Esekielu

11 Kae ne sau aka au ki luga ne se agaga kae aumai ne ia au ki te mataloa o te ‵pui o te fale o Ieova i te feitu ki saegala, ko te mataloa telā e saga atu ki te feitu ki saegala.+ I konā i te auala o te mataloa ki loto ne lavea ne au a tāgata e toko 25, kae e aofia i a latou ko Iasania te tama tagata a Asuli mo Pelatia te tama tagata a Penaia, ko pelenise o te fenua.+ 2 Tenā ne fai mai ei a Ia ki a au: “Te tama a te tagata, konei a tāgata e faitogafiti matagā kae tuku atu a pati fakatonutonu ma‵sei i loto i te fakai tenei. 3 E fai mai latou, ‘E a, e se tenei te taimi ke faite aka ei a fale?+ A te fakai* ko te ulo ‵tunu meakai,*+ kae ko tatou ko ‵kano.’

4 “Tela la, ‵valo o ‵teke atu latou. ‵Valo atu, e te tama a te tagata.”+

5 Tenā ne oko mai ei te agaga o Ieova ki luga i a au,+ ana muna ki a au: “Fai atu ki ei, ‘Konei a pati a Ieova ne fai mai: “A pati ne fai mai ne koutou e ‵tonu, e te kāiga o Isalaelu, kae e iloa ne au otou mafaufauga. 6 Ne māfua mai i a koutou a te ‵mate o tino e tokouke i te fakai tenei, kae ne faka‵fonu ne koutou ana auala ki tino ‵mate.”’”+ 7 “Tela la, konei a pati a te Aliki Sili ko Ieova ne fai mai: ‘A foitino ‵mate kolā ne laku tatela ne koutou i te fakai ko ‵kano, kae ko te fakai ko te ulo ‵tunu meakai.+ Kae ko koutou ka puke ki tua mai i ei.’”

8 “‘Ne ma‵taku eiloa koutou i te pelu,+ kae ka aumai ne au te pelu ke taua atu ki a koutou,’ ko te folafolaga a te Aliki Sili ko Ieova. 9 ‘Ka aumai ne au koutou ki tua mai i ei kae tuku atu koutou ki lima o tino mai fenua fakaa‵tea kae fakaoko atu te fakamasinoga ki a koutou.+ 10 A koutou ka ‵mate i te pelu.+ Ka fakamasino ne au koutou i tuakoi o Isalaelu,+ kae ka iloa ei ne koutou i a au ko Ieova.+ 11 Ka se fai a te fakai e pelā me se ulo ‵tunu meakai ki a koutou, kae ka se fai koutou e pelā mo ‵kano i loto i ei; ka fakamasino ne au koutou i tuakoi o Isalaelu, 12 kae ka iloa ei ne koutou i a au ko Ieova. Me i a koutou ne seki sa‵sale i aku tulafono fo‵liki kae fai aku fakamasinoga,+ kae ne gasue‵sue koutou e ‵tusa eiloa mo fakamasinoga a nisi atufenua i otou tafa.’”+

13 I te taimi eiloa ne ‵valo atu ei au, ne mate a Pelatia te tama tagata a Penaia, kae ne totuli ifo au mo oku mata e ‵fuli ki lalo kae tagi i se leo maluga: “Oi aue, e te Aliki Sili ko Ieova! E a, ka ‵ta fakapalele ne koe a tino ne ‵toe mai i Isalaelu?”+

14 Ne toe oko mai te fekau a Ieova ki a au, ana muna: 15 “Te tama a te tagata, a ou taina, ko ou taina kolā e saoloto ke toe ‵togi mai te lotou tofi, fakatasi mo te kāiga kātoa o Isalaelu, ne fai ki ei a tino e ‵nofo i Ielusalema, ‘Faka‵mao kea‵tea mai i a Ieova. A te laukele i o matou; ko oti ne tuku mai ke fai mō matou.’ 16 Tela la, fai atu ki ei, ‘Konei a pati a te Aliki Sili ko Ieova ne fai mai: “E tiga eiloa ne faka‵mao ne au a latou mai i atufenua kae ne fakasalalau atu ne au a latou i te fenua,+ i se taimi toetoe ka fai au e pelā me se koga tapuaki mō latou i atufenua kolā ne olo atu latou ki ei.”’+

17 “Tela la, fai atu ki ei, ‘Konei a pati a te Aliki Sili ko Ieova ne fai mai: “Ka fakamaopoopo mai foki ne au koutou mai i te fenua kae ‵luku mai koutou mai i atufenua kolā ne fakasalalau koutou ki ei, kae ka tuku atu ne au te fenua o Isalaelu+ ki a koutou. 18 Kae ka toe ‵foki atu latou ki konā kae tapale kea‵tea mai i ei a mea fakatakalia‵lia katoa mo faifaiga matagā.+ 19 Kae ka tuku atu ne au ki a latou te loto ‵kau fakatasi,+ kae tuku ne au se agaga fou ki loto i a latou;+ kae ka ave kea‵tea ne au mai i olotou foitino+ a te loto telā e makeke pelā me se fatu kae tuku atu ki a latou se loto malū,+ 20 ko te mea ke sa‵sale latou i aku tulafono fakavae kae tausi ki aku fakamasinoga kae faka‵logo ki ei. Tenā ko fai ei latou mo oku tino, kae ka fai au mo olotou Atua.”’

21 “‘“Kae e pelā mo latou kolā ko oti ne tuku olotou loto ke tumau i olotou mea fakatakalia‵lia mo olotou faifaiga matagā, ka aumai ne au ki luga i olotou ulu a ikuga o olotou amioga,” ko te folafolaga a te Aliki Sili ko Ieova.’”

22 Ne sisi aka a kapakau o kelupi, kae ne ‵pili atu eiloa a teka ki olotou tafa,+ kae ko te ‵malu o te Atua o Isalaelu ne nofo mai luga o latou.+ 23 Tenā ne fanaka ei te ‵malu o Ieova+ mai i te fakai kae tu i luga i te mauga i te feitu ki saegala o te fakai.+ 24 Tenā ne sau aka ei au ki luga ne se agaga​—i loto i se fakaasiga e auala i te agaga o te Atua​—kae aumai ne ia au ki tino kolā ne ave fakapagota ki Kaletaia. Tenā ne galo atu ei te fakaasiga telā ne lavea ne au. 25 Kae ne kamata o fakamatala atu ne au ki tino kolā ne ave fakapagota a mea katoa ne fakaasi mai ne Ieova ki a au.