Levitiko

1 Kae ne kalaga atu a Ieova ki a Mose kae faipati atu ki ei mai i te faleie o maopoopoga,+ ana muna: 2 “Faipati ki tino Isalaelu* kae fai atu ki a latou, ‘Kafai e ofo mai ne se tino i a koutou se taulaga ki a Ieova mai i otou manu fagai, e ‵tau o ofo mai ne koutou a mea konā mai i otou lafu pulumakau io me ko otou lafu mamoe.+

3 “‘Kafai a tena taulaga se taulaga ‵sunu mai te lafu pulumakau, e ‵tau o ofo atu ne ia se manu tagata ‵lei.+ E ‵tau o ofo atu ne ia mo te lotomalie+ i mua o Ieova i tafa o te mataloa o te faleie o maopoopoga. 4 E ‵tau o tuku tena lima i luga i te ulu o te taulaga ‵sunu, ko talia ei tena taulaga ke fakamagalo ki ei ana agasala.

5 “‘Tenā ko tamate ei te tamā pulumakau i mua o Ieova, kae ko tama tāgata a Alona, kolā ko faitaulaga,+ ka avatu ne latou a toto kae fakamatulutulu atu a toto ki feitu katoa o te fatafaitaulaga,+ telā e tu i tafa o te mataloa o te faleie o maopoopoga. 6 E ‵tau o ‵fole a te pa‵kili o te taulaga ‵sunu kae katikati ki vaega fo‵liki.+ 7 A tama tāgata a Alona, kolā ko faitaulaga, e ‵tau o faka‵ka ne latou a te afi i te fatafaitaulaga+ kae fakatoka a fafie mo faka‵ka te afi. 8 A tama tāgata a Alona, kolā ko faitaulaga, ka fakatoka ne latou a vaega fo‵liki o te taulaga+ fakatasi mo te ulu mo gako* i luga i fafie kolā ko ‵ka i te fatafaitaulaga. 9 Ana gakau mo ana vae e ‵tau o ‵fulu ki vai, kae e ‵tau o ‵sunu ne te faitaulaga a mea katoa ko te mea ke au i luga i te fatafaitaulaga ke fai pelā me se taulaga ‵sunu, se taulaga e ofo atu i luga i te afi kae manogi gali ki a Ieova.+

10 “‘Kafai ne aumai ne se tino mai te lafu se tamā mamoe+ io me se kouti mai tena lafu mo fai tena taulaga ‵sunu, e ‵tau o ofo atu ne ia se manu tagata ‵lei.+ 11 E ‵tau o tamate te manu tenā i te feitu ki mātū o te fatafaitaulaga i mua o Ieova, kae ko tama tāgata a Alona, kolā ko faitaulaga, ka fakamatulutulu ne latou te toto ki luga i feitu katoa o te fatafaitaulaga.+ 12 Ka katikati ne ia ki vaega fo‵liki, kae ka fakatoka ne te faitaulaga a mea konā fakatasi mo te ulu mo gako* i luga i fafie kolā e ‵ka i te fatafaitaulaga. 13 Ka ‵fulu ne ia a gakau mo vae ki vai, kae ka ofo atu ne te faitaulaga a mea katoa konā kae ‵sunu ko te mea ke au i luga i te fatafaitaulaga. A te mea tenā se taulaga ‵sunu, se taulaga e ofo atu i luga i te afi kae manogi gali ki a Ieova.

14 “‘Kae kafai e ofo atu ne ia a manu eva e pelā me se taulaga ‵sunu ki a Ieova, ka ofo atu ne ia a lupe io me ne punua lupe.+ 15 Ka ofo atu ne te faitaulaga a te manu tenā i te fatafaitaulaga kae ‵sele tena ua kae ‵sunu ko te mea ke au i luga i te fatafaitaulaga, kae e ‵tau o fakasali tena toto ki te feitu e tasi o te fatafaitaulaga. 16 E ‵tau o tapale ne ia a te taga meakai i te kato o te manu eva kae unu ana fulu kae ‵pei ki tafa o te fatafaitaulaga, ki te feitu ki saegala, te koga e tuku ei a lefu.*+ 17 Ka ‵sele ne ia te manu i ana kapakau kae ke se ‵kati ki vaega e lua. Tenā ko ‵sunu ei ne te faitaulaga ko te mea ke au i luga i te fatafaitaulaga i luga i fafie kolā e ‵ka i te afi. A te mea tenā se taulaga ‵sunu, se taulaga e ofo atu i luga i te afi kae manogi gali ki a Ieova.