Tanielu

7 I te tausaga muamua o te pulega a te Tupu o Papelonia ko Pelesala,+ ne lavea ne Tanielu se moemiti mo fakaasiga i te taimi ne moe ei a ia i luga i tena moega.+ Tenā ne tusi ei ki lalo ne ia te moemiti;+ ne fakamau ne ia ki lalo te tala kātoa o mea konā. 2 Ne folafola mai a Tanielu, penei:

“Ne kilokilo atu au ki aku fakaasiga i te po, kae kiloke! a matagi e fa o te lagi e fai ne latou te tai+ lasi ke sou. 3 Kae e fa manu fe‵kai ‵lasi+ ne ‵sae aka mai i te tai, e kese‵kese katoa a manu konā.

4 “A te manu muamua e pelā me se leona,+ kae isi ne ana kapakau e pelā me se aeto.+ Ne kilokilo atu au ki ei ke oko ki te taimi ne unu ei kea‵tea ana kapakau, kae ne masagi aka mai te lalolagi kae fai ke tu ki ana vae e lua e pelā me se tagata, kae ne tuku atu ki ei te loto o se tagata.

5 “Kae kiloke! te suā manu fekai, ko te lua o manu, e pelā me se pea.+ Ne tu aka i te feitu e tasi, kae e tolu a ivi kasokaso i tena gutu i te va o ana nifo; kae ne fai atu ki ei, ‘Tu ki luga, kai ki ‵kano e uke.’+

6 “I te otiga o te mea tenei ne kilokilo atu faeloa au, kae kiloke! te suā manu fekai, e pelā me se lepoti,+ kae i tena tua e isi ne kapakau e fa e pelā mo kapakau o se manu eva. Kae e fa+ a ulu o te manu fekai tenā, kae ne tuku atu ki a ia te malosi ke pule atu.

7 “I te otiga o te mea tenei ne kilokilo atu faeloa au ki te fakaasiga i te po, kae ne lavea ne au te fa o manu fekai, e fekai malosi kae fakamataku kae tu ‵kese eiloa tena malosi, kae isi ne ana nifo fiti ‵lasi. E kai kae ofa ne ia a mea, kae ko mea kolā e ‵toe mai e lakalaka ne ia ki ana vae.+ E ‵kese a ia mai nisi manu fe‵kai katoa mai mua atu i a ia, kae e sefulu ana sau. 8 I te taimi ne mafaufau ei au ki sau, kiloke! e isi se sau, se mea foliki,+ ne sae aka i te va o sau konā, kae ko sau e tolu mai i sau muamua ne unu kea‵tea mai i ana mua. Kae kiloke! e isi ne mata e pelā me ne mata o tino i te sau tenei, kae e isi se gutu i ei telā e faipati fakamatamata.+

9 “Ne kilokilo atu faeloa au ke oko ki te taimi ko oti ne fakatoka a nofogaaliki kae ko Ia Telā Mai Aso Mua+ eiloa ne sagasaga ki lalo.+ Ana gatu e ‵kena e pelā me se kiona,+ kae ko laulu o tena ulu e ‵ma pelā me se vulu. A tena nofogaaliki se ulaga o te afi; ana teka se afi ‵ka.+ 10 A te tamā vaitafe afi e ‵tafe mai i ana mua.+ E lau i afe mo afe a latou kolā ne tavini atu faeloa ki a ia, kae e toko sefuluafe fatele ki te toko sefuluafe ne ‵tu i ana mua.+ Ne saga‵saga a te Fono Fakamasino,+ kae ne ‵tala a tusi.

11 “Ne kilokilo atu faeloa au i te taimi tenā ona ko te leo fakamatamata o pati kolā e faipati ne te sau;+ ne kilokilo atu au ke oko ki te taimi ne tamate ei te manu fekai kae fakamasei atu tena foitino kae tuku atu ke ‵sunu i te afi. 12 Kae pelā mo te ‵toega o manu fe‵kai,+ ne ave kea‵tea olotou pulega mai i a latou, kae ne fakaleva atu olotou ola mō se taimi mo se vaitaimi.

