Esekielu

14 Kae ne o‵mai a nisi toeaina o Isalaelu kae saga‵saga ifo i oku mua.+ 2 Tenā ne oko mai ei te fekau a Ieova ki a au, ana muna: 3 “Te tama a te tagata, a tāgata konei ne fakaiku aka ke tau‵tali eiloa i olotou tupua fakatakalia‵lia,* kae ko oti ne fakatu aka ne latou se fatu faka‵siga tino telā e fai i ei a tino ke agasala. E a, e ‵tau o talia ne au ke fesili mai latou ki a au?+ 4 Faipati atu nei ki a latou kae fai atu ki a latou, ‘Konei a pati a te Aliki Sili ko Ieova ne fai mai: “Kafai e fakaiku aka ne se tino Isalaelu ke tautali i ana tupua fakatakalia‵lia kae fakatu aka se fatu faka‵siga tino ke fai ei ke agasala a tino kae oti ko vau ei o fesili mai ki se pelofeta, ka tali atu eiloa au, Ieova, ki a ia i te auala telā e fetaui ‵lei e ‵tusa mo te uke o ana tupua fakatakalia‵lia. 5 Me ka fai ne au ke isi se mataku i loto o te kāiga o Isalaelu me ko oti ne olo kea‵tea latou mai i a au kae olo atu i tua o olotou tupua fakatakalia‵lia.”’+

6 “Tela la, fai atu ki te kāiga o Isalaelu, ‘Konei a pati a te Aliki Sili ko Ieova ne fai mai: “‵Foki mai kae ‵fuli kea‵tea mai i otou tupua fakatakalia‵lia kae ‵fuli kea‵tea otou mata mai i otou faifaiga fakatakalia‵lia katoa.+ 7 Me kafai e ‵vae kea‵tea ne so se tino Isalaelu io me se tino fakaa‵tea telā e nofo i Isalaelu a ia mai i a au kae fakaiku aka ke tautali i ana tupua fakatakalia‵lia kae fakatu aka se fatu faka‵siga tino ke fai ei ke agasala a tino kae vau o fesili mai ki taku pelofeta,+ ko au, Ieova, ka tali atu ki a ia. 8 Ka saga atu oku mata o ‵teke a te tagata tenā kae fai a ia e pelā me se fakailoga mo se fakaakoakoga ke fakaeteete i ei, kae ka tapale kea‵tea ne au a ia mai i oku tino;+ kae ka iloa ei ne koutou i a au ko Ieova.”’

9 “‘Kae kafai ko faka‵segina se pelofeta kae avatu ne ia se tali, ko au, Ieova, ne faka‵se ne au te pelofeta tenā.+ Tenā ka ‵fola atu ei toku lima o ‵teke a ia kae fakaseai atu a ia mai i toku fenua ko Isalaelu. 10 Ka amo ne latou a ikuga o olotou mea ‵se; a te mea ‵se a te tino ne fesili atu ka ‵pau eiloa mo te mea ‵se a te pelofeta, 11 ko te mea ke se toe olo kea‵tea a te kāiga o Isalaelu mai i a au kae fakagata te fakalailaiga o latou e auala i olotou amioga solitulafono. Kae ka fai latou mo oku tino, kae ka fai au mo olotou Atua,’+ ko te folafolaga a te Aliki Sili ko Ieova.”

12 Kae ne toe oko mai te fekau a Ieova ki a au, ana muna: 13 “Te tama a te tagata, kafai e agasala se atufenua ki a au mai te sē fakamaoni, ka ‵fola atu toku lima o ‵teke atu ki ei kae fakamasei a te auala e maua ei olotou meakai,+ kae ka fakaoko atu ne au te oge ki luga i ei+ kae tamate a tino mo manu i ei.”+ 14 “‘Kafai foki loa a tāgata e tokotolu konei​—Noa,+ Tanielu+ mo Iopu+​—e ‵nofo i ei, e mafai fua ne latou o faka‵sao a latou eiloa ona ko te lotou amio‵tonu,’+ ko te folafolaga a te Aliki Sili ko Ieova.”

15 “‘Io me kafai e fai ne au a manu fe‵kai o te vao ke olo atu i loto i te fenua kae fai ne latou ke se tokouke a tino i ei kae fai pelā me se laukele sē aoga e aunoa mo se tino e ui atu i konā ona ko manu o te vao.+ 16 E pelā eiloa mo au e ola,’ ko te folafolaga a te Aliki Sili ko Ieova, ‘kafai foki loa a tāgata e tokotolu konei e ‵nofo i loto i ei, e se mafai ne latou o faka‵sao olotou tama tāgata io me ko olotou tama fāfine; e mafai fua ne latou o faka‵sao a latou eiloa, kae ko te laukele ka fakamaseigina.’”

17 “‘Io me kafai e aumai ne au se pelu ke taua atu ki te fenua tenā+ kae fai atu: “Ke fanatu se pelu i loto i te fenua,” kae tamate a tino mo manu i ei,+ 18 kafai foki loa a tāgata e tokotolu konei e ‵nofo i loto i ei, e pelā eiloa mo au e ola,’ ko te folafolaga a te Aliki Sili ko Ieova, ‘e se mafai ne latou o faka‵sao olotou tama tāgata io me ko olotou tama fāfine; e mafai fua ne latou o faka‵sao a latou eiloa.’”

19 “‘Io me kafai e uga atu ne au se famai ki loto i te fenua+ kae ‵ligi atu toku kaitaua ki luga i ei fakatasi mo te fakamaligiga o toto ke tamate a tino mo manu mai i ei, 20 kafai foki loa e ‵nofo i loto i ei a Noa,+ Tanielu,+ mo Iopu,+ e pelā eiloa mo au e ola,’ ko te folafolaga a te Aliki Sili ko Ieova, ‘e se mafai ne latou o faka‵sao olotou tama tāgata io me ko olotou tama fāfine; e mafai fua ne latou o faka‵sao a latou eiloa ona ko te lotou amio‵tonu.’”+

21 “Me konei a pati a te Aliki Sili ko Ieova ne fai mai: ‘Ka penā foki eiloa māfai ko fakaoko mai ne au aku fakasalaga e fa+​—te pelu, te oge, manu fe‵kai o te vao mo famai+​—ki Ielusalema ke tamate a tino mo manu i ei.+ 22 Kae ko nisi tino kolā ne ‵toe i loto i ei ka ‵sao kae aumai ki tua,+ ko tama tāgata mo tama fāfine. E o‵mai latou ki a koutou, kae kafai e lavea ne koutou olotou auala mo olotou faifaiga, ka maua eiloa ne koutou se fakamafanafanaga ona ko puapuaga kolā ne aumai ne au ki Ielusalema, ko mea katoa kolā ne fai ne au ki ei.’”

23 “‘Ka fakamafanafana ne latou koutou māfai e lavea ne koutou olotou auala mo olotou faifaiga, kae ka iloa ei ne koutou me ne seki sonafai ne au te mea tenei e aunoa mo se pogai,’+ ko te folafolaga a te Aliki Sili ko Ieova.”