Levitiko

14 Ne toe faipati atu a Ieova ki a Mose, ana muna: 2 “Tenei te tulafono mō te tino lepela i te aso e faka‵ma ei a ia, i te taimi e aumai ei a ia ki te faitaulaga.+ 3 Ka fanatu a te faitaulaga ki tua mo te fakai o iloilo a ia. Kafai ko ‵lei te masaki o te tino lepela, 4 ka fakatonu atu a te faitaulaga ke aumai ne ia ne manu eva ‵ma e lua kolā koi ola, se kaula o te lakau ko te alasi, se filo lanu kula, mo se isopo mo fai tena faka‵māga.+ 5 Ka fakatonu atu te faitaulaga ke tamate te manu eva e tasi i loto i se pōla kele e ‵fonu i vai mai i se vaipuna. 6 Kae e ‵tau o puke ne ia te manu eva telā koi ola fakatasi mo se kaula o te lakau ko te alasi, filo lanu kula mo te isopo kae ufi katoa ki loto i te toto o te manu eva telā ne tamate i loto i vai mai i se vaipuna. 7 Tenā ko fakamotimoti ei ne ia fakafitu taimi ki luga i te tino telā e fai tena faka‵māga mai te masaki ko te lepela, ko fakailoa atu ei me ko ‵ma a te tino tenā, kae fakaeva atu te manu eva telā koi ola ki te vao.+

8 “A te tino telā e fai tena faka‵māga e ‵tau o ‵ta ana gatu kae ‵vele ana fulufulu katoa kae koukou ki vai, ko ‵ma ei a ia. Ka oti, ko mafai ei o vau a ia ki loto i te fakai, kae ka nofo a ia i tua i tena faleie mō aso e fitu. 9 I te fitu o aso, e ‵tau o ‵vele ne ia a laulu katoa o tena ulu mo tena talafa mo ana fulumata. Kafai ko oti ne ‵vele ana laulu katoa, ka ‵ta ne ia ana gatu kae koukou ki vai, ko ‵ma ei a ia.

10 “I te valu o aso, ka puke ne ia e lua tamā mamoe ‵lei, e tasi te mamoe fafine ‵lei+ telā ko tasi tausaga te matua, e tolu-vae-sefulu o te efa* o falaoa ‵mata kae ‵lei e palu tasi mo te sinu mo fai te taulaga meakai,+ mo te loka* sinu e tasi;+ 11 kae ko te faitaulaga telā ne fai atu i te tagata tenā ko ‵ma ka fakatu ne ia te tagata telā ne fai tena faka‵māga, fakatasi mo taulaga i mua o Ieova i te mataloa o te faleie o maopoopoga. 12 Ka puke ne te faitaulaga te tamā mamoe e tasi kae ofo atu e pelā me se taulaga mō mea ‵se+ fakatasi mo te loka sinu e tasi, kae ka fakagasuesue ne ia ki mua mo tua e pelā me se taulaga fakagasuesue i mua o Ieova.+ 13 Tenā ko tamate ei ne ia te tamā mamoe i te koga telā e tamate sāle i ei a te taulaga mō agasala mo te taulaga ‵sunu,+ i loto i se koga tapu, me e pelā mo te taulaga mō agasala a te taulaga mō mea ‵se i a te faitaulaga.+ A te mea tenā se mea tafasili i te tapu.+

14 “Ka oti, ko puke ei ne te faitaulaga ne mu toto mai te taulaga mō mea ‵se kae nani atu ne ia ki te feitu ki lalo o te taliga fakaatamai o te tino telā e fai tena faka‵māga, mo te matikao matua o tena lima fakaatamai e pelā foki mo te matikao matua o tena vae fakaatamai. 15 Kae ka puke ne te faitaulaga ne mu sinu mai te loka sinu+ kae ‵ligi atu ki luga i tena alofilima fakamaui. 16 Tenā ko ufi ei ne te faitaulaga tena matikao lima fakaatamai ki sinu mai i tena alofilima fakamaui kae fakamotimoti atu ne mu sinu mai tena matikao lima fakafitu taimi i mua o Ieova. 17 Tenā ko nani ei ne te faitaulaga ne mu sinu i te ‵toega o sinu mai i tena alofilima ki te feitu ki lalo o te taliga fakaatamai o te tino telā e fai tena faka‵māga, mo te matikao matua o tena lima fakaatamai e pelā foki mo te matikao matua o tena vae fakaatamai mai luga i te toto o te taulaga mō mea ‵se. 18 Ka ‵mili ne te faitaulaga a te ‵toega o sinu mai i tena alofilima ki te ulu o te tino telā e fai tena faka‵māga, kae ka fai ne te faitaulaga tena faka‵māga i mua o Ieova.+

