Tanielu

3 Ne faite ne te tupu ko Nepukanesa se tupua aulo telā e 60 kupita* te maluga kae 6 kupita* te lauefa. Ne fakatu aka ne ia te mea tenā i te laukele laugatasi o Tula i te kogā fenua o Papelonia. 2 Tenā ne uga atu ei te fekau a te Tupu ko Nepukanesa ke fakamaopoopo mai a tino pule, takitaki, kovana, tino fakatonutonu, ‵teutupe, famasino ma‵luga, famasino, mo ofisa katoa o te kogā fenua ke o‵mai ki te fakatapuga o te tupua telā ne fakatu aka ne te Tupu ko Nepukanesa.

3 Tela la, a tino pule, takitaki, kovana, tino fakatonutonu, ‵teutupe, famasino ma‵luga, famasino mo ofisa katoa o te kogā fenua ne maopoopo fakatasi katoa ki te fakatapuga o te tupua ne fakatu aka ne te Tupu ko Nepukanesa. Kae ne ‵tu atu latou i mua o te tupua telā ne fakatu aka ne Nepukanesa. 4 Ne fai se faka‵pulaga i se leo maluga: “Ko fakatonu atu ki a koutou e tino, atufenua, mo ‵gana valevale, 5 me kafai e lagona ne koutou te ‵tagi o te pu, paipa, nisi mea fakatagi‵tagi e isi ne uka i ei, kitala e tolu ana feitu, mea fakatagitagi telā e isi ne uka i ei, te pu e isi sena taga, mo nisi mea fakatagi‵tagi aka, e ‵tau mo koutou o to‵tuli ki lalo kae ifo atu ki te tupua aulo telā ne fakatu aka ne te Tupu ko Nepukanesa. 6 So se tino e se totuli ki lalo o ifo ki ei ka ‵pei fakavave ki loto i te ogaumu ‵ka ulaula.”+ 7 Tela la, i te lagonaga ne tino a te ‵tagi o te pu, paipa, nisi mea fakatagi‵tagi e isi ne uka i ei, kitala telā e tolu ana feitu, kitala, mo nisi mea fakatagi‵tagi aka, ne to‵tuli ifo a tino katoa o te fenua, atufenua, mo ‵gana kae ifo atu ki te tupua aulo telā ne fakatu aka ne te Tupu ko Nepukanesa.

8 I te taimi foki eiloa tenā, ne o‵mai a nisi tino Kaletaia ki mua kae fai a ‵losiga* e uiga ki tino Iutaia. 9 Ne fai atu latou ki te Tupu ko Nepukanesa: “Te tupu, ke ola eiloa koe ki te se-gata-mai. 10 Ko koe eiloa, e te tupu, ne fai tau fakatonuga me ko so se tino e lagona ne ia te tagi o te pu, paipa, nisi mea fakatagi‵tagi e isi ne uka i ei, kitala telā e tolu ana feitu, kitala, te pu e isi sena taga, mo nisi mea fakatagi‵tagi aka, e ‵tau o to‵tuli ki lalo o ifo ki te tupua aulo; 11 kae ko so se tino e se totuli o ifo atu ki ei e ‵tau o ‵pei ki loto i te ogaumu ‵ka ulaula.+ 12 Kae e isi ne nai tino Iutaia kolā ne faka‵sopo ne koe ke pule ki mea e fai i te kogā fenua o Papelonia: ko Satalaka, Mesako mo Apeteniko.+ A tāgata konei e seki fakaaloalo atu ki a koe, e te tupu. E se tavini atu latou ki ou atua, kae e ita latou ma ifo ki te tupua aulo telā ne fakatu aka ne koe.”

13 Tenā ne fakatonu atu ei a Nepukanesa mo te kaitaua lasi ke aumai a Satalaka, Mesako mo Apeteniko. Tenā ne aumai ei a tāgata konei ki mua o te tupu. 14 Ne fai atu a Nepukanesa ki a latou: “E a, e tonu eiloa e Satalaka, Mesako mo Apeteniko i a koutou e se tavini ki oku atua+ kae e ita koutou ma ifo ki te tupua aulo telā ne fakatu aka ne au? 15 Nei la, kafai ko lagona ne koutou te tagi o te pu, paipa, nisi mea fakatagi‵tagi e isi ne uka i ei, kitala telā e tolu ana feitu, kitala, te pu e isi sena taga, mo nisi mea fakatagi‵tagi aka, kae toka koutou o to‵tuli o ifo ki te tupua telā ne faite ne au, e ‵lei te mea tenā. Kae kafai e ita koutou ma ifo atu ki ei, ka ‵pei fakavave koutou ki loto i te ogaumu ‵ka ulaula. Kae ko oi te atua e mafai o fakasao ne ia koutou mai i oku lima?”+

