Ielemia
30 Ko te fekau ki a Ielemia mai i a Ieova, ana muna: 2 “Konei a pati a Ieova te Atua o Isalaelu ne fai mai, ‘Tusi i se tusi a pati katoa kolā e fai atu ne au ki a koe. 3 “Kiloke! ka oko mai a aso,” ko te folafolaga a Ieova, “ka fakamaopoopo ei ne au oku tino Isalaelu mo Iuta kolā ne ave fakapagota,”+ ko muna a Ieova, “kae ka toe faka‵foki mai ne au latou ki te fenua ne tuku atu ne au ki olotou tupuga, kae ka toe puke mō latou.”’”+
4 Konei a muna a Ieova ne fai atu ki Isalaelu mo Iuta.
5 Konei a pati a Ieova:
“Ko oti ne lagona ne matou a te ‵tagi o te mataku;
Ko isi se mataku, kae seai se filemu.
6 Fakamolemole, fesili atu me e mata, e mafai ne se tagata o fanau?
Kaia la e lavea ei ne au so se tagata malosi mo tena lima i luga i tena tinae
E pelā me se fafine ka fai o fanau?+
Kaia ko fakalau‵kena ei a mata o tino katoa?
7 Oi aue! Me i te aso tenā se aso matagā.*+
E seai se aso e ‵pau mo ia,
Se taimi o te puapuaga ki a Iakopo.
Kae ka sao eiloa a ia mai i ei.”
8 “Kae i te aso tenā,” ko te folafolaga a Ieova o kautau, “ka ‵fati ne au te amo mai i tou ua, kae ko au mea ‵sai ka ‵sae lua ne au; kae ka se toe fai eiloa a ia ne tino fakaa‵tea e pelā me ko te lotou pologa. 9 Ka tavini atu latou ki a Ieova te lotou Atua mo Tavita te lotou tupu, telā ka fakatu aka ne au mō latou.”+
10 “Kae pelā mo koe, e taku tavini ko Iakopo, sa mataku,” ko te folafolaga a Ieova,
“Kae ke mo a ma polepole, e Isalaelu.+
Me ka fakasao ne au koe mai i se koga ‵mao
Mo au fanau mai i te fenua ne ave fakapagota latou ki ei.+
A Iakopo ka foki mai mo te tokagamalie mo te filemu,
Kae ka seai se tino e ma‵taku latou ki ei.”+
11 “Me i a au e fakatasi atu ki a koe,” ko te folafolaga a Ieova, “o fakasao koe.
Kae ka fakaseai ne au a atufenua katoa kolā ne fakasalalau ne au koe ki ei;+
Kae ko koe ka se fakaseai ne au.+
Ka polopoloki* ne au koe e ‵tusa mo te mea e ‵tau o maua ne koe,
Kae ka se tiakina eiloa ne au koe e aunoa mo se fakasalaga.”+
12 Me konei a pati a Ieova ne fai mai:
“E seai se faka‵leiga ki tou pakiaga.+
A tou pakiaga e se mafai o fai ke ‵lei.
13 E seai se tino ke fesoasoani atu ki tau tagi,
E seai se auala ke faka‵lei aka ei tou mea ‵pala.
E seai se faka‵leiga mō koe.
14 A tino katoa kolā e fia‵fai malosi ki a koe ko puli i a latou koe.+
Ko se toe olo atu o ‵sala koe.
Me ko oti ne ‵kini ne au koe ki te ‵kini o te fili,+
Ki te fakasalaga o se tino fakasaua,
Ona ko te lasi o tau mea ‵se mo au agasala e uke.+
15 Kaia e tagi ei koe ona ko tou pakiaga?
A tou logo‵mae e se mafai o fai ke ‵lei!
Ona ko te lasi o tau mea ‵se mo au agasala e uke+
Ne fai ne au te mea tenei ki a koe.
16 Tela la, a latou kolā e fakamasei ne latou koe ka fakamaseigina,+
Kae ko ou fili katoa ka ave foki fakapagota.+
A latou kolā e ‵fao ne latou au mea ka ‵fao foki olotou mea,
Kae ko tino katoa kolā ne kaisoa ne latou au mea ka tuku atu foki ne au ke kaisoa olotou mea.”+
17 “Kae ka toe fakafoki mai ne au tou malosi kae faka‵lei aka ou pakiaga,”+ ko te folafolaga a Ieova,
“Faitalia me taku ne latou koe se tino sē taulia:
‘Ko Siona, telā e seai se tino e ‵sala ki ei.’”+
18 Konei a pati a Ieova ne fai mai:
“Ko fakamaopoopo nei ne au a tino o faleie o Iakopo+ kolā ne ave fakapagota,
Kae ka alofa au ki ana faleie tapu.
A te fakai ka toe faite aka i luga i tena koga maluga,+
Kae ko te taoa malosi ka tu i tena tulaga tonu.
19 Ka fakafetai mai latou kae ka‵laga mo te fia‵fia.+
Ka fakatokouke ne au latou, kae ka se mu‵tana latou;+
Ka fai ne au latou ke tokouke,*
Kae ka se fai latou e pelā me ne tino sē tāua.+
20 Ka fai eiloa ana tama pelā mo mea ne fai i aso mua,
Kae ka faka‵mautakitaki a tena fakapotopotoga i oku mua.+
Ka fakafesagai atu eiloa au ki ana tino fakasaua katoa.+
21 A tena tino ‵malu se tino e tokotasi o ana tino,
Kae ko tena pule ka sae aka mai i a ia.
Ka fai ne au a ia ke pili mai, kae ka fakapilipili mai a ia ki a au.”
“Me kafai e se fai penā, ko oi e mafai o fakapilipili mai ki a au?” ko te folafolaga a Ieova.
22 “Kae ka fai a koutou mo oku tino,+ kae ka fai au mo otou Atua.”+
23 Kiloke! A te kaumatagi o Ieova ka agi mai mo te kaitaua,+
Se afā malosi telā ka agi mai ki luga i ulu o tino amio ma‵sei.
24 A te kaitaua o Ieova telā e ‵ka pelā me se afi ka se toe ‵fuli
Ke oko eiloa ki te taimi ko oti ei ne fakataunu kae fai ne ia a te mea e manako ki ei tena loto.+
I te fakaotiotiga o aso fakaoti ka malamalama eiloa koe i te mea tenei.+