Ielemia
52 Ko 21 tausaga o Setekaia+ i te taimi ne fai ei a ia mo tupu, kae ne pule a ia i tausaga e 11 i Ielusalema. A te igoa o tena mātua ko Amutala+ te tama fafine a Ielemia mai Lipina. 2 Ne fai faeloa ne ia a mea ma‵sei i te kilokiloga a Ieova, e ‵tusa mo mea katoa ne fai ne Ieoiakimo.+ 3 Ona ko te kaitaua o Ieova ne ‵tupu i ei a mea konei i Ielusalema mo Iuta, ke oko ki te taimi ne ave kea‵tea ei ne ia latou mai ana mua.+ Kae ko Setekaia ne ‵teke atu ki te tupu o Papelonia.+ 4 I te iva tausaga o te pulega a Setekaia, i te sefulu o aso o te sefulu o masina, ne o‵mai a te tupu o Papelonia ko Nepukanesa* mo tena kautau kātoa o taua atu ki Ielusalema. Ne fakatoka latou o taua atu ki te fakai kae faite se pā e fakatamilo i ei.+ 5 Kae ne nikoi eiloa te fakai ke oko ki te 11 tausaga o te pulega a te Tupu ko Setekaia.
6 I te fa o masina, i te iva o aso o te masina,+ ne poko malosi ei te oge i te fakai, kae ko seai eiloa ne meakai a tino o te fenua.+ 7 Fakamuli loa, ne ofa ki lalo te ‵pui o te fakai, kae ne ‵tele atu a sotia katoa i te po i loto i te mataloa telā e tu i te va o ‵pui e lua i tafa o te fatoaga a te tupu, kae ko tino Kaletaia e fakatamilo ne latou te fakai; kae ne olo atu latou i te auala telā e fano ki te Alapaa.+ 8 Kae ne afuli ne te kautau Kaletaia a te tupu, kae maua atu ne latou a Setekaia+ i te koga laugatasi o Ieliko, kae ko ana kautau katoa ne ‵tele kea‵tea mai i a ia. 9 Tenā ne puke ei ne latou te tupu kae aumai a ia ki te tupu o Papelonia i Lipila i te fenua o Hamata, kae ne fai ne ia tena fakamasinoga. 10 Kae ne tamate ne te tupu o Papelonia a tama tāgata a Setekaia i ana mua eiloa, kae ne tamate foki ne ia a pelenise o Iuta i konā i Lipila. 11 Tenā ne fai ei ne te tupu o Papelonia ke ‵kivi a Setekaia,+ saisai a ia ki filifili kopa, aumai a ia ki Papelonia, kae ‵loka i te falepuipui ke oko ki te aso ne mate ei a ia.
12 I te lima o masina, i te sefulu o aso o te masina, telā ko te 19 tausaga o te pulega a te tupu o Papelonia ko Nepukanesa,* ne vau ki Ielusalema a Nepusalatana te pule o leoleo, telā se tavini fesoasoani a te tupu o Papelonia.+ 13 Ne ‵sunu ne ia te fale o Ieova,+ te fale* o te tupu, mo fale katoa i Ielusalema; ne ‵sunu foki ne ia a fale ‵lasi katoa. 14 Kae ko ‵pui fakatamilo o Ielusalema ne ofa katoa ki lalo ne te kautau Kaletaia kātoa kolā ne olo tasi mo te pule o leoleo.+
15 Ne ave fakapagota ne Nepusalatana te pule o leoleo a nisi tino ma‵lalo mo te ‵toega o tino kolā ne tiaki i te fakai. Ne puke foki ne ia a tino kolā ne ‵sola o olo atu ki te tupu o Papelonia e pelā foki mo te ‵toega o tufuga apo i te faite mea.+ 16 Kae ko Nepusalatana te pule o leoleo ne tiaki ne ia a nisi tino mai toe tino ma‵tiva eiloa o te fenua ke ga‵lue i togavine kae galue ‵mafa i fatoaga.+
17 Kae ne ofa likiliki ne tino Kaletaia a pou kopa+ o te fale o Ieova mo kā+ mo te Tai kopa+ kolā ne ‵tu i loto i te fale o Ieova, kae ne ave ne latou a kopa katoa ki Papelonia.+ 18 Ne puke foki ne latou a kāpa, sevolo, mea tamate moli, pōla,+ ipu,+ mo meāfale kopa katoa kolā ne fakaaoga i te taviniga i loto i te faletapu. 19 Ne puke ne te pule o leoleo a pesini+, mea tuku malala ‵ka, pōla, kāpa, tugamoli,+ ipu, mo pōla kolā ne faite ki tinā aulo mo siliva.+ 20 E pelā mo pou e lua, te Tai, ko pulumakau kopa e 12+ mai lalo o te Tai, mo kā kolā ne faite ne Solomona mō te fale o Ieova, ne seki mafai o iloa a te ‵mafa o kopa ne faite ki ei a mea katoa konei.