13 “Ne kilokilo atu faeloa au ki fakaasiga o te po, kae kiloke! e isi se mea pelā me se tama a te tagata+ e vau fakatasi mo kaumana o te lagi; kae ne mafai a ia o fanatu ki a Ia Telā Mai Aso Mua,+ kae ne aumai ne latou a ia ke pili atu ki mua o Ia tenā. 14 Kae ne tuku atu ki a ia a te pulega,+ te fakaaloalo+ mo te malo, kae e ‵tau mo tino, atufenua mo ‵gana katoa o tavini atu ki a ia.+ A tena pulega se pulega ki te se-gata-mai telā ka se mafai o galo atu, kae ko tena malo ka se fakaseai atu.+

15 “E pelā mo au, Tanielu, ne mafatia toku agaga i loto i a au me i fakaasiga ne lavea ne au ne fai ei au ke mataku.+ 16 Ne fakapilipili atu au ki se tokotasi o latou telā e tu i konā ke fesili atu ki te uiga tonu o te mea tenei. Tenā ne tali mai ei a ia kae fakailoa mai ki a au a te uiga o mea konei.

17 “‘A manu fe‵kai ‵lasi konei e fa,+ ko tupu e tokofa kolā ka ‵tu aka mai te lalolagi.+ 18 Kae ko tino tapu a te Pule Maluga+ ka maua ne latou te malo,+ kae ka fai mō latou te malo+ ki te se-gata-mai, ao, ki te se-gata-mai, se-gata-mai eiloa.’

19 “Kae ne fia iloa ne au a mea e uke atu e uiga ki te manu fekai i te fa, telā e ‵kese ‵ki mai i nisi manu katoa; ne tu ‵kese tena fakamataku, fakatasi mo nifo fiti mo mania kopa, kae ne kai kae ofa ne ia a mea, kae lakalaka ki ana vae a mea ne ‵toe mai;+ 20 kae e uiga foki ki sau e sefulu+ i tena ulu, mo te suā sau telā ne sae aka kae ‵to ifo a nisi sau e tolu i ana mua,+ ko te sau telā e isi ne ana mata mo se gutu e faipati fakamatamata kae foliga lasi atu i lō nisi sau.

21 “Ne kilokilo atu faeloa au ki te sau tenā e fai taua ki tino tapu, kae e manumalo i a latou,+ 22 ke oko ki te taimi ne vau ei a Ia Telā Mai Aso Mua+ kae ne fai ei te fakamasinoga o tino tapu a te Pule Maluga,+ kae ne oko mai te taimi tonu mō tino tapu ke puke mō latou te malo.+

23 “Konei ana pati ne fai: ‘E pelā mo te manu fekai i te fa, e isi se fa o malo ka sae aka i te lalolagi. E ‵kese a ia mai i nisi malo aka katoa, kae ka kai ne ia a te lalolagi kātoa kae lakalaka kae tuki pala ne ia.+ 24 E pelā mo sau e sefulu, e sefulu a malo ka ‵tu aka mai i te malo tenā; kae ka toe tu aka te suā malo mai tua o latou, kae ka ‵kese a ia mai i malo muamua, kae ka fakamasiasi ne ia a tupu e tokotolu.+ 25 Ka fai atu ne ia a pati ‵teke ki te Atua Tafasili i te Maluga,+ kae ka tumau i te fakapuapuaga ne ia a tino tapu a te Pule Maluga. Ka taumafai a ia o ‵fuli a taimi mo tulafono, kae ka tuku atu latou ki ana lima mō se taimi, taimi e lua,* mo se āfa taimi.*+ 26 Kae ne saga‵saga ifo te Fono Fakamasino, kae ave ne latou kea‵tea tena pulega, ko te mea ke fakamasei kae fakaseai+ katoatoa atu a ia.

27 “‘Kae ko te malo mo te pulega mo te ‵gali o malo mai lalo o te lagi ne tuku atu ki tino kolā ko tino tapu a te Pule Maluga.+ A te lotou malo se malo ki te se-gata-mai,+ kae ko pulega katoa ka tavini atu kae faka‵logo eiloa ki a latou.’

28 “Tenei te fakaotiga o mea ne lavea kae lagona ne au. E pelā mo au, Tanielu, ne poi malosi au i oku mafaufauga, tenā ne fakalau‵kena* ei au; kae ne tausi eiloa ne au a mea konā i toku loto.”