Ielemia
16 Ne toe oko mai te muna a Ieova ki a au, kae fai mai: 2 “E se ‵tau mo koe o puke se avaga ma koe, kae e se ‵tau o isi ne au tama tāgata mo tama fāfine i te koga tenei. 3 Me konei a pati a Ieova ne fai e uiga ki tama tāgata mo tama fāfine kolā e fa‵nau i konei kae e uiga ki olotou mātua kolā ne fa‵nau ne latou a latou kae penā foki ki olotou tamana kolā ne pogai mai ei te fa‵nau mai o latou ki te fenua tenei: 4 ‘Ka ‵mate latou i masaki fakama‵taku,+ kae ka seai se tino e tagi fanoanoa ki a latou io me tanu latou; ka fai latou e pelā me ne kaiao i luga i te laukele.+ Ka ‵mate latou i te pelu mo te oge,+ kae ko olotou foitino ‵mate ka fai pelā me ne meakai ki manu eva o te lagi mo manu fe‵kai o te lalolagi.’
5 Me konei a pati a Ieova ne fai mai,
‘Ke mo a ma ulu ki loto i se fale e fai ei se ‵kaiga fanoanoa,
Kae sa fano o tagi mautuutu io me fakaasi atu te loto alofa.’+
‘Me ko oti ne ave ne au kea‵tea toku filemu mai tino konei,’ ko te folafolaga a Ieova,
‘E pelā foki toku alofa fakamaoni mo toku alofa fakamagalo.+
6 A te tino maluga mo te tino malalo ka ‵mate katoa i te fenua tenei.
Ka se tanu eiloa lāua,
Ka seai se tino e tagi fanoanoa ki a lāua,
Io me se tino ka katikati a ia eiloa io me fai a ia eiloa ke tula ona ko lāua.*
7 Kae ka seai se tino e tuku atu ne ia a meakai ma latou kolā e ‵tagi fanoanoa,
Ke fakamafanafana latou i olotou tino ‵mate;
Ka seai foki se tino e tuku atu ne ia te ipu o te fakamafanafanaga
Ke inu latou i te galo atu o te lotou tamana io me ko te lotou mātua.
8 Kae ke mo a ma ulu atu ki se fale e fai ei a ‵kaiga
Ke saga‵saga fakatasi mo latou o ‵kai kae inu.’
9 “Me konei a pati a Ieova o kautau, te Atua o Isalaelu, ana muna, ‘I te koga tenei, i aso o koe kae i ou mua eiloa, ka fakagata ne au a leo o te fiafia mo te lifu, te leo o te tagata ka fakaipoipo mo te leo o te fafine ka fakaipoipo.’+
10 “Kafai e fai atu ne koe ki tino konei a pati katoa konei, ka fesili atu latou ki a koe, ‘Kaia ne faipati ei a Ieova e uiga ki fakalavelave katoa konei o ‵teke mai ki a matou? Se a te mea ‵se mo te agasala ne fai ne matou ki a Ieova te ‵tou Atua?’+ 11 E ‵tau mo koe o tali atu ki a latou, ‘“Me i otou tupuga ne tiaki ne latou au,”+ ko te folafolaga a Ieova, “kae ne tau‵tali atu faeloa latou i nisi atua kae tavini atu ki a latou kae ifo ki lalo i a latou.+ Ne tiaki ne latou au, kae ne seki tausi ne latou taku tulafono.+ 12 Kae ko koutou ne ma‵sei atu otou amioga i lō otou tupuga,+ kae ko tino taki tokotasi o koutou e tau‵tali eiloa i te ma‵keke mo te ma‵sei o olotou loto i lō te faka‵logo mai ki a au.+ 13 Tela la, ka ‵pei ne au koutou ki tua mo te fenua tenei ki se fenua telā ne seki iloa ne koutou io me ko otou tupuga,+ kae ka tavini atu koutou i konā ki nisi atua i te ao mo te po,+ me ka seai se fiafia e fakaasi atu ne au ki a koutou.”’
14 “‘Kae ka oko mai a aso,’ ko te folafolaga a Ieova, ‘ka se toe fai aka ei latou: “E pelā eiloa mo Ieova e ola, telā ne aumai ne ia a tino o Isalaelu ki tua mo te fenua o Aikupito!”+ 15 kae ka fai aka latou: “E pelā eiloa mo Ieova e ola, telā ne aumai ne ia a tino o Isalaelu mai te fenua ki mātū mo fenua katoa kolā ne fakamavae‵vae ne ia latou ki ei!” kae ka toe faka‵foki mai ne au latou ki te lotou fenua, telā ne tuku ne au ki olotou tupuga.’+
16 ‘Tenei ko uga atu taku fekau ki tāgata faiika e tokouke,’ ko te folafolaga a Ieova,
‘Kae ka faiika latou ke maua a mea konā.
Mai tua i konā, ko uga atu ei taku fekau ki tino tuli manu e tokouke,
Kae ka ‵sala ne latou a mea konā i luga i mauga mo tamā mauga katoa
Mo mafāfāga o kaupapa.
17 Me i oku mata e kilo eiloa ki luga i mea katoa e fai ne latou.*
E seki ‵funa aka a mea konā mai i oku mua,
Io me ‵funa aka olotou mea ‵se mai i oku mata.
18 Muamua la, ka toe ‵togi atu ne au a te aofaki kātoa e ‵tau o ‵togi atu mō olotou mea ‵se mo olotou agasala,+
Me ne fakalailai ne latou toku fenua ki olotou tupua fakatakalia‵lia kolā e se ola*
Kae faka‵fonu toku tofi ki olotou mea fakatakalia‵lia.’”+
19 Ieova, toku malosi mo toku ‵pui malosi,
Ko te koga e tele au ki ei i te aso o te puapuaga,+
Ka o‵mai ki a koe a atufenua mai i koga ‵mao o te lalolagi,
Kae ka fai aka latou: “A omotou tupuga ne fai ne latou a atua ‵loi mo fai te lotou tofi,
Ne mea e seai ne aoga kae e se tāua.”+
20 E a, e mafai ne se tagata o faite ne atua mō ia eiloa
Māfai a mea konā e se ne atua ‵tonu?+
21 “Tela la, ka fai ne au ke iloa ne latou,
I te taimi tenei ka fai ne au ke iloa ne latou toku ‵mana mo toku malosi,
Kae ka iloa ei ne latou i toku igoa ko Ieova.”