19 “Ka ofo atu ne te faitaulaga te taulaga mō agasala+ kae fai te faka‵māga o te tino telā e fai tena faka‵māga mai tena tulaga sē ‵ma, ka oti ko tamate ei ne ia te manu o te taulaga ‵sunu. 20 Kae ka ofo atu ne te faitaulaga a te taulaga ‵sunu mo te taulaga meakai+ i luga i te fatafaitaulaga, ko fai ei ne te faitaulaga te faka‵māga o tou tagata,+ ko ‵ma ei a ia.+

21 “Kae kafai a te tino tenā e mativa kae e se lava ana mea, ko puke ei ne ia se tamā mamoe e tasi e pelā me se taulaga mō mea ‵se mo fai se taulaga fakagasuesue ko te mea ke fai tena faka‵māga, fakatasi mo te tasi-vae-sefulu o te efa* o falaoa ‵mata kae ‵lei kolā ne palutasi mo sinu mo fai te taulaga meakai, se loka sinu e tasi, 22 mo lupe e lua io me ne punua lupe e lua, e ‵tusa mo mea e mafai o maua ne ia. E tasi te lupe e fai mo fai te taulaga mō agasala, kae ko te suā lupe mo fai te taulaga ‵sunu.+ 23 I te valu o aso+ ka aumai ne ia a mea konā ki te faitaulaga i te mataloa o te faleie o maopoopoga i mua o Ieova mo fai tena faka‵māga.+

24 “Ka puke ne te faitaulaga a te tamā mamoe o te taulaga mō mea ‵se+ mo te loka sinu, kae ka fakagasuesue ne te faitaulaga ki mua mo tua e pelā me se taulaga fakagasuesue i mua o Ieova.+ 25 Tenā ko tamate ei ne ia te tamā mamoe o te taulaga mō mea ‵se, kae ka puke ne te faitaulaga ne mu toto o te taulaga mō mea ‵se kae nani atu ki te feitu ki lalo o te taliga o te tino telā e fai tena faka‵māga mo te matikao matua o tena lima fakaatamai mo te matikao matua o tena vae fakaatamai.+ 26 Ka ‵ligi ne te faitaulaga ne mu sinu ki luga i tena alofilima fakamaui,+ 27 kae ka fakamotimoti ne ia ki tena matikao lima fakaatamai ne mu sinu mai i tena alofilima fakamaui fakafitu taimi i mua o Ieova. 28 Ka nani ne te faitaulaga ne mu sinu mai i tena alofilima ki te feitu ki lalo o te taliga o te tino telā e fai tena faka‵māga mo te matikao matua o tena lima fakaatamai mo te matikao matua o tena vae fakaatamai i koga eiloa kolā ne nani ne ia ki ei a toto o te taulaga mō mea ‵se. 29 Tenā ko tuku atu ei ne te faitaulaga a te ‵toega o sinu mai i tena alofilima ki luga i te ulu o te tino telā e fai tena faka‵māga ke mafai o fai tena faka‵māga i mua o Ieova.

30 “Ka ofo atu ne ia se lupe e tasi io me se punua lupe e tasi e ‵tusa mo te mea e mafai o maua ne ia,+ 31 a te mea telā e mafai o maua ne ia ka fai mo fai te taulaga mō agasala kae ko te suā manu ka fai mo fai te taulaga ‵sunu+ fakatasi mo te taulaga meakai; kae ka fai ne te faitaulaga te faka‵māga mō te tino telā e fai tena faka‵māga i mua o Ieova.+

32 “Tenei te tulafono mō te tino telā ne poko i te masaki ko te lepela, kae e se lava ana mea i te taimi e fai ei tena faka‵māga.”

33 Tenā ne fai atu ei a Ieova ki a Mose mo Alona: 34 “Kafai e o‵mai koutou ki loto i te fenua o Kanana,+ telā ka tuku atu ne au ki a koutou e pelā me se kope totino,+ kae fai ne au se fale i te otou fenua ke se ‵ma i te masaki ko te lepela,+ 35 e ‵tau o vau a te tino i o ia te fale o fakailoa atu ki te faitaulaga, ‘E isi se mea sē ‵ma ko sae aka i loto i toku fale.’ 36 Ko fai atu ei ne te faitaulaga a fakatonuga ke ave a mea katoa ki tua mo te fale koi tuai o oko atu a ia o iloilo a te mea sē ‵ma, ko te mea ke se fakailoa atu ne ia me i mea katoa i loto i te fale e se ‵ma; ka oti ko fanatu ei te faitaulaga o iloilo te fale. 37 Ka iloilo ne ia a te koga telā e se ‵ma, kae kafai a ‵pui o te fale e se ‵ma ona ko tu‵tutuga lanu sega‵sega kae lanu launiu io me kula‵kula kae foliga mai me e ‵poko atu i lō te ‵pui, 38 ko fano ei te faitaulaga ki tua i te mataloa o te fale kae ‵loka te fale mō aso e fitu.+