16 Ne tali atu a Satalaka, Mesako mo Apeteniko ki te tupu: “Nepukanesa, e se ‵tau o tali atu matou ki a koe e uiga ki te mea tenei. 17 Kafai e ‵tau, a te motou Atua telā e tavini matou ki ei e mafai o faka‵sao ne ia matou mai i te ogaumu ‵ka ulaula, e te tupu, kae faka‵sao foki matou mai i ou lima.+ 18 Kae kafai foki eiloa e se fai ne ia penā, ke iloa ne koe, e te tupu, me ka se tavini atu matou ki ou atua io me ifo atu ki te tupua aulo telā ne fakatu aka ne koe.”+

19 Tenā ne kaitaua malosi eiloa a Nepukanesa ki a Satalaka, Mesako mo Apeteniko kae ne ma‵fuli ana foliga ki a latou, kae ne fakatonu atu a ia ke faka‵vela aka te ogaumu fakafitu taimi i lō te ‵vela masani. 20 Ne fakatonu ne ia a nisi tāgata ‵mafi mai i tena kautau ke saisai a Satalaka, Mesako mo Apeteniko kae ke ‵pei atu latou ki loto i te ogaumu ‵ka ulaula.

21 Tenā ne saisai ei a tāgata konei kae koi ‵pei eiloa latou ki olotou gatu ‵loa, gatu, pulou mo olotou gatu katoa, kae ne ‵pei atu latou ki loto i te ogaumu ‵ka ulaula. 22 Ona ko te ‵mafa o te fakatonuga a te tupu kae ko te ogaumu ko oko eiloa i te ‵vela, ne ‵mate ei a tāgata kolā ne puke ne latou a Satalaka, Mesako mo Apeteniko i ulaga o te afi. 23 Kae ko tāgata e tokotolu konei, Satalaka, Mesako mo Apeteniko ne ‵pei atu mo olotou saisaiga ki loto i te ogaumu ‵ka ulaula.

24 Tenā ne kamata ei a te Tupu ko Nepukanesa o mataku kae tu fakavave aka kae fai atu ki ana ofisa pule: “E a, e seki saisai ne tatou a tāgata e tokotolu kae ‵pei atu ki loto i te afi?” Ne tali atu latou ki te tupu: “Ao, e te tupu.” 25 Ana muna: “Kiloke! E lavea ne au a tāgata e tokofa e sa‵sale e aunoa mo olotou saisaiga i loto i te afi, kae e se ‵paku latou, kae ko te tino i te tokofa e foliga pelā me se tama a atua.”

26 Ne fakapilipili atu a Nepukanesa ki te mataloa o te ogaumu ‵ka ulaula kae fai atu: “Satalaka, Mesako mo Apeteniko, ko tavini a te Atua Tafasili i te Maluga,+ o‵mai ki tua kae o‵mai ki konei!” Tenā ne o‵mai ei ki tua a Satalaka, Mesako mo Apeteniko mai loto i te afi. 27 Kae ko tino pule, takitaki, kovana mo ofisa ma‵luga a te tupu kolā ne maopoopo atu i konā+ ne lavea ne latou me e seai se aoga* o te afi ki foitino o tāgata konei;+ e seai se laulu i olotou ulu ne ‵paku, kae seai se mafuliga ki olotou gatu, kae e se manogi siau foki latou.

28 Tenā ne folafola atu ei a Nepukanesa: “Ke vikia te Atua o Satalaka, Mesako mo Apeteniko,+ telā ne uga mai ne ia tena agelu o faka‵sao ana tavini. Ne tali‵tonu latou ki a ia kae ‵teke atu ki te fakatonuga a te tupu kae ne loto fia‵fia ke ‵mate i lō te tavini io me ifo atu ki se isi atua kae na ko te lotou Atua eiloa.+ 29 Tela la, ko fai atu taku fakatonuga me ko so se tino, atufenua, io me so se ‵gana e faipati ‵teke atu ki te Atua o Satalaka, Mesako mo Apeteniko e ‵tau o katikati valevale tena foitino, kae ka ‵fuli olotou fale ki falevatie o tino; me e seai se isi atua e mafai o fai ne ia se faka‵saoga penei.”+

30 Tenā ne siki aka ei ne te tupu a tulaga o Satalaka, Mesako mo Apeteniko i te kogā fenua o Papelonia.+