ne au latou.+
18 Ka fai ne au a vaitafe ke ‵tafe i luga i tamā mauga e seai ne lakau i ei+
Mo punavai i vanu laugatasi.+
Ka ‵fuli ne au a te koga lavaki ki se vai e ola ei a mouku ‵loa
Kae ko te laukele e seai ne vai i ei ki punavai.+
19 I te toafa ka ‵toki ne au i ei a te lakau ko te alasi,
Te akasia, te metolo, mo te lakau ko te paina.+
I te toafa laugatasi ka ‵toki ne au i ei te lakau ko te iunipa,
Fakatasi mo te lakau ko te titala mo te pelosi,+
20 Ko te mea ke lavea ne tino katoa kae iloa ne latou
Kae ‵saga tonu atu kae malamalama
Me i te lima o Ieova ne fai ne ia te mea tenei,
Kae ko te Atua Tapu o Isalaelu ne faite ne ia te mea tenei.”+
21 “Fai mai te otou tagi,” ko pati a Ieova.
“Fai mai otou kinauga,” ko pati a te Tupu o Iakopo.
22 “Fakaasi mai otou fakamaoniga kae fai mai ki a matou a mea kolā ka ‵tupu.
Fai mai ki a matou e uiga ki mea i aso mua,
Ko te mea ke mafau‵fau matou ki ei kae iloa atu te lotou ikuga.
Io me folafola mai ki a matou a mea kolā ka oko mai.+
23 Fai mai ki a matou a mea ka ‵tupu i aso mai mua,
Ko te mea ke iloa ne matou i a koutou ne atua.+
Ao, fai aka se mea, se mea ‵lei io me se mea masei,
Ko te mea ke ofo matou i ei māfai e lavea ne matou.+
24 Kiloke! A koe se mea fua e seai,
Kae ko au taumafaiga e se aoga.+
So se tino e filifili ne ia koe e takalialiagina.+
25 Ko oti ne fakatu aka ne au se tino mai i mātū, kae ka vau a ia,+
E tokotasi mai te saeakaga o te la*+ telā ka kalaga ki toku igoa.
Ka lakalaka ne ia a tino pule* e pelā eiloa latou me ne kele,+
E pelā me se tino faite mea ki kele telā e lakalaka ne ia a kele siu‵siu.
26 Ko oi ne fai mai ne ia te mea tenei mai te kamataga, ko te mea ke iloa ne tatou,
Io me mai taimi ko ‵teka, ko te mea ke mafai o fai atu tatou, ‘E tonu a ia’?+
E tonu, e seai se tino ne faka‵pula mai ne ia te mea tenā!
E seai se tino ne folafola mai ne ia te mea tenā!
E seai se tino ne logo i se mea mai i a koutou!”+
27 Au ko te tino muamua ne fai atu ki Siona: “Kiloke! Konei latou!”+
Kae ka uga atu ne au se avefekau o te tala ‵lei ki Ielusalema.+
28 Kae ne kilokilo atu faeloa au, kae e seai se tino;
E seai se tino mai i a latou ke tuku mai ne pati fakatonutonu.
Kae ne fesili atu faeloa au ki a latou ko te mea ke tali mai.
29 Kiloke! A latou katoa ne mea fua e seai.
A olotou galuega e se aoga.
A olotou tupua fiti se matagi kae se mea sē tonu.+