Opetaia
1 Ko te fakaasiga a Opetaia:*
Konei a pati a te Aliki Sili ko Ieova ne fai mai e uiga ki Etoma:+
“Ko oti ne lagona ne matou se lipoti mai i a Ieova,
E isi se sui o atufenua ko oti ne uga mai:
‘‵Tu ki luga, ke fakatoka tatou o taua atu ki tou fafine.’”+
2 “Kiloke! Ko oti ne fai ne au koe ke se tāua i atufenua;
E takalia‵lia malosi latou ki a koe.+
3 A te loto fakamaualuga o koe ne takitaki ‵se i ei koe,+
A koe telā e nofo i koga filemu o te kaupapa,
E nofo i koga ma‵luga, kae fai ifo i tou loto,
‘Ko oi ka tuku ifo ne ia au ki lalo i te laukele?’
4 E tiga eiloa e fai ne koe tou koga nofo ke maluga* e pelā mo te aeto,
Io me tuku ne koe tou ofaga i luga i fetū,
Ka tuku ifo ne au koe ki lalo mai konā,” ko te folafolaga a Ieova.
5 “Kafai e o‵mai a tino kai‵soa ki a koe, ko tino ‵fao mea i te po,
(Ka fakamaseigina valevale eiloa koe!)
E a, ka se kaisoa fua ne latou a mea kolā e ma‵nako latou ki ei?
Io me kafai e o‵mai a tino tau fuagavine ki a koe,
E a, ka se faka‵toe ne latou ne mea ke taetae ne tino?+
6 A Esau ko oti ne iloilo faka‵lei!
Ana koloa ‵funa ko oti ne ‵fao mai i ei!
7 Ko oti ne afuli ne latou a koe ke oko eiloa ki te tuakoi.
A fenua katoa ne fai taugasoa mo koe* ne takitaki ‵se ne latou koe.
A tāgata ne fealofani mo koe ne manumalo i a koe.
A latou kolā e ‵kai fakatasi mo koe ka tuku ne latou se tili mai i lalo o koe,
Kae ka se iloa ne koe.
8 I te aso tenā,” ko te folafolaga a Ieova,
“E a, ka se fakaseai ne au a tino ‵poto mai i Etoma+
Mo tino atamai mai i koga maugā o Esau?
9 Kae ko au toa ‵mafi ka pole‵pole,+ e Timanu,+
Me i tino taki tokotasi i koga maugā o Esau ka fakaseai atu i te tamatega o tino.+
10 Ona ko fakasauaga ne fai ki tou taina ko Iakopo,+
Ka ufi koe ne te mavale,+
Kae ka mate atu koe ki te se-gata-mai.+
11 I te aso ne fakatafa kea‵tea ei koe,
I te aso ne ave fakapagota ei a tena kautau ne tino ‵fou,+
I te taimi ne ulu mai ei a tino fakaa‵tea ki loto i ‵pui o tena fakai kae fai a vili+ ki Ielusalema,
Ne gasuesue eiloa koe e pelā me se tino e tokotasi i a latou.
12 E se ‵tau mo koe o fakaasi te fiafia i te aso e malaia ei tou taina,+
E se ‵tau mo koe o fiafia ona ko tino Iuta i te aso o te lotou fakaseaiga,+
Kae e se ‵tau mo koe o faipati fakamatamata i te aso o te lotou puapuaga.
13 E se ‵tau mo koe o vau ki loto i mataloa o ‵pui o te fakai o oku tino i te aso o te lotou fakalavelave,+
E se ‵tau mo koe o fakaasi te fiafia ona ko tena puapuaga i te aso o tena fakalavelave,
Kae e se ‵tau mo koe o tuku atu ou lima ki luga i ana koloa i te aso o tena fakalavelave.+
14 E se ‵tau mo koe o tu i maga o auala o tamate a tino kolā e ‵sao,+
Kae e se ‵tau mo koe o tuku atu ki te fili ana tino ne ‵sao i te aso o te puapuaga.+
15 Me ko pili mai te aso o Ieova ke taua atu ki atufenua katoa.+
E pelā mo te mea ne fai ne koe, ka fai foki eiloa penā ki a koe.+
A faifaiga ne fai ne koe ki nisi tino ka ‵foki mai eiloa ki luga i tou ulu.
16 Me i te auala ne inu ei koe i luga i toku mauga tapu,
Ka inu foki eiloa penā a atufenua katoa.+
Ka inu folofolo latou,
Kae ka fai latou e pelā me ne tino ne seki ola eiloa.
17 Kae ka ‵tu latou kolā ne ‵sao i luga i te Mauga o Siona,+
Kae ka fai te koga tenā e pelā me se koga tapu;+
Kae ko te kāiga o Iakopo ka puke ma latou olotou mea.+
18 A te kāiga o Iakopo ka fai e pelā me se afi,
A te kāiga o Iosefa e pelā me se ulaga o te afi,
Kae ko te kāiga o Esau ka fai e pelā me ne kausaito;
Kolā ka faka‵ka kae ‵sunu ne latou,
Kae ka seai se tino e sao mai i te kāiga o Esau,+
Me i a Ieova ko oti ne faipati.
Ka puke mō latou te laukele o Efalaima mo te laukele o Samalia,+
Kae ko Peniamina ka puke mō ia a Kileata.
20 Kae ko tino o te koga maluga tenei kolā ne ave fakapagota,+
Ko tino o Isalaelu ka fai mo latou a te fenua o tino Kanana ke oko atu eiloa ki Salefata.+
Kae ko tino Ielusalema kolā ne ave fakapagota, kolā ne ‵nofo i Sefalata, ka fai mo latou a fakai o te Nekepi.+