39 “Tenā ko foki mai ei te faitaulaga i te fitu o aso o fai se iloiloga. Kafai ko salalau atu a te mea sē ‵ma ki ‵pui o te fale, 40 ko fai atu ei a fakatonuga a te faitaulaga, ko ‵tau ei o tapale kea‵tea a fatu kolā ko se ‵ma kae ‵pei atu ki tua o te fakai ki se koga sē ‵ma. 41 Ko fakatonu atu ei ke soi faka‵lei a te koga i loto o te fale, kae ko te palasitā mo te mouta kolā ne tapale kea‵tea e ‵tau o ‵pei ki tua mo te fakai ki se koga sē ‵ma. 42 Tenā ko faulu atu ei ne latou a nisi fatu i koga kolā ne tapale kea‵tea a fatu i ei, kae e ‵tau o fakaaoga ne ia se mouta fakaa‵tea, ko palasitā ei te fale.

43 “Kafai ko se ‵ma foki a te fale mai tua o te tapalega kea‵tea o fatu mai i ei kae ne soi faka‵lei a te fale kae toe palasitā atu, 44 tenā ko fanatu ei te faitaulaga ki loto o iloilo te fale. Kafai ko salalau atu a te mea sē ‵ma i loto i te fale, a te mea tenā ko te ‵toe lepela masei+ eiloa i te fale. Ko se ‵ma eiloa a te fale tenā. 45 Tenā ko fai ei a ia ke ofa ki lalo a te fale—ana fatu, ana laupapa mo palasitā mo mouta katoa o te fale—ko ave ei ki tua o te fakai ki se koga sē ‵ma.+ 46 Kae ko so se tino e ulu ki loto i te fale i aso kolā e ‵loka ei ka se ‵ma+ eiloa a ia ke oko ki te afiafi;+ 47 kae ko so se tino e takato ki lalo i loto i te fale tenā e ‵tau o ‵ta ana gatu, kae ko so se tino e kai i loto i te fale tenā e ‵tau o ‵ta ana gatu.

48 “Kae kafai e vau te faitaulaga kae lavea ne ia me e seki salalau atu a te mea sē ‵ma i loto i te fale i te otiga ne palasitā, ka fakailoa atu ne te faitaulaga me ko ‵ma te fale tenā, me ko ‵lei a te mea sē ‵ma i ei. 49 Ko te mea ke faka‵ma a te fale mai te tulaga sē ‵ma,* ka avatu ne ia e lua manu eva, te kaula o te lakau ko te alasi, filo lanu kula mo te isopo.+ 50 E ‵tau o tamate ne ia se manu eva e tasi i loto i se pōla kele e ‵fonu i vai mai i se vaipuna. 51 Tenā ko puke ei ne ia te kaula o te lakau ko te alasi, te isopo, te filo lanu kula mo te manu eva telā koi ola kae ufi atu ki loto i toto o te manu eva telā ne tamate i loto i vai mai i se vaipuna, kae e ‵tau o fakamotimoti atu ne ia fakafitu taimi+ ki luga i te fale. 52 Kae ka faka‵ma ne ia te fale mai tena tulaga sē ‵ma* ki te toto o te manu eva, te vai mai i se vaipuna, te manu eva telā koi ola, te kaula o te lakau ko te alasi, te isopo mo te filo lanu kula. 53 Tenā ko fakaeva ei ne ia te manu eva telā koi ola ki tua mo te fakai ki te vao, ko fai ei te faka‵māga o te fale; ko ‵ma ei.

54 “Tenei te tulafono e uiga ki so se mea e maua ne te masaki ko te lepela, māfai ko ‵pisi atu ki te ulu io me ko te talafa,+ 55 te lepela i te gatu+ io me se fale,+ 56 e pelā foki mo mea faka‵pusa, matakili mo ila,+ 57 ko te mea ke iloa ei a te mea telā e se ‵ma mo te mea telā e ‵ma.+ Tenei te tulafono e uiga ki te masaki ko te lepela.”+