21 E pelā mo pou, a pou takitasi e 18 kupita* te ma‵luga, a te uka telā e 12 kupita te loa e mafai o fakatamilo i ei;+ a tena matolu e ‵pau mo te lauefa o matikao lima* e fa, kae e pu i te kogaloto. 22 Kae ko te ulupou i luga i ei ne faite ki kopa; kae ko te maluga o te ulupou e tasi e lima kupita;+ kae ko te mea valavala mo pomekalanite katoa kolā e fakatamilo i te ulupou ne faite katoa ki kopa. E penā foki a te lua o pou mo pomekalanite i ei. 23 E 96 a pomekalanite i feitu; e 100 a pomekalanite katoa e fakatamilo i te mea valavala.+
24 Ne puke foki ne te pule o leoleo a Selaia+ te faitaulaga pule, Sefanaia+ te faitaulaga i te tokolua, mo tāgata tausi mataloa e tokotolu.+ 25 Kae ne puke mai ne ia mai te fakai se ofisa e tokotasi telā ko te pule o sotia, e tokofitu taugasoa ‵pili o te tupu kolā ne maua i te fakai, fakatasi mo te failautusi a te takitaki o kautau, ko ia telā e fakamaopoopo ne ia a tino o te fenua, mo tāgata e toko 60 mai tino o te fenua kolā ne maua atu i te fakai. 26 Ne puke ne Nepusalatana te pule o leoleo a latou kae avatu ki te tupu o Papelonia i Lipila. 27 Ne ‵ta latou ne te tupu o Papelonia kae tamate latou i Lipila+ i te fenua o Hamata. Tenā ne ave fakapagota ei a tino Iuta mai te lotou fenua.+
28 Konei a tino ne ave fakapagota ne Nepukanesa:* i te fitu o tausaga, e toko 3,023 a tino Iutaia.+
29 I te 18 tausaga o te pulega a Nepukanesa,*+ e toko 832 tino ne puke mai Ielusalema.
30 I te 23 tausaga o te pulega a Nepukanesa,* ne ave fakapagota ne Nepusalatana a tino Iutaia, e toko 745.+
A te aofaki kātoa o tino ne ave fakapagota e toko 4,600.
31 Kae i te 37 tausaga o te ave fakapagotaga o te tupu o Iuta ko Ieoiakini,+ i te 12 o masina, i te 25 o aso o te masina, ne fakasaoloto ei ne te tupu o Papelonia ko Evile-malota, i te tausaga ne fai ei a ia mo tupu, a te tupu o Iuta ko Ieoiakini kae aumai a ia ki tua mo te falepuipui.+ 32 Ne faipati faka‵lei a ia ki tou tagata kae fakamaluga aka ne ia tena nofogaaliki ke maluga atu i nofogaaliki o nisi tupu kolā ne ‵nofo mo ia i Papelonia. 33 Ne tapale ne Ieoiakini ana gatu pagota, kae ne kai faeloa a ia i mua o te tupu i aso katoa o tena olaga. 34 Ne avatu faeloa ki a ia a tena vaega o meakai mai te tupu, i aso takitasi, ke oko ki te aso ne mate ei a ia, i aso katoa o tena olaga.